Багануур дүүргийн ИТХ хууль бусаар хуралдаж, хуурамч тамга ашиглаж байна гэж тус дүүргийн МАН-ын гишүүд мэдээлсэн. Тэгвэл өнөөдөр эсрэг байр сууринаас Багануур дүүргийн АН-ынхан тайлбар өглөө.    

    2012 оны  Орон нутгийн сонгуулиар Багануур дүүргийн ИТХ-ын 12 суудлыг МАН, 13 суудлыг АН авсан. Тиймээс хоёр намынхан зөвшилцөж,  дүүргийн Засаг даргаа АН-аас, ИТХ-ын даргаа МАН-аас сонгох гэрээ байгуулсан аж. Гэсэн ч сонгуулиас хойш ИТХ дахь МАН-ын гишүүд нэг шаардлага тавин хуралдаа суухгүй байжээ. Багануур дүүргийн засаг дарга М.Гончигжавын зүгээс хуралдаа ирж, ажлаа хийхийг сануулан 9 удаа шаардлага хүргүүлсэн байна. Гэсэн ч МАн-ын гишүүд өмнөх Засаг дарга Сандаг-Очирыг ИТХ-д оруул гэсэн шаардлага тавиад хөдөлж өгөхгүй, хурлын өрөөгөө цоожилж явсаар нэлээн удаан хугацаа өнгөрсөн байна. Сандаг-Очир нь өмнө нь тус дүүргийн Засаг даргаар ажиллаж байхдаа нийтийн эзэмшлийн талбайд барилга барих зөвшөөрөл, газрыг замбараагүй олгосон гэж шүүхээс торгуулийн ял авч байсан нэгэн аж. Тиймээс дүүргийн ИТХ-д оруулахгүй гэдгээ мэдэгдсэн байна. МАН-ын энэ хууль бус шаардлагыг хүлээж аваагүй учраас тэд ажлаа хийхгүй, Засаг дарга санхүүжилтын түр хөрөнгөөр өвлийн бэлтгэл ажлаа хангаж эхэлжээ. Мөн 7-р сарын 24-ний өдөр АН-ынхан ИТХ-ыг дангаараа байгуулах шийдвэр гаргаж,  ЗГХЭГ-т учир байдлыг танилцуулан ИТХ-ын шинэ тамга авсан юм байна.  Ингэж ажлаа хийхгүй байсан МАН-аас сонгогдоод байсан ИТХ-ын даргын бүрэн эрхийг хүчингүй болгосон ч хурлын өрөөг цоожлох, хуурамч тамга ашигласан гэж ярьсаар байгаа гэлээ.

   МАН-ынхан одоо Сандаг-Очирыг ИТХ-д оруул гэсэн шаардлага тулгасаар ИТХ-ын өрөөнд гурав гурваараа ээлжлэн суулт хийсээр байгаа аж. Өмнө нь АН-ын гишүүд хурал хийхдээ цагдаа нарыг байлцуулж байж хуралдсан байна. Ямартаа ч Багануур дүүргийн одоогийн байдлаар өвөлжилтийн бэлтгэл ажлаа хангаж, дулааны цахилгаан станцаа засжээ. Харин МАН-ын ИТХ-д байсан гишүүд хууль бус шаардлагаа үргэлжлүүлэн тавьсаар байгаа гэнэ.