Саяхан Хууль зүйн сайд Х.Тэмүүжин “Ё.Отгонбаярын болон Н.Хүрэлбаатарын хэргүүд замхраагүй. Замхруулах ч үгүй” гэсэн утгатай мэдээллийг хийсэн. Учир нь эдгээр сайд асангуудын хэргүүд анх дуулиан тарьж эхлээд зуны налгар өдрүүдэд чимээгүй болчихсон юм. Тэгэхээр л ард иргэд энэ хэргүүд замхарлаа гэж хардаад, тэр нь Хууль зүйн сайдын чихэнд хүрээд ингэж мэдэгдэхэд хүргэсэн байх.

Эрүүл мэндийн сайд асан Н.Хүрэлбаатарын хэрэг бол тодорхой. Эзэн холбогдогчид нь ил болсон. Мөнгөний хэмжээ нь тодорхой. Бас Ё.Отгонбаярынхтай харьцуулахад бага мөнгө. Тиймээс асуудал нь түргэн шийдэгдэнэ.

Харин Ё.Отгонбаярынх л ихээхэн ээдрээтэй гэж удаа дараа хүчний байгууллагынхан мэдэгдээд байгаа. Учир нь маш олон данснууд байгаа. Тэр бүхэн рүү орсон мөнгөнүүдийг шилжүүлсэн дансаар нь тодруулах ажил явагдаж эхэлсэн. Зарим дансуудыг нээсэн банкууд нь дампуурчихсан. Бас шилжүүлсэн зарим хүмүүсийн нэр хаяг нь тодорхойгүй. Өөрсдөө болохоор тодорхой мэдээлэл өгдөггүй гээд цагдаагийн байгууллагынхны ур ухааныг сорьж байгаа сурагтай.

Саяхан Ё.Отгонбаярын хэрэгт холбогдуулан “Bloomberg” телевизийн сэтгүүлч Э.Долгионыг нэг хоног саатуулаад гадуур байцааж байгаа. Учрыг тодруулбал тэрээр өмнө БСШУЯ-ны Гадаад хамтын ажиллагааны газрын даргаар ажиллаж байсан. Бас Ё.Отгонбаярын гэх “шошготой” залуу аж. Тэгэхдээ л тэр их мөнгөнүүдийнх нь зарим хэсэгт гар дүрэлцээд шалгуулах үндэслэл болсон бололтой. Мөн тэрээр БСШУЯ-ны газрын дарга байхдаа БНХАУ-ын хамгийн алдартай их сургууль болох Цинхуа Их сургуульд сурахаар явсан сурагтай. Тэр мөнгө хаанаас гарсан бэ гэж хүчний байгууллагынхан сонирхсон гэж яригдах болсон байна. Ямар ч байсан түүнийг Ё.Отгонбаяр явуулжээ.

Үүнээс гадна МАН-д байдаг Ё.Отгонбаярын гэх залуусыг хүчний байгууллагынхан сонирхож эхэлсэн гэж эх сурвалж мэдээллээ. Учир нь Ё.Отгонбаярт гар хөлийн үзүүр болгодог олон залуус байсан бололтой. Тэдгээр залуусын зарим нь Ё.Отгонбаярын тун итгэлтэй шадар цэргүүд байсан учир зуучлалын үйл ажиллагаанд оролцсон байж магадгүй гэж зарим иргэд гомдол гаргасан сурагтай. Харин одоо тэдний зарим нь гадаад явсан аж. Тэгээд ч Ё.Отгонбаяр БСШУ-ны сайдын хувьд МАН-ынхаа оюутан, залуучуудтай тун ойрхон нягт ажиллаж байсан гэнэ. Мөн түүний яамны олон газрын дарга залуус байжээ. Өөрөөр хэлбэл тэр залуучуудыг дэмжихийн зэрэгцээ хөл гарын үзүүрт гүйлгэж байсан эсэхийг хуулийнхан нягталж эхэлжээ.

Хэрэв энэ үйл явц үнэн бөгөөд батлагдах юм бол цөөнгүй залуус Ё.Отгонбаяр сайдын хэрэгт холбогдож магадгүй аж. Ямар ч гэсэн түүний ээдрээтэй хэрэгүүдийг хүчнийхэн нягталж байна. Эх сурвалжийн мэдээлж байгаагаар бол Ё.Отгонбаярын асуудал одоогийн яригдаж буй дуулиант хэрэгүүдээс хамгийн удаан хугацаанд шалгагдахаар байгаа гэнэ.