УИХ-ын гишүүн О.Баасанхүү хэдхэн хормын өмнө "Нарантуул" захын нөхцөл байдалтай танилцсан байна. Ингээд түүнтэй утсаар холбогдож зарим нэг зүйлийг тодрууллаа.

-"Нарантуул" захын нөхцөл байдал ямар байна?
-Би дөнгөж сая намынхаа нарийн бичиг П.Ангарагийн хамт нөхцөл байдалтай очиж танилцлаа. Тэнд байдал маш муу байна. Мэдээж наймаачид уймарч, сэтгэл санаа нь хүнд байгаагаа хэлж байлаа. Дээр нь тус шатсан бөмбөгөр хүнсний захын хувьд бараг дахиж сэргэхээрээгүй болтлоо шатжээ. Хүмүүс янз бүрээр л ярьж байна. Зарим нь гадны нөлөөтэй гал түймэр болсон гэж үзэцгээж байгаагаа ч хэлж байна.

-Нэг хүн шатаж нас барсан гэсэн үнэн үү?
-Үнэн. Одоогоор зөвхөн нэг хүний цогцос л олдоод байгаа болохоос өөр хэдэн ч цогцос байхыг үгүйсгэхгүй юм. Учир нь хэргийн газар үзлэг явуулж болохгүй байгаа талаар албаныхан хэлж байна. Цогсцыг хэн болохыг тогтоох гэсэн боловч маш их ялзралсан учир жам ёсоор нь хөргөсний дараа шинжилгээнд оруулна гэж байсан. МАХН нам бол ядарсан нам. Тэгэхээр ядарсан ард түмнийхээ төлөө чадахаараа явна. Энэхүү хэргийг анхааралдаа авч ажиглаж байна.

-Таныг очиход "Нарантуул"-ын захирал, УИХ-ын гишүүн асан Ш.Сайханбуу байсан уу?
-Тэр хүн байхгүй байна лээ. Ер нь "Нарантуул"-ын удирдлагууд хэн ч алга. Менежер гэсэн залуу л хаа сайгүй гүйж харагдана лээ.

-Ямартаа ч эхний ээлжинд энэхүү түймэр юунаас болж гарсаныг тогтоох хэрэгтэй байна. Хоёрдугаарт шатсан зах дотор наймаа хийдэг байсан түрээслэгчдийн хохирлыг хэрхэн барагдуулах вэ гэсэн асуудал чухал байна. Гуравдугаарт, хохироогүй ч гэсэн ид наймааныхаа үеэр ажлын өдрөө алдаж байгаа түрээслэгчдийн хохирлыг шийдэх нь чухал байна.