АМГ-ын Кадастрын хэлтсийн дарга, Уул уурхайн сайд Д.Ганхуягийн найз, сувилагч мэргэжилтэй Н.Чинбаатар гэгч ашигт малтмалын лицензийн хэргээр олны анхааралд өртөөд байна. Энэ албан тушаалд Уул уурхайн сайдын хувийн компанид олон жил ажилласан, 9 жил туслах нь явсныхаа шан, гавьяагаар очлоо гэх хэл ам тасрахгүй байсан бол одоо газрын лиценз хууль бусаар олгосон хэрэгт орооцолдоод байна. Түүнийг Д.Ганхуяг сайдын итгэлтэй хүн, хууль бус наймааг хянаж чадна хэмээн Кадастрын албанд томилсон тухай Уул уурхайн сайдын зөвлөх Ч.Түмэнбаяр тайлбарласан байдаг.

   Тэрбээр "аав"-ынд очоод байгаа өмнөх АМГ-ын дарга Д.Батхуягийн хууль бусаар олгосон, дараа нь хүчингүй болсон 108 лицензийн нэг “Өсөх зоос” компанийн хайгуулын лицензийг  ашиглалтын лиценз болгох зөвшөөрөл өгснөөс хэрэг манджээ. Тодруулбал, Өмнөговь аймгийн Гурван тэс сумын нутагт орших  ХВ-015177 дугаартай 960.39 га талбай бүхий тусгай зөвшөөрлийг хайгуулын зориулалтаар 2009 оны аравдугаар сарын 5-нд  анх “Өсөх зоос” ХХК-д олгож байж. Энэхүү  ХВ-015177 тусгай зөвшөөрлийг гурван  шатны шүүхээс хүчингүй болгоод байсан ч 2013 оны тавдугаар сарын 27-ны өдөр ашиглалтын зөвшөөрөл болгон өөрчилж, “Өсөх зоос” компанид өгчээ. Хачирхалтай нь 2013 онд “Өсөх зоос” ХХК 15177Х, 15178Х тусгай зөвшөөрлийн эрхийг сэргээхгүй байна, энэ талбайд Ашиглалтын тусгай зөвшөөрөл олгохгүй байна хэмээн АМГ-ын Кадастрын хэлтсийг буруутган Нийслэлийн Захиргааны хэргийн шүүхэд нэхэмжлэл гаргасан байх юм.

   Гэтэл Н.Чинбаатар 4 дүгээр сарын 11-ний өдөр Нийслэлийн Захиргааны хэргийн шүүхэд Өсөх Зоос ХХК-ийн гаргасан нэхэмжлэлийг бүрэн хүлээн зөвшөөрч буй талаар хууль бус тайлбар гарган өгсөн байх ба Нийслэлийн Захиргааны хэргийн шүүгч Д.Дамдиндорж Н.Чинбаатарын энэ тайлбарыг үндэслэн Хариуцагчийн зөвшөөрлийг батлах захирамж гаргажээ.

  Ингэж Ерөнхийлөгчийн сонгуулийн өмнөхөн “Өсөх зоос” компанийн хүчингүй болсон хайгуулын лиценз хэрхэн ашигт малтмалынх болоод хувирчихсан нь цаанаа учиртай.
   Сонирхолтой нь  энэ “Өсөх зоос” компани нь 2013 оны Ерөнхийлөгчийн сонгуулиар шуугиан тариад авсан  “цэвэр гартай” Б.Бат-Эрдэнэ гишүүний мэдлийнх гэдгийг олон хүн анзаарахгүй өнгөрсөн бололтой. Аваргын эгчийнх нь хүүхэд болох Ф.Баатарсүхийн 24 хувийг нь эзэмшидэг энэ компани цаагуураа Б.Бат-Эрдэнэ гишүүнийх болохыг сэтгүүлчид баримтаар нотолсон байдаг. Ф.Баатарсүх нь ийм компаний хувь эзэмших байтугай өөрийн гэсэн орон байргүй “Аварга” дээд сургуулийн дотуур байранд амьдардаг байсан гэх. Мөн “Өсөх зоос” компанийн захирал Ч.Чинбат нь 1992 оноос Б.Бат-Эрдэнэ гишүүнтэй хамт ноос, ноолуурын наймаа эрхэлдэг байсан тухай дурджээ.

  “Өсөх зоос” компани ийнхүү Б.Бат-Эрдэнэ аваргын буянаар давуу эрх эдэлсэн нь Кадастрын хэлтсийн дарга Н.Чинбаатарын өөрийнх нь хүсэлт ч биш байсан бололтой. Өөрөөр хэлбэл Д.Ганхуяг сайд, Б.Бат-Эрдэнэ аварга хоёр өөрсдийн гарын хүмүүсээр дамжуулан ийнхүү наймаа хийсэн болох нь тодорч эхэллээ. Энэ хоёр эрхэм саарал ордонд танилцсан “нэг ангийнхан” биш, бүр олон жил наймаагаар ч тэр найраагаар ч тэр нөхөрлөсөн хүмүүс гэдгийг цөөнгүй хүн хэлнэ. Ерөнхийлөгчийн сонгуулийн өмнө сайд болсон найз Д.Ганхуяг нь Б.Бат-Эрдэнэ аваргад лицензийг нь хүчинтэй болгож тусалсан нь энэ байжээ. Муу л юм бол ар талын хар овоохой гэдэг шиг муухай бүхнээ МАН руу чихээд байсан бол энэ удаа албан тушаалаа урвуулан ашигласан хэргийн цаана Шинэчлэлийн засгийн газрын сайд нь холбогдоод эхэллээ. Нам доторх бүлэглэлүүд гэж ярьдаг байсан бол нам дамжсан далд сүлжээ энэ мэтээр илэрч эхлэх бололтой.