Өнөөдөр МАХН-ын 30 гишүүн намаасаа гарч, МАН-д элсч байгаагаа мэдэгдэж хэвлэлийн бага хурал хийлээ. МАХН-ын гишүүд, дэмжигчдийн холбооны дарга Г.Баярсайхан болон бусад төлөөлөгчид хэвлэлийн бага хуралд оролцсон юм. Тэд "МАН бол Монголын улс төрд олон жил бат бөх суурьтай явж ирсэн нам. МАН бол бидний ууган нэр, МАХН бол харин нэг гэр бүлийн нам. Нэг, хоёр хүний эрх ашиг давамгайлдаг гэдгийг мэдэж авсан учраас МАН-д элсч байна" гэлээ. Тэд ийнхүү МАН-д элсч байгаа нь МАХН-ын дарга Н.Энхбаяр суллагдсан болон МАН-ын Бага хурал болж байгаатай ямар ч холбоогүй гэдгийг тодотгосон юм. Г.Баярсайханы хэлж байгаагаар МАХН-аас гарах шийдвэрээ оны өмнө гаргаж, бэлтгэл ажлаа хийж байжээ. Тэд МАХН-аас гарах хүсэлтээ удирдлагууддаа гаргаж, албан тоотоор хариу авсан юм байна.