Хөрөнгө оруулалтын тухай хуулийн төсөл болон дагалдах хуулиудыг хэлэлцэж байна. Гишүүд уг хуулийн төслийн талаар асуулт асууж, санал бодлоо хэллээ.УИХ-ын гишүүн Су.Батболд: Эдийн засгийн нөхцлөөр далимдуулж тодорхой хүмүүс, компаниудын лоббигоор энэ хууль орж ирж байна. Хэдэн компанид ашигтай болохоос ард түмэнд наалдсан заалтыг олж харсангүй.
УИХ-ын гишүүн Н.Батбаяр: Энэ хуулинд бүх татварыг биш зөвхөн дөрвөн төрлийн татварыг тогтвортой байлгах гэрчилгээ олгохоор заасан байгаа. Тодруулбал тогтворжуулах гэрчилгээ авахад энэ дөрвөн татвар ямар хэмжээтэй байсан түүгээрээ 10 жил явна гэсэн үг. Ямар нэг хөнгөлөлт, чөлөөлөлт гэж байхгүй. Хуучин зөвхөн гадаадын гэж байсан бол энэ хуулинд гадаад, дотоодын хөрөнгө оруулагч гэж ялгахгүй байгаа. Харин шинэ төрлийн татвар гарч ирвэл бусадтай л адил үйлчилнэ.
УИХ-ын гишүүн Б.Бурмаа: Энэ хуулийн төслийн гол шалгуур нь байгаль орчны үнэлгээг хийх. Тэгэхээр хэн үнэлгээ хийх вэ? Иргэд хэрхэн оролцох вэ гэдгийг тодорхой болгох хэрэгтэй байна. Хэрэв үүргээ биелүүлээгүй бол хөрөнгө оруулагч нарт ямар хариуцлага тооцох вэ гэдэг нь мөн тодорхойгүй байна. Торгууль нь дээд тал нь 30 сая төгрөг болж байна. Том хөрөнгө оруулагчид бол 30 сая юу ч биш гэв. Харин хуулийг санаачлагч Эдийн засгийн, хөгжлийн яамны сайд Н.Батбаяр "Хариуцлагын хэмжээний тухайд Б.Бурмаа гишүүнтэй санал нэг байна. Цаашид энэ асуудалд анхааръя" гэв.
УИХ-ын гишүүн С.Дэмбэрэл: Ганцхан жилийн хөрөнгө оруулалт 42 хувиар буурсанд сандарч, ийм хууль оруулж байна. Хөрөнгө оруулалтын 70-80 хувь нь уул уурхайн салбарт байдаг. Салбарын зохицуулалт нь яасан юм бэ? гэлээ.
Хуулийн төслийн хэлэлцүүлэг үргэлжилж байна.
