Бүгд найрамдах ардчилсан Лаос ард улсын Хөдөө аж ахуй, ойн сайд Вилаяван Помке эдгээр өдрүүдэд манай улсад албан ёсны айлчлал хийж байна. Тэрээр айлчлалынхаа үеэр ҮХАА-н сайд Х.Баттулгатай уулзан хөдөө аж ахуйн салбарт хамтран хийх ажлын талаар санал бодлоо солилцсон юм.
Мөн өнөөдөр ҮХААЯ-тай хамтран ажиллах санамж бичигт гарын үсэг зурах аж. Энэ үеэр Монгол-Лаосын Хөдөө аж ахуйн сайд нар албан ёсны яриа хэлэлцээ хийж бие биеэ дэмжсэн харилцан ашигтай байх зарчимд тулгуурлан хөдөө аж ахуйн салбарт хамтран ажиллах тодорхой саналуудын талаар ярилцах аж. Тухайлбал, Монголын талаас Лаост цагаан будаа, ойн нөөц бүхий газар түрээслэн цагаан будааны хэрэгцээгээ чанартай найдвартай эх үүсвэрээс нийлүүлэх, дотоодын модны үйлдвэрлэлийг түүхий эдээр хангах зорилготойн зэрэгцээ, Монгол Улсад Лаосын хөрөнгө оруулалттай хонины аж ахуй хөгжүүлэх, мах, махан бүтээгдэхүүнийг Лаос болон АСЕАН-ы зах зээлд нийлүүлэх, мал эмнэлэг, үржлийн салбарт мэргэжилтэн авч ажиллуулах зэрэг хоёр орны эдийн засгийн хамтын ажиллагаанд томоохон хувь нэмэр оруулан дорвитой ахиц гаргах боломжтой салбаруудад хамтран ажиллах талаар санал солилцох юм байна.
Манай хоёр орон нь хөдөө аж ахуйн салбарт тухайлбал мал аж ахуйн салбарт хамтран ажиллаж байсан түүхтэй. 1980–аад оны үед байгаль, цаг уурын хувьд төстэй байдлыг харгалзан Лаосын Сиехуанг мужид Монголын мэргэжилтнүүд монгол хонь аваачин үржүүлж тухайн үед хонины тоо толгой 500-д хүрч байсан төдийгүй манай Хөдөө аж ахуйн дээд сургуульд Лаосын оюутнуудыг малын эмч, зоотехникч мэргэжлээр сургаж байсан билээ. 1990-ээд оноос хойш саарсан хамтын ажиллагаа сэргээн хөгжүүлэх хоёр талын сонирхол сүүлийн үед нэмэгдэж байна.
