Сүүлийн үед УИХ-ын гишүүн О.Баасанхүү гишүүний яриа хэвлэлийн хуудсаар дүүрэх боллоо. Хамгийн сүүлд л гэхэд “Н.Энхбаярыг сулалсан нь эдийн засагт нааштайгаар нөлөөлнө” гэж хэлээд онигоонд орчихсон. Түүний хэтийдсэн энэ дүгнэлт аль хэр үнэний ортойг хүмүүс одоо харж байна. Н.Энхбаяр суллагдлаа. Эдийн засаг улам хүндэрсээр байна. Тэр бас энэ удаа Н.Энхбаярыг сулласнаар “Энэ улсад тогтвортой байдал үүсэх нааштай алхам харагдаж байна” хэмээх ээлжит дүгнэлтээ хийлээ. Монгол улсыг тогтворгүй байсан гэж түүнээс өөр дүгнэх хүн аль хэр олон бол доо.

   Энэ мэт үйлдлээс нь болоод УИХ-ын гишүүн О.Баасанхүүг хүмүүс Н.Энхбаярын өмгөөлөгч байсан гэж боддог. Харин тэрээр хэзээ ч Н.Энхбаярын өмөөлөгч байгаагүй гэнэ. Учир нь түүнийг Н.Энхбаярыг өмгөөлөх гэтэл АТГ-ынхан зөвшөөрөөгүй аж. Гэвч өнөөдрийг хүртэл Н.Энхбаярын өмгөөлөгч шиг, улаан хамгаалагч шиг ажилладаг болохоор ард түмэн тэгж андуурах нь зөв шүү дээ. Хамгийн сүүлд л гэхэд “Н.Энхбаяр гэдэг хүнийг улс төрөөс гараагүй гэж боддог. Цагаатгах уу, үгүй юу гэдгийг ярих биш. Угаасаа цагаатгах нь тодорхой. Харин хэр хугацаа орохыг хэлж мэдэхгүй байна. Ер нь тэгээд олигархиудтай хийсэн дайн хэзээ дуусна, тэр үед л Н.Энхбаяр дарга цагаатах байх. Энэ дайн одоо дөнгөж эхэлж байна” хэмээх сүржин мэдэгдэл хийв.
    Нэг хэсэг тэрээр Н.Энхбаярыг суллуулах ажилд идэвхитэй оролцсон. Одоо цагаатгах ажилд ханцуй шамлан орж байгаа аж. Хачирхалтай нь тэрээр Н.Энхбаярын төлөө ажиллах сонирхолоо “дайн” хэмээн тодорхойлох болсон байна. Тэр өмнө өөрийгөө Н.Энхбаярын төлөө дайтаж байсан. Одоо ч дайныхаа ажиллагааг шинэ түвшинд гаргана гэж бодож яваа бололтой.
    Ийнхүү даргыгаа хамгаалах ажиллагаагаа дайн гэж итгэдэг УИХ-ын нэгэн шинэ гишүүн гарч ирлээ. Түүний Н.Энхбаярын төлөөх ариун дайн цаашид яаж үргэлжлэхийг ард түмэн гайхаж, МАХН-ын гишүүд алгаа ташин харах л үлдлээ.