Эдийн засагт доргилт үүсч, улсын төсөв тасалдах нь тодорхой болсон. Сүүлийн хэдэн жилд ийм үзэгдэл болж байгаагүй. Харин манай улс энэ жил ийм зүйлтэй гарцаагүй тулав. Тиймээс эрх баригчид гарц хайж эхэлжээ. Юуны өмнө замбараагүй халамжийн бодлогодоо өөрчлөлт хийх талаар олон гишүүн үзэл бодлоо илэрхийлдэг. Гэвч сонгогчидоосоо айгаад хэлсэн ярьснаа хэрэгжүүлдэггүй. Тэгвэл оюутны 70 мянган төгрөгийн тэтгэлэгийг зогсоох хуулийн төсөл бэлдэж эхэлсэн талаар мэдээлэл гарах болсон. Хамгийн сүүлд УИХ-ын гишүүн Ж.Батзандан “Оюутнуудад өгдөг 70 мянган төгрөг. Үүнийг  бүр больчих хэрэгтэй” хэмээн мэдэгдэв. Эх сурвалжийн мэдээлж байгаагаар бол ийм хүсэл зоригтой УИХ-ын олон гишүүн байгаа гэнэ. Хэн нэг нь 70 мянган төгрөгийг зогсоох хуулийн төслийг албан ёсоор өргөн барилаа л бол дэмжих хангалттай олон гишүүд бий болжээ.
     Анх 70 мянган төгрөгийг АН-ынхан зүтгүүлэн баталсан бол одоо өөрсдөө санаачлан цуцлах гэж хичээх болов. Бүх оюутнуудад хавтгайруулан олгож байгаа энэ мөнгө сайн ч, муу ч нөлөөтэй байгаа.
    Манай улсад 170 орчим мянган оюутан бий гэсэн судалгаа бий. Тэгэхээр нэг жилд улсын төсөвөөс 150 орчим тэрбум төгрөгийг оюутнуудад тэтгэлэг хэлбэрээр өгдөг гэсэн үг. Цаашид ийм хэмжээний мөнгийг жил бүр төсөвтөө суулгаад явах боломжгүй. Хэзээ нэгэн цагт энэ асуудлыг хөндөж л таарна. Тэр цаг одоо ирж. УИХ-ын гишүүд нь асуудлыг судалж эхлэв.
    Оюутны 70 мянгыг анхнаас нь дэмжиж одоо ч хамгаалсаар ирсэн нэр бүхий хэдэн гишүүд бий. Тэд бол хувийн сургуультай УИХ-ын гишүүд. Тэдний лобби 70 мянгыг оюутнуудад өгөхөд чиглэгддэг. Шалтгаан нь оюутнуудад 70 мянгыг өгч байвал сургуульд нь улам олон оюутан сурна. Өөрсдийнх нь бизнес ургаштай байна. Өөрөөр хэлбэл төрөөр дамжуулан өөрсдийнхөө бизнесийг тэтгүүлж байна гэсэн үг юм. Ийм сонирхолтой хүмүүсийн лоббиг давж гарна гэдэг нэг талаасаа хүндрэлтэй.  
Эрх баригчид зөвхөн оюутнуудыг нүд үзүүрлээд 70 мянгаас нь салгах гээд байгаа юм биш. Өөр олон зүйлийг танах гэж байна. Тухайлбал захиргааны зардлыг хумих талаар бас ярьж эхэллээ. Учир нь одоогийн төсвийн зарлагын 60 хувь захиргааны зардал, халамжийн бодлогод явж байгаа.
    Сү.Батболдын Засгийн газар 11 яам, 929 албан хаагчтай байсан. Харин Н.Алтанхуяг гарч ирээд 16 яам, 1625 албан хаагчтай болсон. Өөрөөр хэлбэл төрийн албан хаагчдын тоог 700 орчимоор нэмэгдүүлж ах дүү хамаатан саднаа оруулсан гэсэн үг. Мөн улсын үйлдвэрийн олон гаазар байгуулж бас л хамаатан садны өргөн сүлжээг үүсгэсэн. Энэ бүхэн нь эдийн засгийг сульдаах бас нэгэн хүчин зүйл болсон. Тиймээс төрийн өмчит газаруудад ажиллагсадын тоог эхний ээлжинд цөөрүүлэхээр Засгийн газар судалгаа хийж байгаа мэдээлэл ирэв.
   Энэ мэтээр Засгийн газар төсвийн тасалдалаа нөхөх, эдийн засгийн хямралыг давж гарахаар гарц хайж байна. Гэвч Засгийн тэргүүн нь “Эдийн засаг хямраагүй, судалгаагаар нотолно” гэж мэдэгдээд байгаа ч цаанаа айдаст автаж хямралын үеийг яаж давах талаар янз бүрийн хувилбарууд бэлдэж эхэлжээ.