Сүүлийн өдөрүүдэд МАН-ын томчууд ойр ойрхон хуралдах болсон байна. Тэд удахгүй болж магадгүй ээлжит бус чуулганы үеэр хэрхэн улс төр хийхээ хэлэлцэж эхэлсэн аж. Бас ирэх сард болох намынхаа Их хурлын сценарийг ч гэсэн найруулж байгаа гэнэ. Энэ бүхэн МАН-ын томчуудын ойр ойрхон уулзалдах шалтгаан болжээ.

Эх сурвалжийн мэдээлж байгаагаар бол МАН-ынхан Н.Алтанхуягийн Засгийн газрын асуудлаар чухалчлан ярилцах болсон байна. Эдийн засаг хүндэрч, жижиг аж ахуйн нэгжүүд хаалгаа барьж, хөрөнгө оруулагчид гарч, валютын үнэ өсч эхэлсэн зэрэг нь сөрөг хүчин болох МАН-ынхныг хөдөлгөөнд оруулах үндсэн шалтгаан болсон. Дээр нь Н.Алтанхуяг болохгүй байгаа бүхний шалтгаан нь МАН-ын өмнөх Засгийн газраас үүдэлтэй хэмээн байн байн мэдэгдэх болсон нь сөрөг хүчнийхний уур бухимдлыг төрүүлж эхэлсэн. Тийм учраас МАН-ынхан Н.Алтанхуягийн Засгийн газрыг огцруулах асуудлыг дахин хөндөхөөр үндсэндээ тохироонд хүрчээ.

Гэхдээ Н.Алтанхуягийг огцруулах шоуг сайн хийцгээе. Харин яг огцруулах дээрээ тулвал асуудлыг эргэж ярилцья гэж тохирсон байна. Учир нь Н.Алтанхуяг шиг сул, ил задгай яриатай Ерөнхий сайдтай байх нь манай намд ашигтай гэж ярилцжээ. “Түүний бодлогогүй мэдэгдэлүүд дээр нь улс төрийн тоглолт хийгээд байвал бидэнд л улс төрийн нүүдэл амархан олдоно. Харин түүнийг өөрчлөөд чамбай, хийгүй хүн Засгийн тэргүүн болчихвол тийм боломжууд алга болно” гэх мэтээр олон зүйлийг ярилцсан байна. Өөрөөр хэлбэл МАН-ынхан Н.Алтанхуягийг огцруулбал сайн. Огцруулахгүй байвал бүр сайн гэсэн логик гаргажээ.

Хэдийгээр Н.Алтанхуяг шиг сул задгай Ерөнхий сайдтай байх нь улс төр хийх зорилготой МАН-д ашигтай байж мэднэ. Харин ард түмэнд бол ашиггүй л дээ. Эрх баригчид бүх юм сайхан болж байгаа гэж мэдэгдэж байгаа ч ард түмний амьдрал эсрэгээрээ байна. Бас 2016 оны сонгуулийг харж байгаа АН-д ч Н.Алтанхуяг шиг сул Ерөнхий сайдтай байх нь бодит аюул болно. Тиймээс АН ил задгай яриагаараа алдаршиж байгаа ч эдийн засгийн тодорхой бодлого, боловсролгүй удирдлагатайгаа хариуцлага ярихгүй бол сөрөг хүчин алдаан дээр нь тоглох шинэ стратегийг боловсруулан хэрэгжүүлэх ажилдаа орлоо.