Амралтын өдрүүдэд уулын баяжуулах “Эрдэнэт” үйлдвэрийн 35 жилийн ойн баяр болж өнгөрөв. Монголыг тэжээж байгаа ганц том үйлдвэр учир сүртэй тэмдэглэхээр бэлджээ.

    Гэвч уригдсан зочид цөөн ирсэн нь ихээхэн анхаарал татлаа. Эсвэл зөвхөн АН-ынхныг онцолж уриад өмнө удирдаж байсан хүмүүсээ урихгүй байхаар шийдсэн юм уу гэсэн сэтгэгдэл төрөхөөр байв. Ийм яриа ч Эрдэнэтчүүдийн амны зугаа байсан гэж эх сурвалж мэдээлэв. Учир нь уулын баяжуулах “Эрдэнэт” үйлдвэр 35 жилийн ойн арга хэмжээнд УИХ-ын гишүүн М.Батчимэг, Ерөнхийлөгчийн Тамгын газрын дарга П.Цагаан, "Эрдэнэт" үйлдвэрийн ерөнхий захирал асан, Улсын ерөнхий прокурор Д.Дорлигжав, Төрийн өмчийн хорооны дарга Д.Цогтбаатар зэрэг албаныхан оролцов. Энэ аймгаас “Эрдэнэт” үйлдвэрийнхэний итгэлийг дааж сонгогдсон УИХ-ын дэд дарга Л.Цог, УИХ-ын гишүүн О.Содбилэг хоёр бараагаа ч харуулсангүй. Зарим хүмүүсийн яриагаар бол эдгээр гишүүддээ урилга өгөөгүй учир очоогүй гэсэн цуурхал тарж. Хэрэв үнэн бол энэ нь халуухан л ярианы сэдэв болох байх даа.
    Мөн “Эрдэнэт” үйлдвэрийн захирал асан Ч.Ганзориг ганцад хоригдсон байгаа. Уг нь тэрээр 35 жилийн баяртаа эхэлж бэлдүүлж байгаад ажлаа өгсөн юм. Харин Ч.Ганзоригийн үед томилогдсон дэд захирлуудаас хэн ч ирээгүй гэнэ.  Бас л тэдэнд урилга өгөөгүй бололтой. Ингээд үндэсний ганц том үйлдвэрийн баяраа нэг талыг барьсан байдалтай тэмдэглэсэн нь олон иргэдийн сэтгэлд нийцээгүй гэж Эрдэнэт даяараа л ярьж байна. Өмнөх хүмүүс муу удирдлага байж болно. Гэхдээ хамтдаа баярын ширээний ард суухгүй байна гэдэг сайхан үлгэр дууриал биш гэх аж.
    Харин өмнөх удирдлагуудаа гадуурхсан энэ ойн үеэр шагналыг бол бөөнджээ. “Эрдэнэт” үйлдвэрийг хөдөлмөрийн гавьяаны улаан тугийн одонгоор шагнажээ. Үүнийг иргэд оройтсон шагнал гэж тодорхойлжээ. Мөн Аж үйлдвэрийн гавъяат ажилтнаар 3, Алтан гадас одонгоор 37, Хөдөлмөрийн хүндэт медалаар 41, Найрамдлын медалаар 7, Тэргүүний уурхайчин хүндэт тэмдгээр 114, “Эрдэнэт” үйлдвэрийн 35 жилийн ойн хүндэт медалиар 3466, Хөдөлмөрийн алдар хүндэт тэмдэгээр 98 хүнийг шагнасан байна. Бас “Эрдэнэт” үйлдвэрийн ихэнх ажилчдад нэг саяас дээш төгрөгийн мөнгөн урамшуулал олгосон аж. Мэдээж бөх барилдуулж, шоу зохион байгуулж, “Хурд” хамтлаг, дуучин Баярцэцэг, Outlaw зэрэг хамтлагууд оролцжээ.
    Ийнхүү Монголын ард түмнийг тэжээн тэтгэж ирсэн уулын баяжуулах “Эрдэнэт” үйлдвэрийн 35 жилийн ой сонин дүр төрхтэй болж өнгөрөв. Удахгүй энэ наадмын өөр сонин хачин нэг хэсэгтээ л яригдахаар болов.