“Эрдэнэс Оюутолгой” компанийн захирал Ц.Сэдваанчигийг яагаад ажлаас нь чөлөөлсөн бэ гэдэг асуудал ихээхэн анхаарал татах болсон. Тэрээр удаа дараа ажлаасаа халагдсан талаараа гомдолтой яриа өгч эхэлсэн. Эцэстээ түүний гомдол үндэсний аюулгүй байдлын хэмжээний асуудлыг ч ярих нь. Түүний тайлбараар бол хууль бусаар халсан гэж хуулийн байгууллагад нь хандаж чадахгүй байгаа нь ихээхэн шалтгаантай аж. Учир нь түүнийг халах ёстой гэдэг асуудал саяхан болж өнгөрөсөн Үндэсний аюулгүй байдлын ээлжит бус хурлын үеэр яригджээ. Уг нь “Эрдэнэс Оюутолгой”-н захирлыг Үндэсний аюулгүй байдлын хурлаар томилж, чөлөөлдөггүй. Зүгээр л уг хурлаар Оюутолгойн ажил явахгүй байгааг хөндөж ярилцсан бололтой. Дээр нь хамгийн сүүлд “Рио Тинто”-д ямар захидал явуулсан талаар нь дэлгэрэнгүй ярилцжээ. Тэгээд л Ц.Сэдваанчигийг халах ёстой гэсэн сэдэл Н.Алтанхуягт төржээ. Н.Алтанхуяг ч ийм далимыг хүлээж байсан бололтой. Нэгэнт асуудал ингэж өндөрөө авч шийдэгдсэн учир Ц.Сэдваанчиг хууль шүүхийн байгууллагаар яваад үр дүнгүй гэдгээ мэдрээд гомдоллоод байгаа аж.

    Хамгийн сонирхолтой нь Ц.Сэдваанчиг Рио Тинтод ямар агуулгатай захидал явуулсан талаар олон таамаглал гарах болсон. Тэгвэл түүний явуулсан захидлын утга агуулга тодорхой болж эхэлжээ. Түүнийг ганцаараа дур мэдэж захидал явуулсан гэсэн. Харин Ц.Сэдванчигийг тайлбараар бол манай дарга нар бүгд мэдэж байснаас гадна ийм үйл явдал болжээ.

    “Рио Тинто”  дэлхийн уул уурхайн салбарын хамгийн том аж ахуйн нэгж ч гэсэн мөнгөний асуудалтай тулгарчээ. Өөрөөр хэлбэл Оюутолгойн хоёрдугаар ээлжийн хөрөнгө оруулалт буюу гүний уурхайг барьж байгуулахад шаардагдах мөнгө тэдэнд байгаагүй аж. Тэгээд дэлхийн хэмжээний арилжааны 10 гаруй банкуудаас зээл авахаар болжээ. Эдгээр 10 гаруй банкууддаа хариу өгөх бас дэмжлэг авахын тулд  “Рио Тинто” Монголын Засгийн газарт ханджээ. Учир нь бидэнд ийм зээл хэрэгтэй байна. Монгол Улсын Засгийн газрын хувьд нэмэлт санхүүжилтийг дэмжсэн захидал хийж өгөөч гэж хүсчээ. Харин манай Засгийн газар нилээд цааргалсан учир “Рио Тинто” элдэвээр шахалт үзүүлэх болжээ. Манай Засгийн газар ийм агуулгатай захидал өгөх нь эрсдэлтэй гэж үзсэн байна. Гэвч Засгийн газрыг төлөөлж “Эрдэнэс Оюутолгой”-н захирал Ц.Сэдваанчиг “Рио Тинто”-д захидал илгээжээ. Мэдээж “Та бүхний банкуудаас авах гэж байгаа нэмэлт санхүүжилтийн асуудлыг дэмжих боломжгүй” гэсэн агуулгатайгаар хууль, гэрээний тодорхой заалтыг дурдан илгээжээ. Түүний захидалд “Рио Тинто” хилгэнэжээ. Тэгээд л хөрөнгө оруулалтаа зогсоож асуудал үүсгэж. Ерөнхийдөө ийм л үйл явдал болоод өнгөрч. Үр дүнд нь Ц.Сэдваанчиг ажлаасаа хусагдаж. Асуудал гацаанд орж. Цаашид хоёр тал үүссэн нөхцөл байдлын талаар хэрхэн ойлголцож, ямар шийдэлд хүрэх вэ гэдэгт тодорхой хугацаа хэрэгтэй болсон гэж эх сурвалж мэдээллээ.