УИХ-ын гишүүн Г.Уянгаас "Нарантуул" захын нөхцөл байдлыг талаар тодрууллаа.

    -Дөнгөж сая та "Нарантуул" захын нөхцөл байдалтай очиж танилцлаа. Тэгэхээр наймаачид яг юу хүсч, шаардаж байна?

-Бүгдээрээ ажлын байрыг нэн яаралтай шийдэж өгөхийг хүсч байна.  Хоёрдугаарт замын асуудлыг шийдэх талаар ярьж  байсан. Монгол Улсын хүн амын 3/1 нь өдөртөө "Нарантуул" захаар үйлчлүүлдэг. Гэтэл ордог орц нь ганцхан байдаг. Үүнээс болж ямар их бухимдал, замын түгжрэл үүсдгийг бид мэдэж байгаа шүү дээ. Тэгэхээр гарцаагүй дахин нэг орц хэрэг болно. Гэхдээ энэхүү замын асуудлыг шийдэхдээ зах дотор үүсч болох нөхцөл байдлыг судлах шаардлагатай байгаа юм. Тухайлбал, бөөний бараа бүтээгдэхүүнийг яахав, гурав дөрвөн эгнээ болсон машины зогсоолыг хэрхэх зэргийг эхлээд шийдэх хэрэгтэй гэдгийг наймаачид ч хэлж байна. Мөн тэргээр ачаа бараагаа зөөж явдаг тэр замыг нь яаж шийдэх вэ гэсэн асуудлууд гарч ирнэ. Тэрийг шийдэж өгөхгүй бол энэ нь дахин бөөн түгжрээ,  асуудал үүсгэсэн зам болох юм. Тэгэхээр доогуур нь эсвэл дээгүүр нь зам барихыг яаралтай шийдэж өгөх хэрэгтэй байна. Ер нь аль аль талыг нь харж үзэх болчихоод байна. Зарим хүмүүс өөрийнхөө эрх ашгийг гэхээсээ илүү энэ зам нь өөрөө олны хөл хөдөлгөөн урсгалтай зам учраас тэрийг нь зохицуулахгүй бол болохгүй гэдгийг ойлгох хэрэгтэй. Үүнийг нийслэлийнхэнтэй уулзасныхаа дараа хариуг нь өгнө гэж наймаачдад хэлээд ирлээ.

-Таныхаар наймаачдын хохирлыг хэн барагдуулах ёстой вэ?

-Наймаачид ажлын байраа хурдан сэргээх, хохирлоо барагдуулахыг хүсч байна. Хохирлын асуудал шинжээчдийн дүгнэлт гарч байж хэн барагдуулах вэ гэдэг дээр яригдана. Ямар ч байсан "Нарантуул"-ын захиргаанаас түрээслэгчтэй байгуулсан гэрээнийн хамгийн сүүлийн хэсэгт байгалийн давагдашгүй хүчин зүйлээс үүдсэн хохирлыг "Нарантуул"-ын удирдлагууд хариуцахгүй гэсэн заалт байдаг юм байна. Гэхдээ энэ тохиолдол бол байгалийн давагдашгүй хүчин зүйл биш байх. Өөрөөр хэлбэл, үер усны гамшиг, аянга цахилгаан "Нарантуул" дээр болоогүй байх. Тэгэхээр эцсийн хариу нь хэн нэгэн буруутай болж л гарах байх гэж бодож байна.

-Хохирлын нийт дүн хэзээ гарна гэж байна. Энэ талаарх мэдээлэл байна уу?

-Ажлын хэсэг нийт дүнг арай гаргах болоогүй байгаа гэсэн. Ямартаа ч ажил шуурхай явж байгаа. Онцгой байдал болон Мэргэжлийн хяналтын ажил 90 хувьтай, мөрдөн байцаах ажил 50 хувьтай явж байна. Үүний дараа шинжээчид дүгнэлтээ гаргаж хохирлын асуудлыг ярих байх.

-Өнөөдөр та түрээслэгчдээс гадна "Нарантуул"-ын удирдлагуудтай уулзах гэж очсон байх. Уулзаж чадсан уу?

-Хамгийн гол нь ажлын байраа яаж сэргээх талаар дэмжлэг үзүүлээч гэж "Нарантуул"-ын захиргаатай уулзах гэсэн боловч тэд байсангүй. Уулзах хүсэлтээ менежерт нь үлдээгээд ирлээ. Ойрын үед уулзалт болох байх. Ямартаа ч түрээслэгчдийн холбооны тэргүүний хувиар энэхүү түрээслэгчдэд үүдсэн асуудлыг газар дээр нь очиж биечилж танилцах, оролцож болох оролцоо туслалцаа юу байгаа вэ гэдгийг мэдэж авахыг тулд өнөөдөр очиж ажилалаа.