АН хамгийн олон бүлэглэл, фракцтай. Тэдгээрийгээ ч албан ёсоор хүлээн зөвшөөрдөг. Тэгвэл АН нэгэн шинэ жишүүрээр бүл нэмэхээр болов. Гэхдээ энэ жигүүр илүү хорлонтой, илүү их гомдогсодын армиас бүрджээ. Юуны өмнө тэд Засгийн газрыг хөдөлгөөнд оруулахаар МАН-тай хамтрахаар ярилцаж эхэлжээ. Ядаж л яригдаад байгаа Эдийн засгийн хөгжлийн сайд Н.Батбаяр, Уул уурхайн сайд Д.Ганхуяг хоёрыг огцруулж оронд нь очих ёстой гэсэн төлөвлөгөөгөө МАН-ынхантай хуваалцсан гэж эх сурвалж мэдээллээ. Чадал нь хүрвэл Н.Алтанхуягийг солихоор ярилцжээ. Учир нь АН-ын дүрмэнд намын даргыг дөрвөн жил тутам Их хурлаараа сонгох эсвэл баталгаажуулах ёстой гэсэн заалт байдаг аж. Үүнийг хэрэгжүүлэхийг шаардахаар төлөвлөсөн байна. Учир нь Н.Алтанхуяг АН-ын дарга болоод дөрвөн жилээ аль хэдийн өнгөрөөсөн боловч дахин баталгаажуулаагүй гэнэ. Тиймээс даргын асуудлаа дүрмийн дагуу ярилцья эсвэл Н.Алтанхуягаа баталгаажуулья хэмээн удирдлагуудаа тэвдүүлэх зорилгыг өмнөө тавьжээ. Өнгөц харвал дүрмийн дагуу Н.Алтанхуягаа баталгаажуулья гэж байгаа боловч өнгийж харвал албан тушаалын наймаа хийх гэсэн далд санаархал нь мэдрэгдэхээр байна. Аргаа барахад л дүрэм ярьж рейтинг муутай байгаа Н.Алтанхуягийнхаа алдарыг шороотой хутгах нь тодорхой боллоо. Тийм учраас л АН-ын албан тушаалд очиж чадаагүй гомдогсодын жигүүрийг илүү хорлонтой гэж тодорхойлж байна. Өөр нэгэн ноцтой мэдээлэл байгаа нь УИХ дахь АН-ын цөөнгүй гишүүд шинээр байгуулагдах жигүүрийнхээ эх зохиолыг бичиж, ховыг хутгаж, жорыг найруулж эхэлсэн гэнэ.

Гэвч энэхүү жигүүр мэндэлж байгаагаа өнөөдөр зарлахаар товлосон. Гэхдээ намын гишүүд, олон нийтийг төөрөгдүүлэхийн тулд уран гоё тайлбаруудыг хийхээр бэлдсэн байна. Юуны өмнө АН-ын шинээр байгуулагдах жигүүр намаа эрүүлжүүлэх, намын дэргэдэх бүх төрийн бус байгууллагын төлөөллийг оролцуулах, намд байгаа бүх бүлэглэлийн төлөөллийг ижил тэгш оролцуулж байгаа, өөрсдийгөө фракц биш жигүүр гэж нэрлэхээр болсон гэх мэт утопи зүйлсийг ярихаар бэлджээ.

Мөн АН-ын нэрээр эрх мэдэлд хүрчихээд гишүүдээ харж үзэхгүй байгаа лидерүүдийнхээ нэрийг зарлана гэсэн шантаажыг ч хийх гэнэ. Шинээр АН-д төрж байгаа жигүүрийнхэн одоогийн намынхаа удирдлагуудыг “албан тушаалдаа ханаж цадаад бялуурчихаад байна” гэсэн тодорхойлолтыг өгч эхэлсэн гэж дуулдлаа. Өөрөөр хэлбэл бидний ээлж болсон гэсэн мессеж юм уу даа. Мөн МАН-ын тогоо руу өнгийж авлигачдыг нь ч адилхан зарлана гэж улс төржиж байгаа аж.

АН-ын шинэ жигүүрийнхэн өөр нэгэн томьёлолыг гаргаж байгаа нь АН энэ чигээрээ яваад байвал 2016 онд навсайтлаа ялагдана. Тиймээс 2016 оны ялагдлаас намаа аврахын тулд жигүүрийг байгуулж, удирдлагууддаа сануулж, сэрүүлэх зүйлсийг нь зөвлөх гэнэ.

Ийнхүү эрх баригч намын дотор шинэ жигүүр байгуулагдлаа. Жигүүр аль хэр өндөрөө авах, яаж улс төр хийх, МАН-тай хоршсон тоглолтыг хэрхэн үзүүлэх хор найруулсныг ирэх өдрүүдэд харах л үлдэж байна даа.