Ерөнхий сайд Н.Алтанхуяг нэг жилийн тайлангаа тавилаа. Тэр маш олон ноцтой зүйлийг ярьж байна. “Хээл хахуультай тэмцэж байгааг далим үсэргээд зарим нэгнийг хориод бай гэж хэн ч хэлээгүй. Үүнийг гуйвуулж нөгөө талаасаа биднийг хийсэн болгож харагдуулж байгаа” хэмээн мэдэгдэв. Өөрөөр хэлбэл хээл хахуультай тэмцэх нэрээр зарим нэгнийг хэлмэгдүүлж байгааг Засгийн тэргүүн хүлээн зөвшөөрлөө. Түүнийг нь зарим нэгэн Засгийн газар хийж байгаа мэтээр гуйвуулж харагдуулж буй бололтой. Тэр хэн бэ?

  “Бүтээн байгуулалтыг далайцтай хийж байгаагүй” гэж бас ам хальтрав. Н.Алтанхуяг л Монголын түүхэнд далайцтай бүтээн байгуулалтыг зээл аваад хийгээд байгааг ард түмэн мэдэхгүй байгаа юм байна л даа. Өөрөөр хэлбэл тэрээр өнгөрсөн зууны их бүтээн байгуулалтыг үгүйсгэлээ.  

  Бас “Засгийн газар гял цял, бүх юмыг хийдэг гэж байхгүй ээ. Бид бүх юмыг хийж чадахгүй, бүх юмыг мэдэж чадахгүй. Гэхдээ хамтраад ойлголцоод явах юм бол одоо үлдэж байгаа гурван жилд Монгол Улсыг галзуу хөгжүүлнэ дээ” хэмээн нүүрээ улайлгаж байгаад хадуурав. Нэгд, тэрээр өөрийн Засгийн газраа гял цял биш гэдгийг хүлээн зөвшөөрөв. Хоёрт, Засгийн газар бүх юмыг хийхгүй гэж ил тод мэдэгдлээ. Уг нь хийх гэж л сонгогдсон санагдах юм. Өмнө нь бурууг бусад руугаа чихдэг байсан. Харин одоо хийхгүй гэж мэдэгддэг болов. Ерөнхий сайд асан Д.Бямбасүрэн гуай нэгэнтээ “Засгийн тэргүүн энэ улсын хувьд оролцохгүй ажил гэж үгүй. Улс орны хэмжээнд бүхий л ажлыг болгох гэж зүтгэдэг. Шөнө гэртээ ирээд унтах гэхээр бүхий бие янгинан өвддөг юм шүү дээ. Ийм л алба” гэсэн утгатай зүйлийг ярьж байсан. Гэтэл Н.Алтанхуяг тас эсрэгээр нь ярьж байх юм.

  Энэ мэтээр нэг жилийнхээ ажлын тайланг тавихын зэрэгцээ “ойлголцож чадах юм бол үлдэж байгаа гурван жилд Монгол Улсыг галзуу хөгжүүлэх”, “Засгийн газар бүх юмыг хийдэг гэж байхгүй ээ” гэх мэт эргэлзээ төрүүлсэн тайлбаруудтай Н.Алтанхуягийн нэг жилийн богино тайлан, задгай яриаг өөрийнх нь дүрээр, өөрийнх нь хоолойгоор сонсох боломжийг олгож байна.