Эдийн Засгийн нөхцөл байдал дордоход хоёр сайдын нөлөөлөл гол үүрэг гүйцэтгэсэн гэж ажиглагчид дүгнэж байна. Нэг нь Уул уурхайн сайд Д.Ганхуяг, нөгөө нь Эдийн засгийн хөгжлийн сайд Н.Батбаяр.

    Энэ хоёр эрхэм гадны хөрөнгө оруулагчдын эсрэг тууштай хатуу байр суурь баримтлагчид. Уул уурхайн сайд Д.Ганхуяг Оюутолгойн хөрөнгө оруулалтын гэрээнд нэмэлт өөрчлөлт оруулахыг дэмжиж ирсэн. Гэвч сайд болсныхоо дараа таг болсон. Мөн “Оюутолгойн хөрөнгө оруулалтын гэрээнд нэмэлт өөрчлөлт оруулж чадахгүй бол огцорно” гэж ярьсан тухай шуугиан хэвлэлийн хуудсыг чимэглэж байсан удаатай.

    Д.Ганхуяг сайдын иймэрхүү байр сууринаас болоод хөрөнгө оруулагчид Монголыг орхиж эхэлсэн. Өнөөг болтол ямар нэгэн арга хэмжээ аваагүй учир ихэнхи хөрөнгө оруулагчид гарч эцэстээ Оюутолгой үйл ажиллагаагаа зогсооход хүрлээ.

    Мэдээж үүний хариуцлагыг салбарын сайд, хөрөнгө оруулагчдыг үргээсэн Д.Ганхуяг хүлээх нь гарцаагүй. Өнөөдөр Оюутолгойд ажиллаж буй хүмүүсийн 80 орчим хувь нь байр машины зээлтэй гэсэн судалгаа гарсан. Бас Оюутолгойг дагасан олон аж ахуйн нэгж үйл ажиллагаагаа зогсоосон. Тэдгээр ажиллагчид ч гэсэн байр машины зээлтэй. Нөхцөл байдал ингэж хурцдаад байхад Уул уурхайн “эх оронч” сайд ямар нэгэн байр суурь илэрхийлэхгүй байна. Тайлбар хийхгүй байна. Бас найз Б.Бат-Эрдэнэтэйгээ хамтран лицензийн наймаа хийсэн шигээ суугаа тухай яриа чих дэлсэх болов.

    Харин Эдийн засгийн хөгжлийн сайд Н.Батбаяр 68 хувийн татварыг санаачилж хөрөнгө оруулагчдыг ихээхэн үргээсэн. Бас 68 хувийн алтны татвар нь далд эдийн засгийг дэмжсэн юм. Үр дүнд нь Монголын ихэнх алт хулгайн замаар татвар төлөлгүй бултах аргатай болсон. Мэдээж Монголын эдийн засаг хохироод үлдсэн.

    Ийнхүү Монголын эдийн засгийн хөгжлийг тодорхойлох хоёр гол яамных нь сайдаас гадны хөрөнгө оруулагчид айгаад гараад явчихлаа. Тоглоомтой юм шиг өчнөөн олон боловсон хүчинтэй байж ийм сонголт хийсэн АН-ын л буруу. Ийм сайдуудтай болсныхоо хариуцлагыг АН ч, ард түмэн ч хүлээхээр боллоо.