Өчигдөр Нарантуул захын хоёр том корпус шатаж ихээхэн хэмжээний хохирол учирсан. Хэдэн жилийн өмнө “Бөмбөгөр” худалдааны төв шатсан шиг үйлдэл давтагдав. Одоогийн байдлаар галын шалтгааныг юунаас болсныг тогтоогоогүй байгаа. Мэдээж хугацаа хэрэгтэй болно.

Энэ үйл явдал Нарантуулын нэг хэсэгт Дүнжингаравтай холбосон авто зам барихаас үүдсэн тэмцэл өрнөж байх үетэй давхцсан нь ихээхэн анхаарал татаж байна. Учир нь наймаачид талбайгаа хамгаалан жагсаал хийж бас зам тавиулахгүй гэж ээлжлэн хоноглодог байжээ. Харин өнөөгийн удирдлагын зүгээс зам барихыг дэмжсэн шийдвэр гаргачихсан юм. Ингээд жижигхэн тэмцэл өрнөж байхад нь Нарантуулын нэг хэсэг шатаж гал дээр тос нэмэв.

Харин өчигдөрөөс эхлээд Нарантуулын галын шалтгаан тодроогүй байхад буруутныг олох ажиллагаа өрнөжээ. Одоогийн байдлаар захын удирдлага болох Ш.Сайхансамбуу буруутан болж хувирчээ. Учир нь тэрээр уг барилгаа улсын комисст хүлээлгэж өгөөгүй байжээ. Бас барилгадаа галын дохиолол тавиулаагүй гэсэн мэдээллийг албаныхан өгч эхлэв. Харин Нарантуулын удирдлага галын дохиололтой байсан гэж тайлбарлав. Бас албан тушаалтнууд гал шөнө гарч эхэлсэн байж магадгүй гэж мэдээлэв. Харин Наймаачид гал шөнө эхэлдэг юм бол юу ч үгүй шатах ёстой юм байгаа биз дээ. Энэ бол хэн нэгнийг улс төрийн зорилгоор буруутгах гэсэн тайлбар гэж үгүйсгэлээ.

Төрийн байгууллагууд Ш.Сайхансамбуугаас гадна Нарантуулын наймаачдыг буруутгав. Учир нь тэднийг даатгалгүй байсан учраас хохирлыг барагдуулахад хүндрэл учирна гэж сануулав. Харин Нарантуул захын удирдлага Ш.Сайхансамбуу хохирлыг гурван сарын хугацаанд бүрэн барагдуулна гэж мэдээлэл хийв.

Ерөнхийдөө Нарантуулын наймаачдыг удирдлагатай нь буруутгах ажил эхэллээ. Харин Ш.Сайхансамбуугийн ард бүх түрээслэгчид нь нэгдсэн байна. Наймаачид нь Ш.Сайхансамбууг буруутгах сонирхолгүй аж. Бас наймаачдын хохирлыг барагдуулна гэдэгт итгэжээ. Нарантуул худалдааны төв анх баригдсан цагаасаа эхлээд өнөөдрийг хүртэл түрээсийн үнээ нэмээгүй ирсэн нь наймаачдын талархалыг ихэд хүлээжээ.