Гадаад харилцааны сайд Л.Болд, УИХ-ын гишүүн М.Батчимэг болон холбогдох яамд, агенлагийн мэргэжилтнүүд есдүгээр сарын 19-ний өдөр Монгол-Хятадын улсын хилийн Шивээхүрэн, Гашуун сухайт боомтын үйл ажиллагаатай танилцлаа.

Сайд Л.Болд, УИХ-ын гишүүн М.Батчимэг нар нүүрсний тээвэрлэлт, боомтын дэд бүтцийн хөгжил, хил дамнасан төмөр зам, авто зам зэргийг байгаль орчны асуудлыг хөндөхгүйгээр хэрхэн уялдуулан зохицуулах талаар Өмнөговь аймгийн удирдлагууд болон боомтод үйл ажиллагаа явуулж буй хилийн хяналт шалгалтын байгууллагын удирдлагуудтай уулзаж мэдээлэл, санал солилцсон байна. Түүнчлэн хятадын талын Сэхээ, Ганц мод боомтуудад очиж, хил дамнасан төмөр замын бүтээн байгуулалт болон зураг төсөлтэй танилцжээ.

Эдгээр боомтын нэвтрүүлэх чадавхийг нэмэгдүүлэх, үйл ажиллагааг эрчимжүүлж төмөр замыг ашиглалтанд оруулах нь хоёр улсын худалдаа, эдийн засгийн хамтын ажиллагаанд төдийгүй хил орчмын бүсийн бизнес эрхлэгчдийн гадаад худалдаа, хоёр орны иргэдийн хил нэвтрэх нөхцөлд эерэгээр нөлөөлөх юм гэж Гадаад харилцааны яамнаас мэдээллээ.