Саяхан Ерөнхий сайд Н.Алтанхуягийн хийсэн ээлжит бодлогогүй мэдэгдэл Монголын эдийн засагт төдийгүй иргэн бүрийн амьдралд нөлөөлөл үзүүлэхээр боллоо. Бүр том утгаар нь авч үзвэл Монголын уул уурхайн салбарыг сонирхож буй гадныханы болгоомжлолыг төрүүллээ. Монгол төрийг удирдаж буй хүн улсаа эдийн засагтай нь, ард түмэнтэй нь хорлох мэдэгдэл хийнэ гэдэг байж боломгүй үйлдэл л дээ. Тэрээр “Эрдэнэс-Тавантолгой компани аль дээр л дампуурсан” гэж олон түмэнд зарласан юм.

Өнөөдрийг хүртэл бүхий л Монгол хүн энэ ордын зүг баялагийн эзний харцаар найдлага тавьж ирсэн юм. Н.Алтанхуягаас өмнө ямар ч Монгол хүн энэ ордыг муулж байгаагүй. Дэлхийд хосгүй орд гэж хоёргүй нэг утгаар тунхаглаж ирсэн. Гадна, дотныхон бас мэргэжлийнхэн Тавантолгойн ордыг коксжих нүүрсний нөөцөөрөө дэлхийд тэргүүлнэ гэж баталдаг. Тийм л учраас энэ ордын төлөөх тамын тогооны үлгэр эхэлж эцэстээ Баабарын зөгнөлөөр Монголыг хөгжүүлэхгүй байх бодлоготнуудын гаргалгаагаар “үнс” болоод дуусч магадгүй байна.

Монголын иргэн бүрт энэ орд хамаатай гэж хэдэн жилийн өмнө бид улс төржиж байсан. Тэгээд их улс төржилтийнхөө үр дүнд 2.8 сая иргэндээ хувьцаа эзэмшүүлэхээр болсон. Ийм шийдвэрийг Сү.Батболдын Засгийн газар гаргасан. Уг шийдвэрийг Сү.Батболд зарлахад бид хамтарч шийдсэн шүү гээд дэргэд нь тохой залгаад сууж байсан хүн бол Н.Алтанхуяг! Худлаа гэвэл тэр үеийн бичлэгийг хаанаас ч гаргаж ирээд харуулж болно л доо. Ингэж хамтарч шийдвэрлэсэн шийдвэрээ одоо муулж болохгүй бүтэхгүй байсан гэж хэн зарлах болов оо? Н.Алтанхуяг!

Хэрэвээ үнэхээр Тавантолгойн орд дампуурсан юм бол, Монгол хүн бүр хувьцаа эзэмшиж буй дэлхийд хосгүй орд газрыг ашиггүй болгосон юм бол тэр хүмүүстэй хариуцлага ярих нь зүйн хэрэг.

“Эрдэнэс  Тавантолгой”  компанийг хэн дампууруулсан бэ? Н.Алтанхуяг! Яагаад гэвэл дэлхийн хэмжээний энэ орд газрын ТУЗ-ийн даргаар юу ч мэдэхгүй хорь гаруйхан настай залууг хэн томилж самрууллаа. Н.Алтанхуяг! Уг нь улс орны хувь заяатай холбоотой ийм том ордын ТУЗ-ийн даргаар хал үзсэн, хашир туршлагатай, мэргэжлийн, сайдын зиндааны хүн байх ёстой байсан биш гэж үү?

“Эрдэнэс  Тавантолгой”  компанийн үйл ажиллагааг бүтэн улиралын турш хэн зогсоолоо. Н.Алтанхуяг! Хэрэв нүүрсээ зөөж байсан бол улсын төсөвт мөнгө нь ороод бас өмнө тавьсан өрөө дараад явах л байсан.

“Эрдэнэс Тавантолгой”  компанийн нүүрсийг хэн хямдрууллаа. Н.Алтанхуяг! Сү.Батболдын Засгийн газрын үед Тавантолгойн нүүрсний үнийг тогтоогоод зөөж байсан. Гэтэл Н.Алтануяг гарч ирээд ашиггүй гэрээ хийсэн. МАН-ынхны хийсэн ажил. Гэрээг шинэчилнэ гэж мэдэгдсэнийг олон хүн мартаагүй. Тэгээд гэрээг шинэчлэх гэхэд Хятадууд нь харин “бид өмнө харин ч үнэтэй авч байсан. Одоо нүүрсний үнэ уналаа. Үнээ хямдруул” гээд суучихсан. Эцэст нь аргаа бараад өмнөх Засгийн газрын батласан үнийг өсгөх гэсэн биш бүр бууруулаад нүүрсээ зөөж байгаа. Нуухыг нь авах гэж байгаад нүдийг нь сохлов гэдэг болсон.

“Эрдэнэс  Тавантолгой”  компанийн 17 тэрбумын тендерийг хэн зарлуулж хамаатныхаа 20 гаруй настай охины аж ахуйн нэгжийг шалгаруулж дуулиан дэгдээлээ. Н.Алтанхуяг!

“Эрдэнэс  Тавантолгой”  компанийн махны хангалтыг хэн дураараа хийлээ. Н.Алтанхуяг! Тэрээр өөрийн хувьцаа эзэмшдэг махны аж ахуйн нэгжээрээ “Эрдэнэс Тавантолгойн” ажилчдын хоолны махыг шууд хангадагийг УИХ-ын гишүүн Н.Номтойбаяр нотолсон.

“Эрдэнэс  Тавантолгой”-н толгой компани болох “Эрдэнэс МГЛ”-ийн захирлаар хэн зайрмагны цехийн эзнийг томиллоо. Н.Алтанхуяг! Оюутолгой, Тавантолгойг удирдах хүнээр ердөө л зайрмагны цехийн эзнийг “нутаг” гэсэн шалгуураар томилсон. Уг нь бол мэргэжлийн эсвэл улс төрд юм үзсэн, дэлхийн хаана ч хэнтэй ч ойлголцох хүн байх ёстой биш билүү? Дэлхийн уул уурхайн аваргууд луглагар төслүүд ярьж байхад манай хүний томилсон захирал зайрмагныхаа хэмжээнд л сэтгэнэ шүү дээ.

Энэ мэтээр “Эрдэнэс  Тавантолгой”  компанийг хэн туйлдуулж дампууруулсныг ярих цаг болсон санагдах юм.

Монголын 2.8 сая иргэний хувьцаа эзэмшдэг үндэсний ганц том аж ахуйн нэгжийг хирсэн ийм аалзны сүлжээ байгуулчихаад, тэр чинь аль эрт дампуурчихсан гэж зарлаж байгаа Засгийн тэргүүнд буруу байхгүй юу? Жинхэнээр нь дампууруулсан, дампууруулах бодлогыг нь боловсруулсан бас дампуурлыг зарласан хүн чинь Н.Алтанхуяг өөрөө юм биш үү?