Сүүлийн үед Засгийн газрыг огцруулах тухай асуудал хөндөгдөх болов. Гэхдээ хэн дуртай нь Засгийн газрыг огцруулдаггүй л дээ. Засгийн газрыг огцруулдаг хуультай, УИХ-ын гишүүдийн хийдэг ажил. Гэтэл МАН-ын Шинэчлэлийн хороо гэх сайн дурын хөгжимчид Н.Алтанхуягийг огцруулах тухай шаардлага гаргах болов. Нам дотрох асуудлаа шийдэж чадахгүй байж Засгийн газрыг огцруулна гэж мөрөөдөх ч эмгэнэлтэй хэрэг л дээ. Ядаж л намынхаа УИХ-ын гишүүдийн нэр дээр албан тоот төлөвлөдөг байгаа даа гэж олон хүмүүс хөөрөлдөх аж.

Гэвч МАН-ын Шинэчлэлийн хорооныхон “Маш том зорилготой” байгаа гэж эх сурвалж мэдээллээ. Учир нь тэд Н.Алтанхуягийн Засгийн газрыг эдийн засгийн хямралын асуудлаар дамжуулан хөнтөрүүлчих хүсэлтэй. Тэгээд хүсэл нь биелэвэл дараагийн Засгийн газарт МАН-аа орохыг шаардаад өөрсдөө албан тушаалд очих нууцхан хийгээд бяцхан зорилготой бололтой. Үүнийг л МАН-ын Шинэчлэлийн хорооныхон шинэчлэл гэх гээд байгаа аж.  Тэд энэ үйл хэрэгээ “Намаа аварч байгаа, төрөө аварч байгаа, түмнээ ядуурлаас гаргаж байгаа” зам мэтээр тайлбарлах сурагтай.

Шинэчлэлийн хорооныхон намаа шинэчилж чадахгүй байж өөр намын Засгийг шинэчлэх гэж зүтгэх нь хэнд ч инээдтэй санагдана. Ядаж эхлээд намаа шинэчилчихээд дараа нь АН-ын Засгийн газрыг шинэчлье, огцруулья хэмээн яривал арай өөр л дөө.

Зарим эх сурвалжийн мэдээллээр бол МАН-ын Шинэчлэлийн хорооны шаардлага хүсэлтийг намынх нь гишүүд төдийлөн дэмжихгүй байгаа аж. Тэд аймгуудад гэр барихаар өөр ажил хийдэггүй. Хэдэн хүнтэй уулздаг. Үүнийгээ шинэчлэл гэж ярьдаг гэнэ. Шинэчлэлийг ингэж хийдэггүйг хүн бүх хэлнэ л дээ. Тэгээд шинэчлэл нь үр дүнгүй болохоор дараагийн шинэ дуулианыг дэгдээхээр Засгийн газрыг огцор хэмээн орилж байгаа аж.

Энэ мэтээр МАН-ын Шинэчлэлийн хорооныхон бодлогогүй, стратегигүй үйл ажиллагаагаа өргөжүүлээд байвал эцэстээ намдаа ч тоогдохоо болино. Нийгэмдээ ч тоогдохоо болино. Тэр цагт “Шинэчлэлийн хороо” хэмээх иргэний нийгмийн байгуллага болж гудамжинд жагсдаг орон зайг дүүргэхээр зүтгэх ирээдүйн дүр зураг нь бууж байна даа.