МАН-ын Бага хурал өнөөдөр өглөө 10.00 цагт эхлэх байсан ч 15.00 цаг хүртэл хойшиллоо. Цаг агаарын байдлаас болж хөдөө орон нутгаас ирэх гишүүдийн унаа нь саатсан учир ирц бүрдээгүй байгаа энэ юм. Хэрвээ Бага хурлын гишүүд 15.00 цагаас өмнө ирвэл өнөөдөртөө багтаад Бага хурлаа эхлүүлнэ гэж МАН-аас мэдээллээ.

МАН-ын Бага хурлын гишүүдийн заримаас нь Бага хурлын талаар болон намын шинэчлэлийн асуудлаар санаа бодлыг нь сонслоо.

Б.Долгор: Бага хурлаар намын даргыг өөрчлөх асуудал яригдахгүй.

- Удирдах зөвлөлөөр чухам юу яригдсан бэ? Зохион байгуулалтайгаар гишүүдийг ирцийг бүрдүүлэхгүй арга хэмжээ авч байна гэж байна? Та ямар байр суурьтай байна вэ?

- Цаашид энэ нам хэрхэн шинэчлэгдэх вэ гэдэг асуудал бол хүмүүсийн сонирхлыг их татаж байгаа. Шинэчлэлийн ажил бол их өргөн хүрээг хамрах ёстой. Тэрхүү өргөн хүрээнд үзэл баримтлалын асуудлууд, намын дүрмийн шинэчлэл, удирдлага, бүтэц бүрэлдэхүүн гэсэн бүх асуудал хамаарах учиртай. Тэгэхдээ дээрх асуудлуудыг бүгдийг нь энэ удаагийн Бага хурлаар шийдэхгүй. Ялангуяа намын даргын асуудал бол намын их хурлаар шийдвэрлэгдэх ёстой. Тиймээс энэ удаагийн намын Бага хурлаар Их хурлын товыг гаргана. Сонгуулийнхаа үр дүнг хэлэлцэж, намынхаа цаашдын шинэчлэлийн асуудлаар ярилцах болно. Мэдээж намын дүрмийн асуудал онц анхаарал татах ёстой.

- Намын даргад цөөн хүн нэр дэвшээд байгаа. Та энэ талаар ямар байр суурьтай байна вэ?

- Энэ удаагийн Бага хурлаар намын даргын асуудлыг ярихгүй. Ер нь намын даргыг сонгох журам шинэчлэгдэх ёстой гэж үзэж байна. Ер нь намын гишүүдийнхээ дунд сунгаа явуулах ч журмаар нийт сонгогч гишүүдийнхээ саналаар даргын ажлыг авах ёстой. Бага хурлын 200 гаруй гишүүн эсвэл удирдах зөвлөлийн 20 гаруй хүн яриад энэ асуудлыг шийдэхгүй.