МАН-ын Бага хурал өнөөдөр өглөө 10.00 цагт эхлэх байсан ч 15.00 цаг хүртэл хойшиллоо. Цаг агаарын байдлаас болж хөдөө орон нутгаас ирэх гишүүдийн унаа нь саатсан учир ирц бүрдээгүй байгаа энэ юм. Хэрвээ Бага хурлын гишүүд 15.00 цагаас өмнө ирвэл өнөөдөртөө багтаад Бага хурлаа эхлүүлнэ гэж МАН-аас мэдээллээ.

МАН-ын Бага хурлын гишүүдийн заримаас нь Бага хурлын талаар болон намын шинэчлэлийн асуудлаар санаа бодлыг нь сонслоо.

“Шинэчилье” хөдөлгөөний удирдах зөвлөлийн гишүүн Ж.Мөнхбат: УЗ бүрэн бүрэлдэхүүнээрээ огцрох ёстой.

- 15.00 цаг гэхэд Бага хурал хуралдах байх. Ямартай ч тулгараад байгаа асуудлуудаа ярих байх гэж бодож байгаа. Өчигдөр болсон намын удирдах зөвлөлийн хурал дээр “Би хариуцлагаа хүлээж халагдах өргөдлөө өгнө” гэж намын дарга хэлсэн. Энэ талаар намын удирдах зөвлөлийн гишүүд өөр өөрсдийн байр суурийг илэрхийлсэн.

- У.Хүрэлсүх нэрээ татлаа гэсэн. Энэ талаар ямар мэдээлэлтэй байна вэ?

- Тэр талаар мэдэхгүй байна. Ямартай ч У.Хүрэлсүх намын даргад өрсөлдөхгүй гэдгээ өөрөө албан ёсоор мэдэгдсэн.

 - Хариуцлагын асуудал яригдах гээд байхад намын даргын асуудал яригдахгүй гэж зарим гишүүд ярьж байна. Та нарын ярьж байгаа зүйл зөрчилдөөд байгаа юм биш үү?

- Хариуцлагын асуудлыг Ерөнхийлөгчийн сонгуулийн маргааш өдрөөс нь эхлээд “Шинэчилье” нэгдсэн хөдөлгөөнийхөн тавьсан. Дөрвөн удаа намынхаа удирдах зөвлөлд шаардлага хүргүүлсэн. Өчигдөр орой болсон удирдах зөвлөлийн хурал дээр шаардлагаа бас л тавьсан. Энэ шаардлагын дөрөвт хариуцлагын асуудлыг тусгасан. Хэлэлцэх эсэх нь намын дарга нарын л шийдэх асуудал.

- Намын Бага хурлаар хариуцлага ярихгүй бол өөр юм яригдах вэ?

- Бүх л асуудлаа ярих нь нээлттэй байдаг шүү дээ.

- "Шинэчилье" хөдөлгөөнөөс удирдах зөвлөлийн гишүүдийг бүгдийг нь огцруулах байр суурьтай байгаа биз дээ?

- Тийм. Бид бүрэн бүрэлдэхүүнээ огцрох ёстой гэж үзэж байгаа.

- Огцролоо гэхэд танай намыг лидергүй болсон гэж ярьж байгаа. Хэн дарга болох ёстой гэж та үзэж байна вэ?

- Дүрмийн заалтаар бол намын дарга өргөдлөө өгсөн, өвчний шалтгаанаар гарсан үед намын даргыг нөхөн  сонгоно гэдэг асуудал яригдана. Түүнээс биш лидерийн хомсдолд ороогүй. МАН-ын даргыг хийгээд явчих чадалтай, боловсролтой, туршлагатай хүмүүс байгаа. Хамгийн гол нь гаргаж ирэх зарчмаа л зөв тодорхойлох ёстой.