Өчигдөр МАН-ын Удирдах зөвлөлийн хурал нилээд сунжирч таржээ. Тэд өнөөдөр болох Бага хурлынхаа бэлтгэлийг ярилцсан юм. Бас Бага хуралд үг хэлэх Ө.Энхтүвшингийн илтгэлийг хэлэлцжээ. Энэхүү илтгэл нь өнгөрсөн орон нутгийн сонгууль болоод Ерөнхийлөгчийн сонгуульд МАН яагаад ялагдсанд дүгнэлт хийсэн аж. Үүний өмнөх УИХ-ын сонгуульд яагаад ялагдсандаа Сү.Батболд, У.Хүрэлсүх хоёр дүгнэлт хийсэн юм. Мөн тэрний өмнөх Ерөнхийлөгчийн сонгуульд яагаад ялагдсанд С.Баяр дүгнэлт хийсэн. Энэ мэтээр удирдлагууд нь алдаагаа өөр өөрсдийн байр сууринаас дүгнэсэн билээ.
   Харин сүүлийн хоёр сонгуульд яагаад ялагдал хүлээснээ дүгнэх Ө.Энхтүвшингийн байр суурь нэг хэсэгтээ олон түмний анхаарлыг татах нь гарцаагүй.

    Өчигдрийн Удирдах зөвлөлийн хурал дээр МАН-ын дарга Ө.Энхтүвшин гэнэтхэн хариуцлагаа хүлээнэ, маргаашийн Бага хурлаар ажлаа өгнө гэж мэдэгдсэн нь багагүй маргаан өрнүүлжээ. Учир нь өчигдрийн Удирдах зөвлөлийн хурал хүртэл Ө.Энхтүвшин ямар нэгэн байр суурь илэрхийлэлгүй чимээгүй байсан юм. Яг үнэндээ бол Ө.Энхтүвшин Б.Бат-Эрдэнийн өмнөөс л хариуцлага хүлээж байгаа хэрэг. Хүний өмнөөс хариуцлага хүлээнэ гэдэг хэцүү. “Өөрөө нэр дэвшсэн бол...” гэсэн бодол байсан л байх. Гэхдээ анх удаа Ө.Энхүвшин хариуцлагаа хүлээнэ гэж ам нээсэн аж. Бас намын бусад удирдлагаа ч гэсэн хариуцлага хүлээх ёстойг сануулж. Ингээд МАН-ын одоогийн удирдлага бүрэн бүрэлдэхүүнээрээ огцрох нь тодорхой болжээ.
   Ө.Энхтүвшин даргынхаа энэ байр суурийг тойрч Удирдах зөвлөлийн гишүүд их маргалджээ. Нэг хэсэг нь намын Их хурал хүртэл даргаараа бай гэсэн бол нөгөө хэсэг нь үүрэг гүйцэтгэгч бол гэжээ. Бас зарим нь маргааш даргаа сонгочихьё гэсэн санал гаргажээ. Мөн нилээдгүй гишүүд шинээр Их хурал хүртэл үүрэг гүйцэтгэгч томильё гэх мэтээр удтал гарц хайжээ. Эцэст нь Бага хурлын гишүүдийн санал хураалтаар шийдвэрлье гээд үлдээжээ. Өөрөөр хэлбэл өнөөдөр МАН-ын шинэ даргаа сонгох эсэхийг Бага хурлын гишүүд олонхийн саналаараа шийдвэрлэнэ.

    Ө.Энхтүвшингийн энэхүү байрь суурьтай зэрэгцээд нэгэн хүний мэдэгдэл Удирдах зөвлөлийн гишүүдийн анхаарлыг татжээ. Эх сурвалжийн мэдээллээр бол Бага хурлын гишүүн У.Хүрэлсүх МАН-ын даргад өрсөлдөхгүй гэж мэдэгдсэн байна. Гэхдээ энэ мэдээллийг олон хүн батлахгүй байгаа юм. Өөрөө ч албан ёсоор хэлээгүй. Үйл явдал ингэж өрнөж байгаа бололтой. Өчигдөрийн УЗ-ийн хуралд Сү.Батболд, У.Хүрэлсүх хоёр суугаагүй гэнэ. Учрыг лавлавал тэр хоёр УЗ-ийн гишүүн биш бололтой.
Ийнхүү өнөөдрийн Бага хурлаар Ө.Энхтүвшин ажлаа өгч, У.Хүрэлсүх намын даргад өрсөлдөхгүй гэдгээ албан ёсоор зарлах сураг гарлаа.