МАН-ын нам дотроо “Шинэчилье” нэртэй хөдөлгөөн байгуулаад багагүй хугацааг өнгөрүүлэв. У.Хүрэлсүхийн л голдуу залуусын хүрээллээс бүрдсэн. Намаа сонгуульд ялагдсаных нь маргааш “Шинэчилье” хөдөлгөөн төрсөн нь ихээхэн эртнээс бэлдэж байсны шинж. Тэгээд ч тэд намаа ялуулах талаар ямар нэгэн томоохон арга хэмжээ аваагүй. Харин ч ялагдахыг нь хүлээж байсан мэт сэтгэгдэлийг төрүүлсэн билээ.

   Харин намаа ялагдсаны маргааш нь гарч ирсэн “Шинэчилье” хөдөлгөөний сураг улам л бүдгэрсээр байна. Зарим эх сурвалжийн мэдээлж байгаагаар бол дөрөв хуваагдсан гэж яригдсан. Өөрсдөө ч энэ талаараа тодорхой тайлбар хийгээгүй өнөөг хүрэв.  
   МАН-ын удирдлагууд шинэчлэгчидээ хүлээн зөвшөөрөхгүй байгаагаа ил далд илэрхийлж ирсэн. Тэр хэрээр МАН-ын шинэчлэгчид бүдгэрсээр байна.
    Нэгэн цагт МАН доторх жигүүр, хөдөлгөөнийхнийг “болдогсон бол дорбинкдчих юмсан” гэж хэлээд дуулиан тарсан Ц.Нямдорж ч бас шинэчлэгчдийнхээ талаар байр сууриа илэрхийлэв. Тэрээр МАН доторх шинэчлэл ярьсан залуусынхаа үйл ажиллагааг шинэчлэлийн Засгийн газрын ажилтай жишиж ярьсан юм. Өөрөөр хэлбэл Шинэчлэлийн нэртэй Засгийн газар гарч ирээд улс орны эдийн засгийн яаж самарч байгаа билээ. Түүн шиг шинэчлэл ярьсан залуус гараад ирвэл МАН-ыг самарч өгнө гэж ил цагаан хэлжээ. “Шинэчлэл ярьдаг болгон сайн байдаг юм биш. Магадгүй хамгийн хорлонтой, хамгийн хуучинсаг хүмүүс шинэчлэл ярьж байж мэднэ” хэмээн байр сууриа тодотгосон. Ц.Нямдорж гишүүний үзэж байгаагаар бол МАН-ын хамгийн хорлонтой, хамгийн хуучинсаг залуус нь шинэчлэл ярьж байгаа бололтой.

    Нэгэн цагт МАН-д жигүүр, хөдөлгөөн гэж нилээд олон юм байгуулагдсан. Бүгд албан тушаалд очоод алга болцгоосон. Тухайн үеийн жигүүр, хөдөлгөөнийхнөөс одоо дуугарч байгаа хүн алга. Бодвол ичиж, санаа нь зовоод хэцүү байдаг биз. Ерөнхийдөө албан тушаалд очих гэж л жигүүр байгуулсан. Тэгээд зорьсондоо хүрсэн татан буугдсан. Түүн шиг МАН-ын одоогийн “Шинэчилье” хөдөлгөөнийхөн албан тушаалд очих гэж л байгуулагдсан. Учир нь тэдэнд ямар ч шинэчлэлийн үзэл санаа концепци байхгүй. Зөвхөн хэрүүл ярьдаг. Дарга нараа шүүмжилдэг. Гэр барьдаг гэсэн гурван ажлыг л амжуулж яваа улс. Тиймээс зорилго нь намынхаа ялагдалыг далимдуулаад намдаа албанд очих. Ахиулж харвал Засгийн газрыг огцруулаад хамтарсан засагт багтчих гэсэн сайн дурын уран сайханчид л МАН-д шинэчлэл хийнэ гэж гүйгээд байгааг нийгэм мэддэг болов.