Эдийн засгийн байнгын хороо өнөөдрийн үдээс өмнөх хуралдаанаараа Засгийн газраас санаачлан боловсруулж өргөн мэдүүлсэн Хөрөнгө оруулалтын тухай хуулийн төсөл, Гадаадын хөрөнгө оруулалтын тухай хуулийг хүчингүй болсонд тооцох тухай, Стратегийн ач холбогдол бүхий салбарт үйл ажиллагаа явуулж байгаа аж ахуйн нэгжид гадаадын хөрөнгө оруулалтыг зохицуулах тухай хуулийг хүчингүй болсонд тооцох тухай, тэдгээрийг дагалдан зарим хууль, тогтоомжид нэмэлт, өөрчлөлт оруулах тухай төслүүдийг чуулганы нэгдсэн хуралдаанд оруулж хэлэлцэхээр шийдвэрлэж, гишүүн Д.Зоригтоор ахлуулсан ажлын хэсэг байгуулахаар болсон юм.

   Байнгын хороо үдээс хойш үргэлжлэн хуралдаж, эхлээд Хөрөнгө оруулалтын сангийн тухай хуулийн төсөл, Аж ахуйн нэгжийн орлогын албан татварын тухай хуульд нэмэлт оруулах тухай, Компанийн тухай хуульд нэмэлт оруулах тухай, Үнэт цаасны зах зээлийн тухай хуульд өөрчлөлт оруулах тухай, Инновацийн тухай хуульд өөрчлөлт оруулах тухай хуулийн төслүүдийн хэлэлцэх эсэхийг хэлэлцэв.

  Энэ талаарх хууль санаачлагчийн илтгэлийг Засгийн газрын гишүүн, Эдийн засгийн хөгжлийн сайд Н.Батбаяр танилцуулав. Энэ хуулиар хөрөнгө мөнгөтэй аж ахуй нэгж, хувь хүмүүс зөвхөн банкинд мөнгөө хадгалуулж, банкнаас зээл авах биш өөрсдөө хөрөнгө оруулалтын сан байгуулан үнэт цаасны арилжаанд оролцож Засгийн газрын бонд, компаниудын үнэт цаасыг худалдан авах төдийгүй уг сангаасаа зээл авах нөхцөл бүрдэх юм байна. Сан нь хамтын хөрөнгө оруулалтын, хувийн хөрөнгө оруулалтын сан гэсэн төрөлтэй байх агаад хувийн хэвшил дээр суурилсан, үүсгэн байгуулагч нь мэргэжлийн байгууллага байх, эрсдлээ өөрсдөө даах, сангийн хөрөнгө нь тусгай дансанд төвлөрдөг байхаар төсөлд тусгажээ. Санхүүгийн зохицуулах хороо сангийн бүхий л үйл ажиллагаанд хяналт тавьж, сан байгуулах тусгай зөвшөөрөл олгож байх аж.

   Төсөл санаачлагчийн илтгэлтэй холбогдуулан асуулт асууж тодруулсан гишүүд эрсдлээ өөрсдөө даана гэчихээд дараа нь төр буруу шийдвэр гаргасан гэж татвар төлөгчдийн мөнгөөр хохирлоо барагдуулах гэдэг өмнөх гашуун туршлагыг санаж, хуулийн төслийн хэлэлцүүлгийн дараагийн шатанд нухацтай хандахыг сануулж байв.

  Ингээд хуулийн төслүүдийг чуулганы нэгдсэн хуралдаанд оруулж хэлэлцүүлэхийг байнгын хорооны хуралдаанд оролцсон гишүүдийн олонх нь дэмжлээ.

   Дараа нь Алтны худалдаанд ил тод байдлыг бүрдүүлэх тухай хуулийн төсөл, Ашигт малтмалын тухай хуульд нэмэлт, өөрчлөлт оруулах тухай хуулийн төслийн хэлэлцэх эсэх асуудлыг хэлэлцэж эхлэх үед гишүүн Я.Содбаатар уг төслийг хаалттай хэлэлцэх горимын санал гаргасныг байнгын хорооны гишүүд дэмжсэнээр хуралдаан хаалттай горимд шилжсэн юм.

   Байнгын хороо дараа нь Түгээмэл тархацтай ашигт малтмалын тухай хуулийн төсөл, Аж ахуйн үйл ажиллагааны тусгай зөвшөөрлийн тухай хуульд нэмэлт оруулах тухай, Улсын тэмдэгтийн хураамжийн тухай хуульд нэмэлт оруулах тухай, Ашигт малтмалын тухай хуульд өөрчлөлт оруулах тухай хуулийн төслүүдийн хэлэлцэх эсэхийг хэлэлцээд чуулганы нэгдсэн хуралдаанд оруулж хэлэлцүүлэхээр боллоо.

   Нийтдээ 10 бүлэг, 44 зүйлтэй энэхүү хуулийн төсөлд түгээмэл тархацтай ашигт малтмалын хайгуулын болон ашиглалтын тусгай зөвшөөрөл олгох үйл ажиллагааг аймаг, нийслэлийн Засаг дарга хэрэгжүүлэх бөгөөд тухайн талбай нь бусад талбайтай давхцал бий эсэх талаар төрийн захиргааны байгууллагаас цахим хэлбэрээр мэдэгдэл авахаар тусгажээ. Мөн ашигт малтмалын нөөц ашигласны төлбөрийг түгээмэл тархацтай ашигт малтмалын төрөлд 2.5 хувь байх, тусгай зөвшөөрлийн төлбөрийн хэмжээг талбайн хэмжээтэй уялдуулан тогтоодог байхаар тусгасан байна.

  Дараа нь Эдийн засгийн болон Төсвийн байнгын хорооны хамтарсан хуралдаанаар Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай, Ашигт малтмалын тухай хуульд нэмэлт оруулах тухай хуулийн төслүүдийн хэлэлцэх эсэхийг хэлэлцээд төслүүдийг чуулганы нэгдсэн хуралдаанд оруулж хэлэлцүүлэхийг дэмжлээ гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.