Засгийн газрын тэргүүн гэж бүхий л хариуцлагаас бултсан нэг хүн бий болов. Улс орны одоогийн доройтол өмнөх Засгийн газрын буруугаас болсон гэж удаа дараа тайлбарлана. Өөрөө хамтран бодлого гаргаж байсан Тэргүүн шадар сайд нь байсан байж шүү! Ийм хандлага, зан ааштай хүмүүсийг монголчууд “түгжилдэх” гэж нэрлэдэг. Тэгвэл энэ Засгийн газрын тэргүүн “түгжилдэх” аргад нилээд сайн суралцах боллоо.
    Бас Н.Алтанхуяг олон түмний сонирхсон ээдрээтэй асуултаас бултана. Салбарын сайдууд хариулна гэж тайлбарлана.
    Санхүүгийн салбар хүндэрч “Хадгаламж” банкны асуудал яригдсан. Тэгэхэд “Хадгаламж банкны хувьд Засгийн газрын асуудал биш. Банкийг  хянадаг  үйл  ажиллагаа  хариуцдаг  газар  нь  Төв банк” хэмээн бултсан юм.

    Хамгийн сүүлд л гэхэд валютын ханш чангараад буурахгүй байна. Энэ үед сэтгүүлчид Засгийн тэргүүнээс уг асуудлын талаар байр сууриа илэрхийлэхийг хүссэн юм. Харин Засгийн газрын маань тэргүүн “Ханшийн асуудлыг Монгол банк хариуцна. Наадмын дараа хэсэг үйл явдал зэрэгцсэнтэй холбоотой түр зуур савласан байх” хэмээн хэнэггүйтсэн юм. Түр зуурын савлалт нь одоо ямар болчихоод байгааг иргэн бүхэн мэдэж байна. Валютын ханшийн ийм өсөлт Н.Алтанхуягт түр суурын савлалт шиг санагдаж байгаан болов уу? Эсвэл энэ юу ч биш бүр илүү өснө гэсэн санаа юм болов уу? Ойлгоход төвөгтэй л юм. 
 
    Н.Алтанхуягийн энэ мэт үйлдлээс нь харахад улс орондоо хоноцын сэтгэлээр хандаад байгаа юм шиг сэтгэгдэл төрөх боллоо. Валютын бодлогыг Монгол банк тодорхойлдог нь үнэн л дээ. Гэхдээ Монгол Улсын Засгийн газрын тэргүүн асуудалд ийм хүйтэн хөндий хандаж болохгүй. Үнэндээ бол энэ улсын мөнгөн дэвсгэрт үнэгүйдэх том асуудал байтугай жирийн нэгэн жижүүрийн асуудал хүртэл Засгийн тэргүүний анхааралд байх ёстой шүү дээ. Өмнөх Ерөнхий сайдууд бүгд л муу муухайгаараа дуудуулж байсан ч гэсэн Н.Алтанхуяг шиг “өмнөхөөсөө боллоо”, “салбарын сайдууд мэднэ”, “Засгийн газарт хамаагүй” гэх мэтээр асуудал бэрхшээлийн хүнд хэцүүгээс бултаж байгаагүй шүү дээ.
    Ямар ч гэсэн Н.Алтанхуяг үндэсний мөнгөн дэвсгэрт үнэгүйдэх, валютын ханш өсөх нь Засгийн газарт хамаагүй гэж тодорхой зарлаж байна. Харин ард түмэн тэгж бодох болов уу? Үүнтэй зэрэгцээд Монгол банкны зүгээс “ер нь эдийн засгийн энэ байдал Засгийн газрын ургашгүй байдлаас болсон шүү” гэж битүү хатуугаар сануулж Н.Алтанхуягт хариуг нь өгөв. Засгийн газар Монгол банкны энэ харилцааг анзаарсан УИХ-ын гишүүн Р.Амаржаргал “Валютын ханш 1600 давж донсолгоон үүсгэв. Засгийн газар нь үнэ ханш Монгол банкны асуудал хэмээн бултаж, Монголбанк нь бодит салбарын урагшгүй байдлаас санхүүгийн “ханиад” сэдрэв хэмээн Засгийн газар руугаа чихэв” хэмээн дүгнэлт хийсэн юм.

    Ийнхүү төрийн байгууллагууд эдийн засгийн хүндрэлийг бие бие рүүгээ чихэх болов. Засгийн тэргүүн нь өмнөхөөсөө бурууг хайдаг байсан бол одоо хажуу дахь институцынхандаа нялзаадаг шинэ аргыг хэрэглэж эхлэв. Ийм хариуцлагагүй  Ерөнхий сайдтай байх хэрэг байна уу даа!