АН-ын нөлөө бүхий бүлэглэлүүд бараг л тохироонд хүрчээ. Дэнжигнэж эхэлсэн гэж шуугиулсан Н.Алтанхуяг ирэх гурван жилдээ суудлаасаа буухааргүй бат бөх бэхэлгээ хийжээ. Бүлэглэлүүдийнхээ арга эвийг амархан олдог гэх Н.Алтанхуяг энэ удаа ч тэднийгээ бас аргалж дөнгөсөн тухай саарал ордноос мэдээллээ. Учир нь түүнийг огцруулах гэсэн сөрөг хүчний шахалт дээр зарим бүлэглэлүүд нь хүч нэмчих гээд байсан юм. Бас эдийн засгийн хямрал, валютын өсөлт зэрэг нь олон түмний бухимдлыг дэвэргэж эхэлсэн. 

Харин өнөөдөр Япон улсыг зорьж буй Ерөнхий сайд Н.Алтанхуяг энэ бүхний учрыг олчихоод хилийн дээс алхаж байгаа аж. Юуны өмнө АН-ын бүлэглэлүүдийн шийдлээр Уул уурхайн сайд Д.Ганхуяг, Эдийн засгийн хөгжлийн сайд Н.Батбаяр хоёроор туг тахихаар ярилцаж эхэллээ. Ингэж Н.Алтанхуяг сайд нараасаа “шүд сугал”-снаар суудалдаа үлдэх боломж нээгдсэн гэсэн үг юм.

Уул уурхайн сайд Д.Ганхуягийн бараанаар хөрөнгө оруулагчид нүүр буруулсан гэж эртнээс яригдаж эхэлсэн. Тэр эртнээс хөрөнгө оруулагчдыг шүүмжилж байсан. Бас Оюутолгойн хөрөнгө оруулалтын гэрээг өөрчилөхөө ил тодоор удаа дараа зарлаж явсан. Энэ бүх үйлдлээс нь болоод хөрөнгө оруулагчид дайжих шалтгаан болсон гэдэг. Тэгээд ч лицензийн наймааг шүүмжилж явсан түүний нэр лицензийн наймаатай холбогдож эхэлсэн тухай мэдээлэл хэвлэлийн хуудас чимж эхэлсэн. Хөрөнгө оруулагчдын 50 гаруй хувь нь гарч явсан гэсэн судалгаа гарах болсон. Үүнийг дагаад эдийн засаг уруудаж ард түмний амьдрал доройтож эхэллээ. Энэ бүхэн Д.Ганхуяг сайдыг суудлаас нь сугалах хангалттай үндэслэл боллоо гэж АН-ынхан ярилцжээ.

Харин Эдийн засгийн хөгжлийн сайд Н.Батбаярыг яагаад Н.Алтанхуяг урдуураа оруулж огцруулах гээд байгаа шалтгааныг олон янзаар тайлбарлаж эхлэв. Юуны өмнө бондын мөнгөний зарцуулалт хэл ам дагуулсаар байна. Энэ нь эцэстээ АН-ын бүлэглэлүүдийн зодооны эх үүсвэр болжээ. Мөн эдийн засгийн уналт эрчимжиж байхад салбар хариуцсан сайд нь уул овоо тахиад “эдийн засгийг өсгөөд өгөөч” хэмээн гуйгаад яваа тухай дэл сул яриа ихэссэн. Үүний зэрэгцээ эдийн засгийг өсгөх талаар салбар хариуцсан сайд нь байр сууриа илэрхийлэхгүй зөвхөн гаднаас ихээхэн хэмжээний зээл авах гэж байгаа талаар л ярьдаг болсон нь олон түмний бухимдлыг нэмж байна. Бас нилээд олон улс төрч түүнийг албаа өгөх хангалттай шалтгааныг бий болгосон хэмээн үзэж байгаа юм. Энэ бүхэн Н.Батбаяр сайдын суудлыг өндөлзүүлэх нь тодорхой болжээ.

Ийнхүү АН-ынхан унаж буй нэр хүндээ зогсоохын тулд хоёр сайдаараа туг тахих ёстой гэсэн байр суурьт нэгджээ. Харин Засгийн газарт эртнээс шүүмжлэлтэй хандаж эхэлсэн Ерөнхий сайд асан Р.Амаржаргалыг Эдийн засгийн хөгжлийн сайдаар томилно гэж ярьсан байна. Уул уурхайн сайдад хэнийг санал болгохоо тохироогүй ч урьдчилсан байдлаар УИХ-ын гишүүн Ж.Батзандангийн нэрийг зарим хүмүүс санал болгосон сураг гарлаа.