Эдийн засгийн байдал хүндэрсэн нь улс төрчдийг хөдөлгөөнд оруулж эхэлжээ. Сөрөг хүчин ч угаасаа шүүмжлэх л гэж асуудлыг хөндөж байгаа. Харин АН-ын дотоод бүлэглэлүүд Засгийн газрыг огцруулах асуудлаар яриагаа албан ёсоор эхлүүлжээ.

Хэдийгээр Н.Алтанхуягийг огцруулах асуудал эртнээс яригдсан ч үр дүнгүй байсан. Сөрөг хүчин ч энэ асуудлыг УИХ-д өргөн бариад чадаагүй. Учир нь Н.Алтанхуягийн Засгийн газарт бүлэглэлүүдийн төлөөлөлийг тун дажгүй оруулсан учраас хэл амаа ололцоод байсан хэрэг. Харин одоо байдал өөрөөр эргэжээ.

Нэгэн цагт Н.Алтанхуягийг өмөөрч байсан хүмүүс, эдийн засгийг бүр мөсөн хэвтүүлж болохгүй гэж болгоомжилсон хүмүүс, хөрөнгө оруулагчид яагаад гараад явав гэж эргэцүүлсэн хүмүүс дахин нүүдэл хийх хэрэг гаржээ. Тэд нэгдүгээрт Н.Алтанхуяг ажлаа хийж чадахгүй байна. Нэг бус удаа болчимгүй мэдэгдэл хийсэн. Удирдлагын энэ уйваагүй байдлыг дагаад АН-ын нэр хүнд эрчимтэй унаж байгаа нь судалгаагаар нотлогджээ. Нөгөө талаар Эдийн засгийн хөгжлийн болоод Уул уурхайн сайдуудаас хөрөнгө оруулагчид дайжиж байгааг АН-ынхан хэтэрхий оройтож ойлгожээ. Угаасаа уул уурхайн салбарын “дайсан” мэтээр яригдаж, газар шорооны төлөө цогтой тэмцэгч эх орончид, харийнхныг хөөн зайлуулах ёстой гэсэн үзэл сурталтнуудаар гол салбарын сайдаа болгосны горыг АН-ынхан төдийгүй Монгол даяараа амсаж эхлэв. Хөрөнгө оруулагчид тэдэнтэй ширээний ард суух сонирхолгүй байна. АН-ынхан ч дэмий томилгоо хийснээ эдийн засгаа унагаж аваад мэдрэв. Тэгээд хөдөлж эхэлжээ.

 Ерөнхий сайд асан, УИХ-ын гишүүн Р.Амаржаргалын улс орны эдийн засгийн байдлын талаар дүгнэсэн сүүлийн нийтлэл ч ташуур болов. Угаасаа Р.Амаржаргал энэ Засгийн газрыг огцрох ёстой гэж эртнээс мэдэгдэж байсан ч нам дотроо ганцаардаад чадахгүй байсан юм. Харин одоо Ц.Элбэгдоржийн хэлдэгээр “олуулаа” болжээ.

Засгийн газрыг огцруулах Р.Амаржаргалын сонирхол дээр УИХ-ын гишүүн Ж.Бат-Зандан нэмэгдэж байгаагаа албан ёсоор цахим хуудасаараа зарлав. Тэрээр “Амаржаргал гишүүний ярьж буй Засгийн газарт бүтцийн өөрчлөлт хийх мэргэжлийн Засгийн газар байгуулах ёстой гэсэн санааг дэмжиж байна” хэмээн байр сууриа илэрхийлэв. Н.Алтанхуягийн Засгийн газрын огцруулах АН-ын гишүүд хоёр зүйлийг ярьж эхлэв. Нэгдүгээрт Засгийн газарт бүтцийн өөрчлөлт хийх ёстой гэж үзэв. Энэ бол хэцүү л дээ. Засгийн газарт бүтцийн өөрчлөлт хийнэ гэдэг бол хуулинд гар хүрэх хэрэгцээ үүснэ. Засгийн газрын одоогийн бүтцийг задлаад дахин яамдыг шинээр байгуулна гэсэн үг. Нэгэнт анхнаас нь цомхон хийж чадаагүй байж одоо ингэх ч төвөгтэй. Санаа нь бол зөв. Яагаад гэвэл улс орны эдийн засаг хүндрээд байхад “зуун яамаанд жаран ухна” гэгчээр замбараагүй олон яамтай болсон. Бүлэглэлүүддээ л албан тушаал өгөх гэж Н.Алтанхуягийн хийсэн ажил. Тухайлбал өнгөрсөн Засгийн газрын сайд Ё.Отгонбаяр, Д.Зоригт, Ц.Дашдорж нарын яамыг 2-3 хуваасан. Өөрөөр хэлбэл нэг хүний удирдаж байсан яамыг задлаад 2-3 сайд толгойлох болсон. МАН-ын нэг хүний хийж болж байсан ажлыг АН-ынхан чадваргүй туршлагагүй гээд гуравуулаа хийхээр шийдсэн. Харин одоо энэ алдаагаа засья гэж байх шиг байна. Хоёрдугаарт АН-ынхан энэ Засгийн газрыг мэргэжлийн бус Засгийн газар гэж өөрсдөө тодорхойлж байна. Ямар Засгийн газрыг мэргэжлийн Засгийн газар гэж хэлдэгийг мэдэхгүй. Мэргэжлийн ба мэргэжлийн бус Засгийн газар гэж байдаггүй. Энэ бол зүгээр л Засгийн газрыг хөдөлгөхөд хөшүүрэг болох үгс. Санаа нь бол мэргэжлийн хүмүүсээр салбаруудаа удирдуулья гэх гээд байгаа байх. Анхнаасаа мэргэжлийн хүмүүс томилоогүй өөрсдийнх нь л буруу шүү дээ. Зайрмагны цехийн эзнийг Оюутолгой, Тавантолгойн зэрэг томоохон ордын Монголын хувийг эзэмших үндэсний том аж ахуйн нэгж болох “Эрдэнэс МГЛ”-ийн захирлаар, АМГ-ын даргаар шүдний эмчийг, Цөмийн энергийн газрын даргаар луйварын хэрэгээр хуулийн байгууллагаар шалгагдаж байсан залууг томилохыг ямар эрүүл шийдвэр гэхэв. Энэ мэт ах дүү, найз нөхөд гэсэн шалгуураар шигшигдсэн үй түмэн томилгоог дурдаж болно.

Засгийн газраа огцруулахаар ил гарч ирсэн Р.Амаржаргал, Ж.Батзандан нараас гадна Д.Арвин, Г.Баярсайхан зэрэг гишүүд байгааг эх сурвалж мэдээлэв. Мөн МоАХ, Ардчилсан хүчний холбоо, Шонхор фракцийн зарим гишүүдийн сонирхол нэмэгджээ. Ингээд үндсэндээ Н.Алтанхуягийг хөдөлгөхөөр АН-ын араваад гишүүдийн нэгдсэн байна. Тэдний тоон дээр сөрөг хүчин МАН-ын 26 гишүүн, Н.Энхбаярын намын үүргээ гүйцэтгэсэн гишүүд, бие даагч С.Ганбаатар нарыг нэмбэл одоогийн Засгийн газрыг хөдөлгөх хангалттай хүч бий боллоо.