Хөрөнгө оруулалтын тухай хуулийн төсөл болон Хөрөнгө оруулалтын сангийн тухай хуулийн төслийг Засгийн газраас УИХ-д 2013 оны 9 дүгээр сарын 10-ны өдөр өргөн барилаа. Засгийн газрыг төлөөлөн УИХ-ын гишүүн, Эдийн засгийн хөгжлийн сайд Н.Батбаяр уг хуулийн төслүүдийг УИХ-ын дарга З.Энхболдод гардуулав.

“Хөрөнгө оруулалтын хууль”-ийн төслөөр дараах томоохон зарчмын асуудлыг зохицуулахаар тусгажээ. Үүнд:

    Хөрөнгө оруулагчийг гадаад, дотоод гэж ялгаварлахгүй нийтлэг эрх зүйн зохицуулалт, хамгаалалт, баталгааг бий болгох;
    Одоогийн эрх зүйн зохицуулалтад стратегийн ач холбогдол бүхий салбарт 1/эрдэс баялаг 2/банк, санхүү 3/хэвлэл мэдээлэл, харилцаа холбоо гэсэн салбаруудыг хамааруулж байсныг өөрчилж, стратегийн салбар гэж тусад нь ялгахгүй байх;
    Гадаадын хөрөнгө оруулагчийг ерөнхийд нь хувийн болон төрийн гэж ангилж, хувийн хөрөнгө оруулалтыг бүртгэлийн журмаар зохицуулах, харин төрийн өмчит гадаадын хөрөнгө оруулалтын хөрөнгийн хэмжээ тухайн аж ахуйн нэгжид 25 хувиас дээш гарах тохиолдолд эрхэлсэн яамнаас зөвшөөрөл өгч байх;
    Гадаад, дотоодын хөрөнгө оруулалтыг татахын тулд төслийн үр ашиг дээр нь тулгуурлан тодорхой хугацаанд татварыг нь тогтворжуулах тогтолцоог тусгажээ. Хөрөнгө оруулалтын хэмжээ нь 15 тэрбум төгрөгөөс давсан, эдийн засгийн хөгжилд нийцтэй, байгаль орчинд ээлтэй, шинэ технологи нэвтрүүлсэн, ажлын байр нэмэгдүүлсэн төслүүдэд 5-10 жилийн хугацаанд зарим татварын хувь хэмжээг тогтвортой байлгах;
    Түүнчлэн, олон улсын туршлагын дагуу гадаадын хөрөнгө оруулалтыг татах, өөрийн улсын хөрөнгө оруулалтын орчны талаар бүх талын мэдээлэл, сурталчилгааг явуулах агентлагийг байгуулахаар тус тус тусгажээ.

“Хөрөнгө оруулалтын сан”-гийн тухай хуулийн төсөлд манай улсын санхүүгийн зах зээл дээр туйлын үгүйлэгдэж байгаа хөрөнгө оруулалтын сангуудын үйл ажиллагааг зохицуулах асуудлыг тусгасан байна. Энэ хууль батлагдсанаар иргэд зөвхөн арилжааны банкинд хадгаламж байршуулахаас гадна төрөөс нарийвчлан зохицуулсан хөрөнгө оруулалтын сангуудаар дамжуулан хувьцаа, Засгийн газрын бонд зэрэг өндөр өгөөжтэй хөрөнгө оруулалтын хэрэгслүүдэд мэргэжлийн компанийн удирдлагаар хөрөнгө оруулах боломж бүрдэх юм. Ингэснээр Монгол Улсын санхүүгийн зах зээл нэг биш, хоёр хөлтэй болж бэхжих суурь тавигдах бөгөөд үндэсний компаниуд хөрөнгө оруулалтаа банкны зээлээс бусад төрлөөр татах өргөн боломж нээгдэх ажээ.

Эдгээр хуулийн төсөл нь Монгол Улс хөрөнгө оруулалтын эрх зүйн орчныг тогтвортой байлгах, гадаад, дотоод гэж ялгахгүйгээр хөрөнгө оруулагчдыг дэмжих, Монгол Улсад ашигтай төслийн татварын орчинг тогтворжуулах замаар хөрөнгө оруулалтын үр ашгийг нэмэгдүүлэх, улмаар төрийн хүнд суртлыг бууруулж, бизнесийн орчныг сайжруулах зэрэг чухал  холбогдолтой гэж Засгийн газраас үзсэн байна.
- See more at: http://zasag.mn/m/med/view/2916#sthash.uPb7pCCg.dpuf