МАН-ыг Ерөнхийлөгчийн сонгуульд ялагдсаны маргааш л “Шинэчилье” хэмээх хөдөлгөөн мэндэлсэн юм. Сонирхолтой нь тэд МАН-ын удирдлагад байгаа залуус байсан нь ихээхэн эсэргүүцэлтэй тулгарсан. Учир нь олон нийт намаа удаа дараа ялагдуулчихаад шинэчлэл ярьж гарч ирэх нь зохижгүй гэж шүүмжилсэн. Энэ шүүмжлэл нь газар авч МАН-ын залуусын хүч суларсан.

Гэвч тэдгээр залуусын төлөөлөл болох МАН-ын “Шинэчилье” хорооны ерөнхий зохицуулагч Ж.Эрдэнэбат, УИХ-ын гишүүн Н.Номтойбаяр тэргүүтэй хүмүүс уйтгартай хэвлэлийн бага хурлаа өчигдөр хийлээ. Сонирхолтой нь “Шинэчлье” хөдөлгөөний эдгээр залуус зорилгодоо хүрсэн гэж ярих боллоо. Ингэхэд тэдэнд ямар зорилго байсан бэ? Үнэхээр зорилгодоо хүрсэн үү? Эсвэл зорилгыг намынхан нь дэмжихгүй болохоор дэмжсэн болж ярьж явна уу?

Тэд удаа дараа МАН-ын Бага хурлыг өнгөрсөн долоодугаар сард хийлгэхээр шаардсан. Гэтэл тэдний үгийг тоогоогүй удирдлагууд нь МАН-ын Бага хурлыг найман сард хийв. Угаасаа Бага хурлаа хийх нь хэнд ч ойлгомжтой байсан л даа.

Шинэчлэгчид бас намын удирдлагуудаа огцрохыг шаардсан. Харин намын удирдлагууд нь Их хурлаараа ажлаа өгнө гээд хөдөлсөнгүй. Угаасаа огцрох нь тодорхой байсан л даа. Тодорхой юмыг шаардсан.

Шинэчлэлийнхэн Их хурлаа есөн сард хийхээр санаачилга гаргасан. Гэтэл намынх нь Их хурлыг арван сард хийхээр болгов. Их хурлаа хийнэ гэж сүүлийн нэг жил ярьж байгаа шүү дээ.

Шинэчлэлийнхэн санхүүгийн тайлангаа гаргаж бидэнд өг гэсэн. Дарга нар нь май гэж өгөх нь байтугай энэ талаар тодорхой ярьсангүй. Нөхцөл байдал ийм байхад тэд бидний шаардлагаар Бага хурал хуралдсан. Бас бидний шаардлагаар Их хурал хуралдахаар болсон гэж ичихгүй ярих юм. Тэгээд бидний шаардлагаар бүх удирдлага огцрохоор боллоо гэж залав. Аль ч улс төрийн хүчин ялагдлаа л бол ажлаа өгдөг дүрэмтэй шүү дээ.

Харин ч МАН-ынхан зориуд тэдний шаардлагын эсрэг хурлуудын товыг тогтоож байгааг шинэчлэгчид ойлгохгүй аж. Өөрөөр хэлбэл шинэчлэгч хэмээх хуучинсаг залуусынхаа эсрэг шийдвэрүүдийг МАН-ын удирдлага гаргасан юм.

Тэгээд ч өнгөрсөн Бага хурлын үеэр “Шинэчлье” хөдөлгөөний илтгэлийг олон хүн тэсч ядан хүлээсэн. Гэтэл шинэ үеийн шинэчлэгч залуусын биш социалист нийгмийн нэгдлийн даргын илтгэл шиг л юм уншсан. Шинэчлэгч залуусын сэтгэлгээ тийм түвшинд байгаа хэрэг. Түүнийг нь сонсох гэж хүлээж байсан Бага хурлын гишүүдэд сонирхолгүй байсан учир суудал дээрээ унтсан гэж эх сурвалж мэдээлсэн. Тэгээд ч Бага хурлын дараах хэдэн өдөр Ө.Энхтүвшингийн илтгэлийг л ярьж байна. Харин “Шинэчлье” хөдөлгөөнийхөн ийм санаа дэвшүүлсэн гэж ярьж байгаа иргэн нэг ч алга. Ийм байж “манай намынхан бидний шаардлага заавараар хөдлөх боллоо” гэсэн утгатай юм ярьж, орон даяар зарлах нь зөв үү?

Намынхаа хуралд “Шинэчлье” хөдөлгөөнийхөн олигтой ч үг хэлж үзэл бодлоо илэрхийлж чадаагүй. Харин ч тэднээс Бага хурлын гишүүд асуулт асууж унтраасан сураг байсан. Намын дарга Ө.Энхтүвшин хүртэл “Та нар хэзээ ажилдаа орох вэ? Хэдийд намынхаа нэрийг дуурсгах вэ?” хэмээн асууж даапаалсныг хаанаас ч уншиж болохоор байна. Ийм байхад “бидний заавараар МАН ажиллаж байгаа”, “бидний төлөвлөгөөний дагуу бүх ажил явж байна”, “бидний шаардлагын дагуу Их хурал хуралдах гэж байна”, “бидний хэлснээр дарга нар огцрох гэж байгаа” хэмээн зарлах “Шинэчлье” хөдөлгөөний залуусыг шинэчлэгч гэж хэлэх хүн олдохоо болилоо.