Бусадтай бүлэглэн их хэмжээний мөнгө угаасан хэрэгт сэжиглэгдэн, байцаагдаж байх явцдаа оргон зайлсан хэргээр эрэн сурвалжлагдсан гэх “Ноёд” группийн захирал Г.Буяндорж сүүлийн үед хэвлэлийн баатраар тодроод байна. Г.Буяндоржийн эхнэр МУГЖ, дуучин Т.Ариунаа нөхрийгөө хамгаалж, хэвлэлд өгсөн ярилцлагадаа "Манай нөхрийг цагдаа нар баривчлаагүй. Бид хоёр хүүхдүүдтэйгээ байгаа. Манай нөхөр улсад нэг ч төгрөгийн хохирол учруулаагүй" хэмээн ярьсан. 

   Тэгвэл Г.Буяндоржид санаа тавих хүн эхнэрээр нь зогсохгүй байгаа бололтой. Тухайлбал Ерөнхий сайд Н.Алтанхуяг "Ноёд" группийн захирал Г.Буяндоржид ихээхэн санаа зовниж буйгаа уржигдар учирлаж ярьлаа. Тэрээр "Манай Засгийн газрын бизнес хийдэг хүн бүрийг барьж, хорьж байна гэх юм. Тийм биш шүү. Бүтээн байгуулалтад хувь нэмрээ оруулдаг, хууль бус үйлдэл хийгээгүй хэнийг ч хорихгүй. Тэгээд ч тэр Г.Буяндоржийг цагдаагийхан хориогүй гэж мэдэгдэж  байгаа. Гэтэл хэвлэл мэдээллийн хэрэгслээр хорьсон гэж бичиж байна. Энэ завшааныг ашиглаад сэтгүүлч та бүхэнд хэлэх зөвлөгөө байна. Хүнийг дөрвөн байгууллага цагдан хорьж шалгадаг. Цагдаа АТГ, ТЕГ, Прокурорын дэргэдэх мөрдөн байцаах байгууллага гэсэн дөрвөн газар. Энэ дөрөв хориогүй байтал хэн тэр Г.Буяндоржийг саатуулах болж байна" хэмээн илтэд өмгөөлж, хамгаалж байлаа.

Уг нь Г.Буяндорж МАН-ын Бага хурлын гишүүн. Гэхдээ тэрээр нам харгалзахгүй улс төрчидтэй сайн холбоотой байдаг бололтой. Ерөнхий сайдын яриаг сонссон хуульчид Г.Буяндорж хүмүүсийг залилж мэхэлсэн, хуурсан хариуцлагаас мултрах шинжтэй байна хэмээн ярьж байна.  

Хэдийгээр түүнийг баривчилсан, баривчлаагүй гэж янз бүрээр маргаж байгаа ч баттай мэдээллээр бол УЕП-ын дэргэдэх Мөрдөн байцаах албанаас баривчилж, ШШГЕГ-ын харьяа цагдан хорих 461 дүгээр ангид гурав хоног саатуулаад батлан даалтад гаргажээ. Одоо түүнийг УЕП-ын дэргэдэх мөрдөн байцаах албаныхан шалгаж байгаа юм.