Ерөнхий сайд Н.Алтанхуяг долоо хоног бүрийн пүрэв гаригт "Ерөнхий сайдын 30 минут" уулзалтыг хийдэг билээ. Өнөөдөр болсон уулзалтаар тэрбээр "Өчигдөр Ерөнхийлөгч, Ерөнхий сайд, УИХ-ын дарга нар уулзан эдийн засгийн нөхцөл байдал, валютын ханш, Монголбанкны зүгээс дорвитой арга хэмжээ авах талаар ярилцсан" тухайгаа онцолсон юм. 

Уг уулзалтаас гарсан бас нэг чиглэл нь иргэдэд цаг үеийн асуудлаар үнэн бодит мэдээллийг өгөх шаардлагатай гэжээ.

Тиймээс холбогдох яамны сайдууд маргаашнаас эхлэн хэвлэлийнхэнд мэдээлэл өгөхөөр болжээ. Тухайлбал Уул уурхайн сайд Д.Ганхуяг маргааш хэвлэлийнхэнд мэдээлэл өгнө. Мөн Сангийн яамны сайд Ч.Улаан бондын зарцуулалтын талаар, Монголбанкнаас валютын ханшны тухай, үүнийг зохицуулахын тулд ямар арга хэмжээ авч буй талаар мэдээлнэ. Эдгээр мэдээллийг хийх цаг өдөр одоогоор тодорхойгүй байгаа аж. Түүнчлэн ирэх долоо хоногийн хоёрдахь өдрийн 14.00 цагт болох “Шинэчилж шийдье” уулзалтаар Засгийн газраас цаг үеийн асуудлаар ямар шийдэл хэрэгжүүлж буй талаар нээлттэй танилцуулах гэнэ.

Мөн өнгөрсөн долоо хоногт аймаг сумдын бүхий л замыг хаягжуулах шийдвэрийг гаргасан тухай Ерөнхий сайд хэллээ. Өнгөрсөн дөрөвдүгээр  сарын 20-нд  Буянт-Ухаад 1775 айлын орон сууцны ажлыг эхлүүлсэн. Тэр цагаас хойш 100 хоногт есөн давхар арван барилгын ажлыг дуусгаж байгааг дурдаад 516 айлын орон сууц ирэх арванхоёрдугаар сарын 21-нд нь ашиглалтад орно гэсэн юм. Тэрээр энэ ажлыг шуурхай, хурдан босч байгаад баяртай байна гэлээ.

Шинэ ургацын ногоо гарсантай холбогдуулан хүнсний ногоог Улаанбаатарт авчран борлуулахад учирдаг хүндрэлийг арилгахын тулд нийслэлийн 28 цэгт шинэ ногооны павилионыг байрлуулахаар болсон гэв. Уг цэг ирэх долоо хоногт эхнээсээ нээгдэхээр болоод байгаа аж. Монгол Улсын Засгийн газрын тэргүүний тогтмол зохион байгуулдаг “Ерөнхий сайд-30 минут” мэдээллийн цагаараа өнөөдөр валютын ханш, орон сууцны хөтөлбөр, бондын асуудлаар дэлгэрэнгүй ярилцсан юм. Дэлгэрэнгүйг удахгүй хүргэх болно.