Улс орны нөхцөл байдал хүндэрч байгаатай холбогдуулан ээлжит бус чуулганыг хуралдуулж болно гэсэн санааг анх Ерөнхийлөгч Ц.Элбэгдорж гаргасан. Дараа нь МАН-ынхан өлгөж аваад улс төр хийсэн. Бүр ээлжит чуулганыг хуралдуулж хэлэлцэх асуудлыг ч УИХ-ын даргад илгээсэн.

    Эдийн засгийн нөхцөл байдал анх хүндэрч эхлэхэд төрийн өндөрлөгүүд дуулгавартай байсан юм. УИХ-ын дарга З.Энхболд ээлжит бус чуулганыг 9-р сарын эхээр гэж урьдчилсан тов гаргасан.  Харин одоо эдийн засгийнхаа хүндэрлүүдэд дасаад цочроо нь гарцгаажээ.
    Уг нь ээлжит бус чуулган хийх эсэхийг Засги
йн газрын саналын дагуу шийдэх учиртай гэж УИХ дахь олонхийн бүлгийн дарга Д.Эрдэнэбат мэдэгдэж байсан. Тэгвэл Засгийн газрын тэргүүн ээлжит бус чуулганы талаар намынхантайгаа зөвлөлджээ. Уг уулзалтад УИХ-ын дарга З.Энхболд, АН-ын бүлгийн дарга Д.Эрдэнэбат гээд нилээд хүмүүс оролцсон сураг байна. Тэд ярилцаж байгаад ээлжит бус чуулганыг хийхгүй байх талаар урьдчилсан тохиролцоонд хүрсэн гэж эх сурвалж мэдээллээ.
    Хэрэв ээлжит бус чуулганыг хийвэл МАН-ын тоглолтонд орчих гээд байна. Тэгээд ч хэлэлцэж шийдвэрлүүлэхээр тулсан асуудал бага байна. Яаж ийж байгаад намрын чуулгантайгаа золгосон нь зөв гэцгээжээ. Мөн ээлжит бус чуулган хийвэл МАН-ынхан улс төржүүлээд нилээд тоглолтууд хийнэ. Тоглолт хийх зарим нэг нөхцөл байдал ч байна. Энэ бүхнээс сэргийлэх хэрэгтэй гэж эрх баригчид зөвлөлдсөн талаар саарал ордны эх сурвалж тайлбарлав.

    Ийнхүү эрх баригчид сөрөг хүчний улс төрийн тоглолтууд цөмөрч орж ирж магадгүй гэж болгоомжилж байна. Ийм болгоомжлол нь ээлжит бус чуулганыг аль болохоор хийхгүй байх нь зөв гэдэг байр суурьт хүргэжээ. Тиймээс ирэх сарын эхээр ид улс төржих байсан ээлжит бус чуулган хуралдахгүй нь. Гол нь эдийн засгийн хямрал, валютын ханшны өсөлт, Оюутолгойн зогсолт, “Нарантуул”-ыг тойрсон маргаан, бондын мөнгөөр хийж буй урагшгүй ажлуудаас болж эрх баригчид “цэвэр тавиулж” магадгүй гэж сэрэмжилжээ. Тиймээс эдгээр асуудлыг тойрсон их улс төржилт нэг хэсэгтээ намжих нь.  Хамгийн гол нь АН-ынхан ээлжит бус чуулганыг хийлгэх асуудал үүсээгүй гэж үзсэн бололтой.

    Харин ээлжит бус чуулган хийх шаардлага хүргүүлсэн сөрөг хүчнийхэн энэ асуудлаар ямар байр суурь илэрхийлэх нь одоохондоо тодорхойгүй байна.