Уламжлал ёсоор Монгол Улсын Ерөнхийлөгч Ц.Элбэгдорж есдүгээр сарын 1-нд дунд сургуулийн сурагчдад теле хичээл заалаа. Ерөнхийлөгч 10 цагт заасан теле хичээлээ “Хуулийн засаглал-хүүхдийн оролцоо” хэмээн нэрлэсэн юм. Тэрээр энэ удаагийн теле хичээлээрээ хуулийн дор амьдарна гэж юу вэ, хууль, дүрмээ биелүүлнэ гэж юу вэ гэдгийг энгийн жишээ, баримтад тулгуурлаж сурагчдад заасан байна.

Ерөнхийлөгч Ц.Элбэгдорж ийм сэдэв сонгосон нь 2009-2013 онд хэрэгжүүлсэн эхний бүрэн эрхийн хугацаандаа ч, энэ зунаас хэрэгжүүлж эхэлсэн хоёр дахь бүрэн эрхийн хугацаандаа ч иргэний нийгэм, хуулийн засаглалын асуудалд гол анхаарлаа хандуулж байгаатай холбоотой аж.

Тэрээр энэ жил тав дахь удаагаа теле хичээл заасан юм. Ерөнхийлөгч 2009 оны есдүгээр сарын 1-нд “Дэлхийн дулаарал-Монгол орон”, 2010 онд “Монголын бахархал”, 2011 онд “Монголын сайхан орноор”, 2012 онд “Хүн болох багаасаа” гэсэн сэдвүүдээр хичээл зааж байсан юм.