МАН-ын дарга Ө.Энхтүвшин, нарийн бичгийн дарга М.Оюунчимэг, НАМОХ-ын ерөнхийлөгч Б.Амарсанаа нар Бага хурлаар хэлэлцэж шийдвэрлэсэн асуудлын талаар сэтгүүлчдэд мэдээлэл хийлээ.

Намын их хурлыг аравдугаар сарын 27-нд 1134 төлөөлөгчтэй хуралдуулахаар боллоо. Мөн гурван удаагийн сонгуулийн ялагдлын алдаа оноог хэлэлцэж, намын удирдлага хариуцлагаа үүрч ажлаа өгнө гэж мэдэгдэв. Ер нь Их хурлын үеэр намын даргаас эхлээд Бага хурлын гишүүд хүртэл бүрэн бүрэлдэхүүнээрээ огцрох юм гэдгийг тэрээр мөн хэллээ.

МАН-ын дарга Ө.Энхтүвшин “Намын их хурлыг хуралдуулах цаг болсон. Орон нутгийн сонгуулийн дараахан хуралдуулна гэж байсан ч Ерөнхийлөгчийн сонгуультай холбогдуулан хойшлуулсан байсан. Энэ дагуу Бага хурал хуралдсан. Намын 27-р Их хурлаа ирэх аравдугаар сарын 27-нд зохион байгуулахаар товлолоо. Мөн Бага хурлаар улс орны нийгэм эдийн засгийн өнөөгийн байдал, цаашдын зорилтын талаар ч ярилцсан. Бага хурлын гишүүдээс Их хурлын гишүүдийн тоог нэмэгдүүлэх шаардлагатай гэж үзэж, 1143 гишүүнтэйгээр буюу өргөн бүрэлдэхүүнтэй хийхээр болсон. Ялангуяа намын анхан шатны байгууллагын төлөөллийг оролцуулах нь зүйтэй гэж үзсэн. Энэхүү 1143 төлөөлөгчийг хэрхэн сонгох журмыг мөн Бага хурлаар баталсан” гэлээ.

Мөн улс орны нийгэм эдийн засгийн байдал, ард түмний аж амьдрал, энэ жилийн төсөв мөнгөтэй холбоотой асуудал нь  түмний аж амьдралд хэрхэн нөлөөлөх талаар тогтож ярьжээ. Монголын ард иргэдэд эдийн засагтай холбоотой мэдээллийг хүргэх ёстой гэж Бага хурлын гишүүд үзсэн байна. Энэ талаар нилээн дэлгэрэнгүй мэдээллийг ч хийнэ гэдгээ тэрээр хэлсэн юм. Ер намын дотоод асуудлаас илүүтэйгээр улс орны эдийн засаг, нийгмийн асуудлыг чухалчлан хэлэлцэж, намын бүлгийг ажилд нь оруулах, намрын чуулганы хэлэлцэх асуудал, бүлгээс намрын чуулганд өргөн барих төслүүдийг бэлтгэх хэрэгтэй байгааг онцоллоо. Намын шинэчлэлийн асуудлаар нухацтай ярилцсан бөгөөд Их хурлаар бүх зүйл шийдэгдэнэ гэв. Энэ асуудлаар ажлын хэсэг ч гаргасан байна.