МАН-ын Шинэчлэлийн хорооны зохицуулагч Т.Сайнжаргал ШӨХТГ-ын дарга О.Магнайг хууль зөрчсөн хэмээн үзэж, Төрийн албаны зөвлөлд гомдол гаргаж, өргөдөл өглөө. Тэрээр уг өргөдөлдөө ШӨХТГ-ын дарга О.Магнайг үүрэгт ажлаас нь чөлөөлж өгөхийг хүссэн юм. Ингээд түүнээс чухам ямар учраас өргөдөл гаргах болсныг нь тодрууллаа. 

-Яагаад О.Магнайг огцруулах өргөдөл өгөх болов?
-Монгол Улсын тохируулагч агентлаг ШӨХТГ-аас гаргасан болон гаргахаар зэхэж буй тушаал шийдвэрүүд нь нийгмийг хямруулсан, хүлээлтэнд оруулсан, УИХ болон ЗГ-ын бодлого шийдвэрээс илт зөрсөн шийдлүүд байна.  Тиймээс салбар дундын бодлогыг зохицуулах үүрэг бүхий тус тохируулагч агентлагийн 2012 оноос хойш томилогдсон дарга, нэгжийн удирдлагууд үүрэг гүйцэтгэгч, жинхэлсэн дарга эсэх талаар тодруулга гаргаж өгнө үү гэж Төрийн албаны зөвлөлд хандаж байгаа юм.
Хэрэв үүрэг гүйцэтгэгч биш жинхэлсэн дарга нар бол Төрийн албаны тухай хууль, УИХ-ын 2003 оны 13-р тогтоолоор батлагдсан “Төрийн жинхэнэ албаны удирдах албан тушаалд томилогдох ажилтныг сонгон шалгаруулах журам’’-ын 9-н “а”-д заасны дагуу төрийн албаны төв байгууллагын сонгон шалгаруулалтанд орж сонгогдсон удирдах албан тушаалтны нэрс дунд байхгүй байх тул дээрх дарга нарын төрийн албаны зөвлөлийн хуралдаанаар хэлэлцэгдэн, томилох эрх бүхий апбан тушаалтанд уламжилсан тогтоолын хуулбар, хуралдааны тэмдэглэлийн аль нэгийг сонгон шалгаруулалтын дүнг нийтэд мэдээлэх журмын дагуу цахим хуудасдаа байршуулах ёстой.

-О.Магнай дарга өөрийн хэвлэл мэдээлэлд өгсөн ярилцлага мөн албан ёсны сайтдаа МАН-ын нэр төрд халдсан зүйлсийг гаргаж байна гэлээ. Үүнийгээ тодруулаач?
-Засгийн газрын тохируулагч агентлаг ШӨХТГ-ын дарга О.Магнай нь 2013 оны 6 дугаар сарын 24-ний өдөр тутмын “Өдрийн сонин"-д “О.Магнай: МАН-ынхан өөрсдийгөө байхгүй болох вий гэхээс суух газраа олохгүй байна” гарчигтай ярилцлага өгчээ. Тус ярилцлагандаа "Харин МАН-д ямар үнэт зүйл байдгийг мэдэхгүй. Үе үөийн эх орончдын хийсэн тусгаар тогтнолыг өөрсөд дээрээ наадаг л нөхдүүд. Үнэт зүйлгүй улс төрийн нам хэр удаан тогтохыг харъя. Ер нь энэ намд удаан хугацаа үлдээгүй байх. .. МАН-ыг гаднаас нь харахад энэ улсын төлөө биш өөрсдийнхөө төлөө л санаа зовж байгаа “Энэ нам байхгүй болчихлоо” гээд байж суух газраа олохгүй байна. МАН-гүйгээр энэ улс цаашаа явна. Улс төрийн намуудын тухай хууль батлагдахаар намууд хатуу гишүүнчлэлтэй байх, ашгийн төлөө үйл ажиллагаа явуулахыг хориглоно. МАН-ын тусгаар тогтнолын ордонг ч төр авах болов уу гэж ойлгож байгаа. Үүний дараа асуудал өөрөөр эргэж энэ нам байх уу, байхгүй юу гэдэг асуудал яригдана  гэх зэргээр байр сууриа илэрхийлсэн байна.

Тэгэхээр Төрийн албаны тухай хуулийн 13 дугаар зүйл. Төрийн жинхэнэ албан хаагчийн нийтлэг үүргийн 13.1.8 дахь хэсгийн “Апбан тушаалын бүрэн эрхээ хэрэгжүүлэхдээ улс төрийн аливаа нөлөөлөлд автахгүй төвийг сахих, хэвлэл, мэдээллийн хэрэгслээр төр, засгийн бодлоготой холбогдсон асуудлаар зөвхөн албан ёсны байр суурийг илэрхийлэх” гэснийг зөрчсөн байна.

Төрийн албаны тухай хуулийн 15 дугаар зүйл. Төрийн жинхэнэ албан хаагчийн үйл ажиллагаанд хориглох зүйлийн 15.1.1. “Албан үүрэгтэйгээ холбогдолгүй асуудлаар нам, төрийн бус болон шашны байгууллагын үйл ажиллагаанд төрийн албан хаагчийн хувьд оролцох” гэсэн заалтыг мөн адил зөрчин албан үүрэгтээ холбогдолгүй асуудлаар улс төрийн намуудын үйл ажиллагаанд төрийн албан хаагч оролцоод  байна. Түүнчлэн Төрийн албаны тухай хуулийн 15 дугаар зүйл. Төрийн жинхэнэ албан хаагчийн үйл ажиллагаанд хориглох зүйлийн 15.1.7. "Албан бус зорилгод төрийн байгууллагын эд хөрөнгө техник хэрэгсэл, санхүүгийн эх үүсвэр, мэдээллийн хангамж болон апбаны мэдээллийг ашиглан завших” гэх тус хуулийн заалтыг зөрчин төрийн апбанд хориглосон улстөржсөн ярилцлагаа ШӨХТГ-ын албан ёсны цахим хуудсанд 2013.06.24-ний өдрөөс 2013.09.03-ны өдрийг хүртэлх хугацаанд байршуулсан байгаа.

Төрийн албаны тухай хууль, тогтоомжийн биелэлтийг зохион байгуулах, төрийн албанд шударга ёсны зарчмыг хэрэгжүүлэх үндсэн үүргийн хүрээнд дээрх хууль зөрчсөн заалт бүрээр эрх хэмжээнийхээ хүрээнд дүгнэж өгөхийг иргэн хүнийхээ хувьд Төрийн албаны зөвлөлд хандаж байна.

-Тэгэхээр таны өргөдлийн гол утга бол О.Магнай дарга ажлаа хийж чадахгүй байна. Мөн хууль бус үйлдлүүд гаргасан. Тиймээс албан тушаалаас нь буулгаж өгнө үү гэсэн утгатай гэж ойлгож болох уу?

-Ямар ч байсан хоёр өргөдөл мөн О.Магнайтай холбоотой зарим нэг материалын хамт 13 хуудас зүйл Төрийн албаны зөвлөлд хүлээлгэн өглөө. Нэг зүйл хэлэхэд, төрийн албаныхан мөн маш ёс зүйгүй байна. Учир нь намайг иргэн хүнийхээ хувьд О.Магнайгийн асуудлаар өргөдөл өгөх гээд ирэхэд орхиод гараад явж байгаа юм. Энд ажил хийж байгаа хүн их ховор байна.