УИХ-ын гишүүн Н.Номтойбаярыг гишүүн болохоос өмнө, болсных нь дараа ч хэл ам байнга дагасаар ирсэн. Гишүүн болохоос нь өмнө баян айлын өв залгамжлагч гэж баалдаг байсан бол саарал ордонд орсных нь дараа “сахилагагүй” этгээд  гэж харагдуулахуйц баримтууд цөөнгүй гарч ирсэн. Ялангуяа түүний УИХ-ын сонгуулийн сурталчилгаа хаагдахаас нэг хоногийн өмнө долоон жил хамгаалагчаар нь ажиллаж байсан Б.Батзориг гэгч ноцтой баримтууд ярьсан байдаг. Тэрбээр Н.Номтойбаярыг “МАК” компанийхаа үйл ажиллагааг явуулахын тулд ихээхэн хэмжээний хахууль өгч, хууль бус ажиллагаа явуулдаг, хувийнхаа нисдэг тэргээр дархан цаазат газруудад хориотой ан хийж байсан. Сүхбаатар дүүргийн “BRIX” бааранд С.Ганбаатар гэх нөхрийг ямарч шалтгаангүйгээр зодож, үүдэн шүдийг нь цөм өшиглөж байсан. Харин тэр залуу намын залуучууд намайг зодлоо хэмээн хэвлэлийнхэнд хандахад 1600 доллар өгөөд амыг нь таглаж байсан. Түүнчлэн согтуу үедээ УИХ-ын гишүүн Х.Баттулгын хүү Б.Жавхлан руу ангийн хутга барин ална хэмээн дайрч байсан. Мөн НАМЗХ-ны Ерөнхийлөгч байсан Л.Оюун-Эрдэнэ нартай нийлж үйлчлэгч бүсгүйг хүчирхийлсэн” гэх зэргээр ярьсан байдаг. Эдгээрийг Н.Номтойбаяр гишүүн үгүйсгэж, Б.Батзоригийг нэр хүндэд халдсан гэж цагдаад өгсөн билээ. Гэсэн ч УИХ-ын гишүүний тухай “нууц” баримт дэлгэсэн гэх Б.Батзориг тэр цагаас хойш ор сураггүй алга болсон. Энэ хооронд муу нэрэнд хутгалдаад байсан Н.Номтойбаярын нэр хүнд ч бага багаар өсч байна. Тэрбээр Ерөнхий сайд Н.Алтанхуягтай “дайн” эхлүүлж, өөрийн намыг шинэчлэх залуучуудын хөдөлгөөнийг тэргүүлж байна. Олон нийт “овоо шулуун үгтэй залуу байна” хэмээн үнэлж эхлээд буй. Харин түүний тухай Б.Батзориг гэгчийн ярьсан үнэн эсэхэд эргэлзсээр байна. Баян айлын хүүхэд гэхээр дураараа дургиж, дунд чөмгөөрөө жиргэдэг гэсэн ойлголт бий. Харин “МАК” компаний дэд захирлаар ажиллаж байсан, чамлахааргүй боловсролтой гэх Н.Номтойбаяр гишүүн чухам ямар хүн бэ гэдгийн сонжсон хэвээр.
   Тэгвэл Н.Номтойбаярыг үйлчлэгч эмэгтэйг хүчирхийлсэн, баавгай агнасан гэж мэдүүлсэн Б.Батзориг энэ “хүн гүтгэсэн, гүтгүүлсэн” гэх хэргийг тайлах ганц хүн юм. Гэвч тэрбээр 2012 оны УИХ-ын сонгуулиас хойш чимээгүй байсаар саяхан сураг нь гарч эхэлжээ. Б.Батзориг одоогоор амьдрахад тааламжтай, хамгийн сайхан орнуудын нэг гэгддэг Швейцарьт тарвалзаж байгаа аж. Түүгээр ч зогсохгүй Н.Номтойбаяр гишүүнээс болж эх орондоо ирэхгүй, улс төрийн орогнол хүссэн байна. Долоон жил бие хамгаалагч нь байсан хэрнээ сонгуулийн өмнө Н.Номтойбаярын нэр хүндийг унагах үйлдэл хийсэн түүнд Монголд гишгэх газар олдохгүй болсон бололтой. Н.Номтойбаяр бас ч гэж нөлөөтэй нэгэн. Б.Батзоригийн өөрийнх тухай хэлсэн баримтуудыг тэрбээр хэзээ ч хүлээн зөвшөөрөхгүй хэмээн хуулийн байгууллагаар тууштай явахаа мэдэгдсэн. Н.Номтойбаяр хуучин фактаа нуух гэж хүчээ гаргаж байна уу, Б.Батзориг гэгч захиалгаар түүнийг гүтгэчихээд Швейцарьт тарвалзаж байна уу гэдэг эгзэгтэй асуулт хэвээр байна.