Урт нэртэй хуулийн хэрэгжилтийг эсэргүүцэн, жагсаал зохион байгуулсан “Гал үндэстэн” холбооны тэргүүн Ц.Мөнхбаяр тэргүүтэй хүмүүс галт зэвсэг барьж, гудамжинд тэсрэх хэрэгсэл байрлуулан, иргэдийг айлган цочроосон хэрэг даваа гаригт гарсан билээ. Тэгвэл эдгээр нөхдүүдээс өдгөө таван хүнийг цагдан хорьж эрүүгийн хэрэг үүсгэсэн. Мөн тус холбооны тэргүүн Ц.Мөнхбаярын гэрт нэгжлэг хийж эхнэрээс нь байцаалт авсан байгаа. Тэгвэл хэрэг бүр даамжирч тухайн өдөр сурвалжлага хийсэн сэтгүүлчдийг хүртэл мэдүүлэг өгөхийг шаардсан гэх мэдээлэл ч байна.

Ямартаа ч тэднийг байцаагдаж байх зуур зарим нэг хүмүүс “Гал үндэстэн” холбооныхны эсрэг мэдүүлэг өгч эхэлсэн байгаа. Өөрөөр хэлбэл тус холбоо нь эх орныхоо баялгийг хамгаалж, уул ус газар шорооныхоо төлөө тэмцэж байгаа нэрийдлээр уул уурхайн компаниудыг заналхийлж мөнгө төгрөг нэхдэг байсан гэдгийг илчилсэн.
Мөрдөн байцаалтын явцад ч Увс, Ховд, Өвөрхангай гээд л хөдөө орон нутгуудаар явж уул уурхай, бичил уурхай эрхлэгчдийг дарамталж олон арван саяаар нь мөнгө авдаг байсан нь тогтоогдоод байна.  Одоогоор гэрчүүдээс мэдүүлэг авахаар ТЕГ-т дуудаж ирүүлээд байгаа юм.

“Гал үндэстэн”-ийнхний ингэж дураарай авирлах болсон нь Ерөнхийлөгчийн сонгуульд нэр дэвшсэн Б.Бат-Эрдэнэтэй холбоотой гэж үзэх хүмүүс ч цөөнгүй байна. Учир нь Б.Бат-Эрдэнэ “Би алт ухахгүй, авлига авахгүй, архи үйлдвэрлэхгүй, миний гар цэвэр” гэж сонгуулийн шоугаа эхлүүлж, алт ухах, уурхайд ажиллах нь гэмт хэрэг мэтээр ярьж байв. Тиймээс ч тэрбээр өдгөө Гал үндэстэн холбооныхны хийсэн үйлдлийг дэмжиж байгаа ганц улс төрч болчихоод сууж байна.

Мөн тэрбээр Урт нэртэй хуулийг дэмжиж, өөрчлөлт оруулахыг эсэргүүцэж байгаа хүмүүсийн нэг. Тийм ч болохоор эдгээр төрийн бус байгууллага, хөдөлгөөнүүдийн үйл ажиллагааг дэмждэг. Гэтэл түүний хамгийн их дэмждэг “Гал үндэстэн” холбооныхон нь өдгөө Төрийн ордонруу буу шагайж, гар бөмбөг хаяж явна.

Ер нь зарим улс төрчид уул уурхайг байж боломжгүй зүйл мэтээр ард иргэдэд тайлбарладаг. Тэгсэн хэрнээ өөрсдөө гадны орныхонд газар нутгаа зараад, ашигт малтмалын олборлолт хийлгээд байдаг. Харин гадныхны ухаж хаясан газар дээр манай бичил уурхайчид ажиллаж ажлын байрыг бий болгож бас амжиргаагаа дээшлүүлдэг. Тэгэхээр улс төрчид амаараа хоосон ярьж, зарим нэг хүмүүсийн тархийг угааснаас болж  тэдгээр хүмүүс нь өдгөө галт зэвсэг барьж төрийн тусгай хамгаалалттай газар луу дайрч байна.