Эдийн засаг хямраад улс орон хүндхэн байна. Гэвч дарга нарын маань гадаад байгаа нууц дансыг олон улсын эрэн сурвалжлах багийнхан илэрүүлэх боллоо. Монголчууд биш шүү! Нилээд хэдэн сарын өмнө манай нэгэн эрхэмийн нууц данс илэрч бөөн дуулиан болсон. Тиймээс ажлаа өгөөд салсан юм.

    Тэгвэл саяхан Монголын сайд байсан хоёр эрхэмийн оффшор бүс дэх нууц данс илэрч дуулиан тарьж байна. Эдгээр эрхэмүүдийн нэг нь БО-ны сайд асан У.Барсболд юм. Тэрээр Н.Энхбаярыг дагаж МАХН-д элсээд намаасаа хөөгдсөн. Нэгэн цагт Богд уулын бүх газрыг зарсан гэж яригдаж байсан. Магадгүй зарах эхлэлийг нь тавьсан хүн. Тиймээс Богд уулын газрыг зарж мөнгөний амтанд орсон байх магадлал өндөртэй. Ингэж манаргаж явахдаа Н.Энхбаярын ээж Бүдханд гуайг зөвлөхөө болгочихсон сэргэлэн эр ээ. Тэгээд л Н.Энхбаярын аргыг олоод бусад хүмүүсийг доромжлоод явсан гэдэг. Дараа нь Ховд аймгийнхаа Хөшөөтийн уурхайг хятадуудтай хамтран ашиглаж эхэлсэн юм. Ингээд Богд уулын газар, Хөшөөтийн нүүрсний уурхай хоёроос идсэн мөнгөө Монголдоо шингээхгүй гадаадад гаргаж хадгалсан нь баригдаж эхэллээ. Сонирхолтой нь тэрээр БНХАУ-ын иргэдтэй хамтран оффшор бүсэд аж ахуйн нэгж байгуулан мөнгөө байршуулжээ. Өөрөөр хэлбэл Монгол нутагтаа итгээгүй тэрээр Монгол хүндээ бас л итгээгүй бололтой. Хамгийн сонирхолтой нь түүний оффшор бүс дэх нууц дансанд хэдий хэмжээний мөнгө байгаа нь одоохондоо нууц байна.

    У.Барсболдоос гадна оффшор бүсэд нууц данстай эрхэм бол Я.Очирсүх юм. Тэрээр АН-ыг эрх барих үед Сангийн сайдаар ажиллаж байсан. АН-ын нөлөө бүхий гишүүдийн нэг юм. Тэр бас л гадаадад мөнгөө доллар болгоод хадгалсан байжээ. Сонирхолтой нь түүний мөнгөний эх сурвалж тодорхойгүй байна. Бас ямар бизнес эрхэлдэг нь ч тун нууцлаг юм. У.Барсболдыг Богд уулын газрыг зарж, Хөшөөтөөс хөлжсөн гэж хардаж болох ч Я.Очирсүхийг яаж хөрөнгөжсөн талаар хардах хэцүү юм. Удахгүй түүний гадаадын нууц дансан дахь мөнгөний хэмжээ тодорхой болсны дараа санхүүгийнх нь эх сурвалжууд яригдах байх. Зарим эх сурвалж Я.Очирсүх сайдын үед “Бороо гоулд”-ын тогтвортой байдлын гэрээнд нэмэлт өөрчлөлт хийгдсэн байх магадлалтай. Хэрэв үнэн бол энэ асуудлыг шалгах ёстой гэж ярих болсон байна. Ямар ч гэсэн сайд асангуудын нууц дансууд илэрсээр байна. Ийнхүү Монгол Улсын сайд байсан гурван хүний гадаад дахь нууц данс ил боллоо.

   Дээр үед “Уут уут мөнгөөр улсаа худалдсан сайдууд”, “Богц богц мөнгөөр Богдоо худалдсан сайдууд” гэж жирийн иргэд дуулдаг байсан даа. Одоо харин монголчууд бидний өмнө тэгж дуулах цаг дахин ирлээ.

   Хамгийн гол нь одоо хувийн бизнес эрхэлж байгаа сайдуудтай ямар хариуцлага тооцох нь тодорхойгүй байна. Юуны өмнө энэ мөнгөний эх сурвалжуудыг АТГ-ынхан шалгаж эхлэх биз. Дараа нь мөнгөний эх сурвалжаа тайлбарлаж чадахгүй бол хариуцлагын асуудал яригдах нь гарцаагүй болно.