Долоо хоног бүрийн даваа гарагт болдог “Бүтээн байгуулалтын цаг” ээлжит уулзалт болж, улс орон даяар өрнөж буй бүтээн байгуулалтын ажлын талаар салбар яамдаас мэдээлэл хийлээ. Дорнод аймгийг нийслэлтэй холбох хатуу хучилттай авто замын барилгын ажлыг 6 компани гүйцэтгэж, ажлын явц 35 хувьтай байгаа юм. “Насны зам” болон “Чайна жео инженеринг” ХХК-уудын ажлын гүйцэтгэлийн явц муу байгаа гэдгийг салбарын сайд нь хэллээ. Харин Ерөнхий сайд Н.Алтанхуяг “Засгийн газар нэг компанийг шахаж шаарддаг ажил хийхгүй. Хийж чадахгүй бол гэрээг нь цуцалж, өөр компаниар гүйцэтгүүлэх боломж байгаа” гэдгийг хэлсэн. Хөвсгөл аймгийн төвийг нийслэлтэй хатуу хучилттай авто замаар холбох ажил 22 хувьтай байгаа бөгөөд тус ажлыг гүйцэтгэж буй БНСУ-ын “Beak Seok” компанийн гэрээг цуцлахаар болжээ. Баянхонгор-Улаанбаатар чиглэлийн авто зам наадмын өмнө ашиглалтад орно гэж байсан ч 8 сарын 24 хүртэл хойшилсон юм. Үүнийг салбар яамныхан бороо орж, технологийн горим алдагдахад хүрсэнтэй холбон тайлбарлаж байлаа. Харин Ерөнхий сайд цаг зуурын бэрхшээл зовлон тоочилгүй иргэдийн эрх ашгийг нэгдүгээрт тавьж, ажлаа цаг хугацаанд нь чанартай дуусгахыг захилаа. Мөн шинээр зам тавих болон засвар шинэчлэлийн ажлын стандартыг эргэн харж, зураг төсөв, гүйцэтгэл, хяналтын уялдааг хангах хэрэгтэйг албаныхан хэлж байна.


“Шинэ төмөр зам” төслийн Ухаахудаг-Гашуунсухайт чиглэлийн төмөр замын суурь бүтцийн барилгын ажлын явц 32.9 хувьтай байгаа, баяр наадамтай холбоотойгоор графикт хувиараасаа хоцорч байгааг нөхөх үүрэг өгсөн гэдгийг Зам тээврийн сайд А.Гансүх мэдэгдлээ.

Мөн “Гудамж төсөл”, V цахилгаан станц, Налайх дахь цэвэрлэх байгууламж, Яармагийн замыг өргөтгөх, 12 байршилд гэр хорооллын инженерийн дэд бүтэц байгуулах ажил, 22-ын товчоо болон Чингисийн хөшөөт цогцолбор чиглэлийн авто замын ажлуудын талаарх мэдээллийг холбогдох албаныхан өгсөн юм. Ирэх 7 хоногт Гудамж төслийн хүрээнд X хорооллын уулзварыг нээх бол 5 байршилд гэр хорооллын инженерийн дэд бүтэц байгуулах ажил эхэлсэн, бусад нь судалгаа, гэрээний түвшинд явааг хариуцсан сайдууд дуулгалаа. Яармаг-Мишээл экспо чиглэлийн 1.8 км авто замыг өргөтгөх ажил энэ 7 хоногт эхэлнэ гэлээ.

Бүтээн байгуулалтын ажлыг хугацаанд нь чанартай дуусгах ёстой. Удаашралтай байгаа ажлуудыг эрчимжүүлж, гүйцэтгэж чадахгүй байгаа компаниудтай хариуцлага тооцож, гэрээг нь цуцалж, чаддаг компаниар нь хийлгэхийг Ерөнхий сайд үүрэг болголоо.


“Чингис” бондын хөрөнгөөс 51 тэрбум төгрөгийг ноос, ноосон бүтээгдэхүүний үйлдвэрлэлд зарцуулахаас өнөөдрийн байдлаар 23 тэрбум төгрөгийн урт хугацаатай, хүү багатай зээлийг үйлдвэрлэгчдэд олгоод байна. 140 гаруй оёдлын компанийг нэгтгэсэн “Оёдлын нэгдсэн холбоо”-д 3100 гаруй оёдолчин ажиллаж, сурагчийн дүрэмт хувцсыг анх удаа дотооддоо үйлдвэрлэж эхлээд байна.  Өнөөдрийн “Бүтээн байгуулалтын цаг”-т Оёдлын нэгдсэн холбоо болон Ноосон бүтээгдэхүүн үйлдвэрлэгчдийн холбооны төлөөлөл оролцож, мэдээлэл хийлээ.


Нийт 522 мянган сурагчийн дүрэмт хувцасыг үйлдвэрлэж, энэ оны 11 сар гэхэд бүх сурагчийг Монгол хонины ноосоор үйлдвэрлэсэн даавуугаар дотооддоо урласан дүрэмт хувцасаар хангах юм. Хичээлийн шинэ жил гэхэд бага ангийн буюу 1-3 дугаар ангийн сурагчдын дүрэмт хувцас бэлэн болох бол 9 сарын 20-нд 4-5 болон дунд ангийн сурагчдынх, 10 сарын 30 гэхэд ахлах ангийн сурагчдын дүрэмт хувцасыг бүрэн нийлүүлэх юм.

Дүрэмт хувцас 2-3 жилийн эдэлгээ даах чанартай материалаар хийгдэж байгаа бөгөөд 40 хувийн ноос, 60 хувийн полистр хольцтой ажээ.

Сурагчийн дүрэмт хувцас өмнөх жилүүдэд худалдаалагдаж байсан үнээс 2400-14 000 төгрөгөөр нэмэгдсэн хэдий ч даавууны чанар, эдэлгээ  сайжирсан бас сонголттой болсон гэдгийг үйлдвэрлэл эрхлэгчид хэлж байна гэж Засгийн газрын Хэвлэл мэдээлэл, олон нийттэй харилцах албанаас мэдээллээ.