УИХ-ын ээлжит бус чуулганы нээлтийн дараа УИХ дахь МАН-ын бүлэг хуралдав. МАН-ын бүлэг ээлжит бус чуулганаар хэлэлцэх таван хуулийн төсөлтэй холбогдуулан ажлын хэсэг байгууллаа. Ээлжит бус чуулганы тухайд МАН-ын бүлгийн байр суурь тодорхой байгаа. Улс орны эдийн засаг, санхүүгийн байдал хүндэрч буйтай холбогдуулан УИХ-ын ээлжит бус чуулган зарлан хуралдуулах, Засгийн газраас хүндрэлийг даван туулах яаралтай арга хэмжээ авах, УИХ-ын зүгээс үүссэн нөхцөл байдлыг хүндрүүлэхгүй байх чиглэл өгч ажиллах талаар өнгөрөгч наймдугаар сарын эхээр УИХ-ын удирдлагад шаардлага хүргүүлсэн боловч хүлээж аваагүй.
    Гэхдээ МАН-ын бүлгийн тавьж байгаа шаардлагын дагуу энэхүү ээлжит бус чуулганаар эдийн засгийн хүндрэлийг хэрхэн даван туулах, бараа бүтээгдэхүүний үнэ ханш, ам.долларын өсөлт, төсөв тасарч буйн учир шалтгааныг тал бүрээс нь нягтлан хэлэлцэх хүлээлттэй байгааг МАН-ын бүлгийн дарга Н.Энхболд онцоллоо. Мөн өмнөх Засгийн газар руу хамаг буруугаа чихдэг одоогийн эрх баригчдын байр суурьтай санал нийлэхгүй гэдгээ хэлсэн юм. Олон төр засгийн тууштай бодлого, шийдвэрийн үр дүнд сүүлийн жилүүдэд Монголыг зорих гадаадын хөрөнгө оруулагчдын урсгал мэдэгдэхүйц нэмэгдэж, эдийн засагт эерэгээр нөлөөлж ирсэн.
   Өмнөх парламентын үед Ардчилсан нам хамтарсан Засгийн газарт ажиллаж байсан, улс орны хувь заяатай холбоотой олон асуудлыг хамтдаа шийдэж байсан. Нөгөө талаар Ардчилсан нам УИХ-аар хэлэлцэж байгаа ямар ч асуудлаар завсарлага авах бүрэн эрхтэй сөрөг хүчин байсан атлаа зөвхөн МАН-ын буруу мэтээр ярьж сурталчлах нь зохисгүй. Тухайн үед одоо шүүмжлэлд өртөөд байгаа хууль, шийдвэр, бодлогыг хэлэлцэж байхад нь зогсоох механизм одоогийн олонхид бүрэн байсныг тэрээр онцоллоо. Ялангуяа байгуулагдсанаас хойш жилийн нүүр үзэж буй Засгийн газрын үйл ажиллагаа, бодлогогүй, тооцоо судалгаагүй, ихээхэн хэмжээний мөнгө зарцуулсан боловч үр дүн нь тодорхойгүй шийдвэрүүд эдийн засаг хүндрэхэд нөлөөлж байгаа.
   Түүнчлэн сайд нарын мэдэгдэл, хэлж ярьж байгаа зүйл нь хөрөнгө оруулагчдад эргэлзээ төрүүлж эхэлсэн. Тухайлбал, жилийн дотор валютын нөөц багасч, гаднын хөрөнгө оруулалт 40 гаруй хувиар буурсан. Олон их наяд төгрөгийн өртөгтэй Үнэ тогтворжуулах хөтөлбөр хэрэгжүүлсэн боловч өргөн хэрэглээний бараа бүтээгдэхүүний үнэ өссөөр байна. Энэ хөтөлбөр долларын ханшийг хөөрөгдөхөд тодорхой хэмжээгээр нөлөөлсөн. Эрх баригчид жилийн хугацаанд их хэмжээний мөнгөөр хэмжигдэх олон хөтөлбөр хэрэгжүүлсэн хэрнээ үнийн өсөлт, ам.долларын ханшийг барьж чадахгүй, тэгсэн мөртлөө өөрсдийгөө сайн ажиллаж байгаа гэж хэлэх нь учир дутагдалтай гэж МАН-ын бүлгийн дарга Н.Энхболд хэллээ.
Үүнээс гадна эдийн засгийн нөхцөл байдалтай холбоотой тоонууд янз бүр байгаа учраас ээлжит бус чуулганы хугацаанд тал талаас нь нягталж ярилцах шаардлага бий болоод байна. Тийм учраас УИХ дахь МАН-ын бүлэг Засгийн газар, Монголбанк, Үндэсний статистикийн хорооноос хамгийн сүүлийн үеийн тоо баримтыг авч, үүсээд буй нөхцөл байдалд үнэлэлт дүгнэлт өгөх юм. Мөн МАН-ын бүлэг эдийн засагт үүсээд буй хүндрэл бэрхшээл, нөхцөл байдлын талаар мэдэгдэл гаргахаар бэлтгэж байна.
    УИХ-ын гишүүн Ч.Хүрэлбаатар МАН-ын бүлгээс эдийн засгийн алдаатай бодлогоо засахыг эрх баригчдад өнгөрөгч дөрөв, тавдугаар сард удаа дараа сануулж байсныг хэвлэлийн бага хурлын үеэр дахин сануулсан юм. Хэрвээ тухайн үед Ардын намын тавьж буй асуудалд эрх баригч хүчний зүгээс зөв онош тавьсан бол өдгөө үүсээд байгаа асуудлыг УИХ-ын хаврын чуулганаар шийдчих боломж байсныг тэрээр онцолсон. МАН-ын бүлэг валютын нөөцтэй холбоотой асуудлыг "Блүүмбэрг" сайтад тавьсан мэдээлэлд үндэслэн тавьж, Монголбанкинд шалгалт хийх ажлын хэсэг байгуулахыг УИХ-ын даргаас удаа дараа шаардсан боловч хүлээж аваагүй. Ийм ил тод бус байдал эргээд төрийн бодлогод сөргөөр нөлөөлөх аюултайг ч Ч.Хүрэлбаатар гишүүн хэлж байлаа.  Дашрамд дурдахад, УИХ-ын сонгуулиар Увс аймагт МАН-аас нэр дэвшиж сонгогдсон хоёр гишүүнтэй холбоотой асуудал шүүхээр эцэслэн шийдэгдэж, цэг тавигдсаныг энэ үеэр сэтгүүлчдэд мэдээллээ.
    Хөдөө, орон нутагт ажилласан УИХ-ын гишүүдэд тухайн орон нутгийн иргэд санал хүсэлтээ дайжээ. Тухайлбал, бензиний үнэ өсөхгүй гэж мэдэгдсэн Ерөнхий сайд, Уул уурхайн сайдын амлалт яагаад орон нутагт хэрэгжихгүй байгаагийн учрыг иргэд асууж сурагласан байна. Баян-Өлгий аймагт гэхэд нэг литр бензин 2500 төгрөгт хүрээд саяхнаас 2000 төгрөгөөр зарагдаж байгаа аж. Гэхдээ албаны хүмүүсийн зарлаж байсан үеэс 100-150 төгрөгөөр нэмэгдчихлээ, Ерөнхий сайдын амлалт хаачив аа гэж эрх баригчдаас иргэд асууж тодруулах болжээ.