Өнөөдрийн уулзалтаар Ерөнхий сайд Н.Алтанхуяг өнөөгийн эдийн засгийн нөхцөл байдлын талаар голчлон мэдээлэл хийлээ. Тэрээр энэ талаар ярихдаа “Эдийн засгийн өнөөгийн нөхцөл байдал хүнд байгааг эдийн засагчид олон талаас нь тайлбарлаж байна. Нийгэм, эдийн засгийн байдал ямар байгаа талаархи статистик судалгаа гарсан. Үүнд тулгуурлаж, эдийн засгийн асуудлыг би таван зүйлээр ялгаж хэлмээр байна. Эдийн засгийн өсөлт энэ оны эхний зургаан сарын байдлаар 11,3 хувиар өссөн. Инфляци буюу үнийн өсөлт 8,3 хувьтай байгаа. Өмнөх онд 14 хувь хүртэл өссөн байсан. Өөрөөр хэлбэл, инфляци хоёр дахин буурсан гэсэн үг. Гурав дахь үзүүлэлт нь ажлын байр. Шинэчлэлийн Засгийн газар Хөдөлмөрийн яамыг тусад нь байгуулснаар ажлын байраар хангах асуудалд түлхүү анхаарсан. Үүний дүнд энэ жил 37 мянган ажлын байр бий болсон. Тиймээс эдийн засгийн төлөв байдлыг тайлбарлаж болох таван үзүүлэлтийн гурав нь нааштай үр дүнтэй байгаа гэж ойлгож болно. Харин үлдсэн хоёр үзүүлэлтэд сөрөг хандлага ажиглагдсан. Тэр нь гадаадын хөрөнгө оруулалт, валютын ханш. Хөрөнгө оруулалт саарсан учир нь шалтгаан нь Оюутолгойн оруулах ёстой хөрөнгө оруулалт дууссан. Одоо шинээр буюу гүний уурхайд хөрөнгө оруулалт хийх асуудлыг ярилцаж байгаа” гэв. Бас  Хөрөнгө оруулалт буурсан бас нэг шалтгаан нь хөрөнгө оруулалтыг хязгаарласан гэсэн сүүлийн хоёр жил ярьсан яриа дуусаагүй байгаатай холбоотой. Урт нэртэй хуулийн хүрээнд дундаж хөрөнгө оруулалттай компаниулын үйл ажиллагаа зогссон зэрэг хүчин зүйл нөлөөлсөн.  Тиймээс эдгээр асуудлыг нягтлан, судалж байгаа.  Шаардлага гарвал хуулинд өөрчлөлт оруулах асуудлыг УИХ-д өргөн барихаар Засгийн газар төлөвлөсөн. Харин “Валютын ханшийн уналттай холбоотойгоор томоохон гүтгэлэгийн компанит ажил явж байна. Энэ засгийн газрын талаар буруу, зөрүү мэдээлэл сонин хэвлэлд төлбөртэй өгөх зэрэг асуудал гарч байна. Ер нь валютын ханш өсөх үзэгдэл цагаан сар зэрэг баяр ёслол, хичээлийн шинэ жил эхлэхийн өмнө гардаг учраас эдийн засгийн энэ бараан үзэгдэл түр зуурынх" гэсэн юм.

Ерөнхий сайд энэ үеэр “Засгийн газрын харлуулах, унтраах гэсэн үзэлтэй хүмүүс маш их байна.  Удахгүй бид нэг жилийнхээ хийсэн ажлыг ард түмэндээ тайлагнана. Тэр үед Шинэчлэлийн Засгийн газар юу хийсэн бэ гэдэгт ард түмэн дүнгээ тавих байх” гэдгээ дуулгасан юм.

Эдийн засаг хямарсан учраас тасарсан төсвийн мөнгийг татвар нэмж нөхөж магадгүй гэсэн айдас иргэдийн дунд байсан. Харин Ерөнхий сайд татвар нэмэгүй гэдгийг уулзалтын үеэр хэллээ. Тухайлбал, Татварын хуульд нэмэлт өөрчлөлт оруулахаар Засгийн газар ажиллаж байгаа юм байна. Ингэснээр татвараас зайлсхийж, ашиг олохгүй байгаа гэсэн хуурамч тайлан гаргадаг гэх асуудалд зохицуулалт хийхэд анхаарахаар болсон гэв.

Цаашид  найман хувийн хүүтэй зогсохгүй, татвар, бензин шатахууны үнэ нэмэгдэхгүй тул айх зүйлгүй гэсэн утгатай зүйлийг Ерөнхий сайд өнөөдрийн уулзалтаар хэллээ.