МАН-ын дуулиант Бага хурал маргааш болох гэж байна. Бага хурлын гишүүд нь хуралдаа багагүй бэлдэж байгаа бол томчууд нь тоймгүй их хорыг найруулжээ. Энэ удаагийн Бага хурлаас МАН-ынхан төдийгүй Монголын нийгэм төдийлөн их юм хүлээхгүй байгаа. Учир нь энэ удаагийн Бага хурлаар хоёр гол асуудал хэлэлцэнэ гэж Бага хурлын болоод жирийн гишүүд, нийгмээ тайвшруулсан. Нэгд Ерөнхийлөгчийн сонгуулийн дүнг хэлэлцэнэ. Хоёрт Их хурлынхаа товыг зарлана гэсэн. Энэ нь намынхаа эгэл жирийн гишүүдээ тайван байлгах гэсэн арга заль болж таарлаа. Учир нь жирийн гишүүдээ ингэж тайвшруулж байгаад “Чоно борооноор” гэдэг шиг намынхаа даргыг солихоор томчууд нь тохирчихжээ.

МАН-ын эгэл жирийн гишүүдээсээ эхлээд Бага хурлынхаа гишүүдийг бассан ийм шийдвэрт хүрсэн байна. Энэхүү шийдвэрийг МАН-ын одоогийн дарга Ө.Энхтүвшин,  УИХ-ын дэд дарга М.Энхболдтой хуйвалдан гаргажээ.

Монголчууд явж байгаа хүнээр ачаа бүү татуул гэж хэлдэг л дээ. Гэхдээ МАН-ын ирэх жилүүдийн ачааг Ө.Энхүвшин ингээд татаад зогсож байхад гишүүд нь юу ч мэдээгүй байна. Угаасаа түүнийг М.Энхболдтой тун ойр ажилладаг гэж олон удаа хэвлэлээр бичигдсэн нь ийнхүү батлагдаж эхэллээ.

Ө.Энхүвшин маргаашийн Бага хурал дээр гэнэт хариуцлагаа хүлээж ажлаа өгнө гэж мэдэгдэнэ. Тэгээд М.Энхболдыг МАН-ын даргад санал болгоно. Бага хурлын гишүүдийн олонхи дэмжинэ. Ингээд асуудал дуусах сценари аль хэдийн бэлэн болжээ. Гэхдээ маргаашийн Бага хуралд аль болох цөөн хүн ирүүлэх талаар хотын бүлэглэл ажиллаж байгаа гэнэ. Тиймээс хөдөө орон нутгаас ирэх төлөөлөгчид цөөн байх аж. Үүний зэрэгцээ ирсэн төлөөлөгчидтэй хотын бүлэглэл тулж ажиллана. Харин М.Энхболдын бүлэглэл “даргадаа хайртай бол бүгдээрээ ирээрэй” гэсэн мессежийг өөр хоорондоо тун нууцлаг байдлаар тарааж эхэлжээ. Түүгээр ч барахгүй хөдөө болоод гадаадад явж байгаа хотын бүлэглэлийнхэн өнөө шөнөдөө багтаад бүгд ирэх аж. Ингээд М.Энхболд гэнэтхэн дайрах аргаар МАН-ын дарга болох нь тодорхой болжээ.

Түүний энэ үйлдлийг У.Хүрэлсүхийн залуус тун сүрхий эсэргүүцэж байгаа сураг гарлаа. Бас ийм үйлдэл болох гээд байгааг мэдсэн гишүүд ч бухимдаж эхэлжээ. Учир нь тэд МАН-ын даргыг Их хурлаараа шийднэ гэж итгэж явтал ар хударгаар нь аль хэдийнээ нүүдэл хийгдчихжээ.

Уг нь МАН-ын даргыг удахгүй болох Их хурлаараа шийдвэрлэнэ. Бас Их хурлаасаа шинэ Бага хурлыг ч сонгоно. Тэр Бага хурал нь УЗ, Ерөнхий нарийн бичгийн дарга болон бүх нарийн бичгийн даргаа шинээр томилно гэж дүрмийн дагуу асуудлыг ярьж байсан юм. Угаасаа МАН-ын хотын бүлэглэлд дүрэм хамаардаггүй учир энэ удаа ч дайраад өнгөрөх аж.

Хэрэв М.Энхболд Их хурлаасаа биш Бага хурлаасаа иймэрхүү аргаар сонгогдвол өөрөө л цаашдаа эвгүй байдалд орно. Намаа ч улам сульдаана. Их хурлаасаа өрсөлдөөд гарвал өөрийнх нь нэр хүндэд л хэрэгтэй. Тэгээд ч МАН-ын хотын бүлэглэл гэгч Улаанбаатар хотыг сүүлийн жилүүдэд ямар болгосныг ард түмэн харж байгаа. Тийм учраас сүүлийн таван сонгуульд Улаанбаатарчууд МАН-ын эсрэг өгсөн. Гэтэл Э.Бат-Үүл ганцхан жилийн дотор хотыг ямар гоё болгож байгааг харж байна. Ийм байхад МАН-ынхан хотын бүлэглэлээ гаргаж ирж байвал өөрсдөө булшаа ухлаа л гэсэн үг дээ. Тэгвэл юун түрүүнд Улаанбаатарчууд МАН-д баяртай гэж эелдэгээр хэлнэ. Хамгийн сүүлд л гэхэд Улаанбаатарын ганц дүүрэг болох Чингэлтэйд л МАН ялсан. Гэтэл энэ дүүргийн ИТХ-ын дарга Д.Бат-Эрдэнэ гэгч 70 саяар өрөөгөө засуулж 50 саяар машин авч тансаглаж байна. Түүнийг М.Энхболдын гарын хүн гэдэг. МАН-ын хотынхон ийм л хүмүүс. Ард түмэн энэ байдлаас нь болоод АТГ-ын үүдэнд жагсаж байна. Гэтэл АН-аас гарсан бусад дүүргийн удирдлагууд МАН-ынхан шиг тансаглаагүй. Энэ ганц жишээ л ард түмэнд их юм бодогдуулах боллоо. Иймэрхүү зүйлсийн эх сурвалж болсон хотын бүлэглэл хуйвалдааны замаар МАН-ын удирдлагыг авахад бэлэн болжээ.

Уг нь МАН-ын удирдлагад М.Энхболдоос гадна У.Хүрэлсүх, Н.Энхболд нарыг санал болгож байгаа. Бас 1970 аад оны төлөөлөл болох С.Бямбацогт, Ж.Энхбаяр, Д.Цогтбаатар, Ж.Сүхбаатар нарын нэрийг ч ярьж эхэлсэн. Залуусаасаа ачаа даах чадвартайг нь нэрлэж байгаа хэрэг. Эдгээр залуус сонгогдохгүй байсан ч гэсэн намынх нь гишүүдэд тэдэнд итгэж байна. Ард түмэн тэднийг ирж яваа цагийн ачаа даах төлөөлөл хэмээн харж байна гэдэг өөрөө том үнэлэмж юм.

Үүнээс гадна “Шинэчлье” хөдөлгөөнийг бүрдүүлэгч 1980 аад оны залуус ч гэсэн Их хурлаа хуралдуулаад тэднээсээ удирдлагаа сонгьё гэж санал гаргаад байгаа. Тэдний саналыг ч юман чинээ бодоогүй байна. 

Ийнхүү маргааш болох Бага хурлын гэнэтийн сюрприз нь Ө.Энхүвшин, М.Энхболд хоёрын хамтарсан тоглолт байх нь. Харин тэдний төлөвлөгөө, санаачилгыг С.Баяр, Сү.Батболд, Н.Энхболд, У.Хүрэлсүх болоод 1970, 1980 оных нь залуус аль хир хориглон хамгаалж чадах эсэхийг харах л үлдсэн байна. Учир нь тэдэнд мэдэгдэхгүйгээр хотын бүлэглэл нь ингэж ажиллаж. Нэгэнт Бага хуралдаа биш Их хуралдаа ач холбогдол өгч байсан гэх тэдний олонхи нь хөдөө, гадаа явж байгаа гэсэн сураг гарлаа. Монголын ард түмний шинэчлэгдэнэ гэж хүлээсэн МАН иймэрхүү замаар л шинэчлэлээ хийх нь дээ.