Улс орны эдийн Засгийн нөхцөл байдал доройтсон нь олон хүнд янз бүрийн санаачилга төрүүлжээ. Тэдний нэг хэсэг нь МАН-ын одоогийн удирдлага гэж эх сурвалж мэдээлэв. Учир нь МАН-ын одоогийн удирдлага бүрэн бүрэлдэхүүнээрээ огцрохын өмнөхөн Н.Алтанхуягийн Засгийн газрыг АН-ынхантай хамтарч огцруулах сонирхолтой байгаа аж. Тэгээд хамтарсан Засгийн газар байгуулах туйлын хүсэлтэй гэнэ. Үүний эхлэл ч тавигджээ. Саяхан МАН-ын Ерөнхий нарийн бичгийн дарга Г.Занданшатар, Нарийн бичгийн даргын ажлаа өгнө гэж мэдэгдсэн Ж.Мөнхбат хоёр УИХ-ын чуулганыг яаралтай хуралдуудахыг шаардаж хэвлэлийн бага хурал хийсэн нь учиртай байжээ.

УИХ-ын гишүүн бус хүмүүс ингэж тодорсон нь нэг л эргэлзээтэй байсан гэж ажиглагчид дүгнэсэн. Үнэхээр тэд чуулганыг яаралтай хуралдуулж улс төрийг үймүүлэх гэж яарсан байна. У.Хүрэлсүхийн удирдлагад байдаг хоёр залуу яаран сандран ингэж мэдэгдсэнийг хүмүүс хоёр янзаар хүлээн авчээ. Нэгд тэд Засгийн газартай хариуцлага тооцож, шинэ Засгийн газарт орох. Хоёрт У.Хүрэлсүхийн залуусын зарим нь шалгагдаж магадгүй учир хамтарсан Засгийн газарт орчихвол учраа ололцоно гэж тооцоолсон бололтой.

Үйл явдал үүгээр дууссангүй. Энэ долоо хоногт УИХ-дахь МАН-ын бүлгийн гишүүд хуралдаж чуулганыг яаралтай хуралдуулах шаардлагыг З.Энхболдод өргөн барьсан. Тэгэхдээ шаардлагад хэдэн зүйл тусгасны нэг нь “Валютын нөөц бараг хоёр дахин багассан, төгрөгийн ханш тасралтгүй буурч буйн хариуцлагыг Засгийн газар, Монгол банкны удирдлагатай тооцох” хэмээн онцлон дурдсан юм. Энэ шаардлагаас харвал МАН Засгийн газартай хариуцлага ярих хүсэлтэй байна. Харин Засгийн тэргүүн нь аль хэдийн “вальютын ханш өссөн нь Засгийн газарт хамаагүй” гэсэн утгатай мэдэгдэл хийсэн юм.

Ийнхүү МАН-ын ээлжит бус чуулган хуралдуулах гэж байгаа нь улс орны эдийн засгийн нөхцөл байдлыг авч хэлэлцэх нэрээр дахин АНМАН болохыг зорьж байгаа бололтой. Ийм төлөвлөгөөг ажлаа өгөх гэж буй МАН-ын одоогийн удирдлагууд боловсруулсан гэж эх сурвалж мэдээллээ.

Харин МАН-ын огцрох гэж буй дарга нар  “улс орны эдийн засгийн хүнд байдал”-аар халхавч хийн Засгийн газарт орох хүсэлтэйг тууштай эсэргүүцэгч хүмүүс бас энэ намд байгаа аж. Хэрэв МАН Засгийн газарт орвол нэгийгээ үзэлцэнэ гэсэн хатуу байр суурьтай байгаа гэнэ. Учир нь тэд “МАН-ыг сөрөг хүчин бол гэж ард түмэн сонгосон. Тэгээд ч өнгөрсөн хугацаанд АН уйваагүй үйлдэл дэндүү олныг хийсэн. Тийм хүмүүстэй хамтрахгүй. Харин 2016 оны сонгуулиа харж ажиллах ёстой. АН өндөр өсөлттэй байсан эдийн засгийг нураасныхаа хариуцлагыг өөрсдөө л үүрэх учиртай” гэсэн тайлбаруудыг бэлдсэн сурагтай. Ийнхүү УИХ-ын чуулганыг яаралтай хуралдуулах хүсэлтэй байгаа сөрөг хүчин хоорондоо бас ингэж хуваагджээ. Чуулган хуралдсан, хуралдаагүй тэдний санаанууд удахгүй цуварч олон зүйлийг тодорхой болгоно.