Төрийн албаны төв байгууллагуудын олон улсын чуулга уулзалт өнөөдөр /2013.09.04/ Төрийн ордонд эхэллээ. Азийн бүс нутагт анх удаа Монгол Улсад зохиогдож байгаа энэ удаагийн чуулга уулзалт нь “Төрийн албаны Мерит тогтолцоо-туршлага сургамж, сорилт боломж” сэдвийн дор хоёр өдөр үргэлжлэх юм.


   Чуулга уулзалтын нээлтэд Улсын Их Хурлын дарга З.Энхболд оролцож, төлөөлөгчдөд мэндчилгээ дэвшүүлж үг хэллээ. Тэрбээр хэлсэн үгэндээ, улс орны хөгжил гэдэг зөвхөн эдийн засгийн тоон өсөлт төдийгүй эрүүл, шударга нийгэм, хүний хөгжлийн таатай нөхцөл боломж хангагдсан байхыг шаарддаг. Сайн төр гэдэг иргэдээрээ үнэлүүлдэг, тэдний сэтгэл ханамжтай байдлаар илэрхийлэгддэг байх ёстой. Үүний тулд төрийн албаны шинэтгэлийг байнга хийж, өндөр мэдлэг боловсролтой, чадварлаг боловсон хүчнийг бэлтгэх, тэднийг тогтвор суурьшилтай ажиллах нөхцөл боломжоор хангахын чухлыг дурдаад ийм нэгэн хүсэл зоригийн үүднээс Азид анх удаа, тэр дундаа эзэн Чингис хааны өлгий нутагт хуран чуулж буй олон улсын зочид төлөөлөгчдийн ажилд амжилт хүслээ.

   Чуулга уулзалтын эхний өдрийн хуралдаанаар Монгол, Энэтхэг, Хятад, Армен, Лаос улсын төлөөлөгчид төрийн албаны мерит тогтолцооны тулгамдсан асуудлаар илтгэл тавьж, өөрийн орны төрийн албаны сонгон шалгаруулалт, төрийн захиргааны удирдлагын практикт тулгардаг бэрхшээл, түүнийг даван туулах арга замын талаар ярилцаж, дугуй ширээний ярилцлага өрнүүлэх юм байна. Мөн төрийн албанд нэвтрүүлж буй мерит тогтолцооны шинэлэг арга барил, шинэ санаачлагуудынхаа талаар Вьетнам, Франц, Казахстан, Кувейт зэрэг улсын төлөөлөл илтгэл тавьж, туршлагаа хуваалцан, төрийн албаны төв байгууллагуудын хоорондын хамтын ажиллагааг хөгжүүлэх арга замын талаар хамтдаа хэлэлцэх аж.

   Уг чуулга уулзалтад Монгол Улсыг төлөөлөн Төрийн албаны зөвлөлийн дарга, доктор Б.Цогоо илтгэл тавих юм байна гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.