Их хэмжээний мөнгийг эхнэрийнхээ дансанд нуусан, өөрөө олон тэрбумын тендер идэж уусан Ё.Отгонбаяр гишүүнийг шалгаж байгаа хүн байхгүй гэнэ.  Тэрбээр, намайг прокуророос дуудаж байцаасан зүйл байхгүй, эхнэрийн хэргийг Мөрдөн байцаах шатанд шалгаж дуусаад прокурорт шилжүүлсэн гэх тайлбарыг хэвлэл мэдээлэлд өгч байна.  

Ё.Отгонбаяр өмнө нь шалгагдаж байхдаа миний өмгөөлөгч намайг аль болох дуугүй байх ёстой. Таны хэлж ярьж байгаа бүхэн өөрийн чинь эсрэг чиглэх учраас хэвлэлд ярилцлага өгч, жиргэж болохгүй гэсэн хэмээж байв.  Харин эрхэм гишүүн өнгөрсөн долоо хоногоос жиргээндээ эргэж нэгдсэн бөгөөд тун хурц, хурц асуудлаар жиргэж, чуулган дээр ч ам хуурайгүй ярьж байна.  Ганцхан жишээ дурдахад л МАН-ын бүлгийн хурлын чуулган дээр АН-аас асуудал асуугаад л нэлээн чанга дуугарч эхэлсэн юм.

Тэгэхээр гишүүний хувьд асуудлаа шийдчихсэн үү, аль эсвэл Ё.Отгонбаярын хэргийг хэн ч тоож хэлэлцэлгүй орхив уу гэдэг нь анхаарал татаж байна.

Уг нь тэдэнд холбогдох хэргийг АТГ-аас УМБГ руу шилжүүлж, Ё.Отгонбаярыг бусдад авлига өгөхийг завдсан, бусдыг хэн нэгэнд захиалга өгч дарамтлуулсан гэдэг үндэслэлээр шалгах явцад Багшийн хөгжлийн ордныг улсын төсвийн хөрөнгөөр бариулахдаа хууль зөрчиж, улсад ихээхэн хэмжээний хохирол учруулсан гэх зүйл анги нэмэгдсэн мэдээлэл байдаг.  Гэвч УИХ-ын гишүүний бүрэн эрх гэгчээр халхавчлан түүнээс зөвхөн тайлбар л авсныг эх сурвалжууд мэдээллэж буй юм.

Хууль хяналтынхан хэргийг шалгаж 30 гаруй данс нуусан, бусдаас авлига өгөхийг шаардсан, дарамталсан зэрэг нь бараг нотлогдоод байгаа болохоор тэрээр УИХ-ын гишүүний бүрэн эрхээс татгалзаж, шалгуулах нь зүйд нийцнэ гэх хүмүүс олон байгаа.  Гэсэн ч тэрбээр өнөөдөр чуулганы танхимд юу ч болоогүй мэт гэмгүй царайлаад суусаар байгаа юм.

Ямартаа ч Ё.Отгонбаярын хэрэг замхарч байгаа нь дарга нарын хэрэг дампуураад дуусдагийн нэг жишээ болж байх шиг. Ер нь дарга нарын хэрэг олны өмнө ил гарч нэг хэсэгтээ л шуугиан тарьчихаад улмаар намжиж явсаар алга болдог бичигдээгүй хууль манайд тогтсон гэхэд бараг болно. Тэгэхээр  хаана шалгагдаад байгаа нь ч тодорхойгүй чулуу хөөлгөсөөр яваад Ё.Отгонбаяр нарт холбогдох хэрэг ч замхарчих вий гэж олон нийт хардаж байна.  Энэ нь Ё.Отгонбаяр намайг шалгаагүй гэж хэлснээс улбаалсан хэрэг.

 Харин Хууль зүйн сайд Х.Тэмүүжин Ё.Отгонбаярын хэрэг замхараагүй гэж өнгөрсөн долоо хоногийн сүүлчээр олон нийтэд зарласан юм. Тэрбээр "тэр хүн юу гэж тайлбарлах нь тухайн хүний асуудал. Хуулийн байгууллага хийх ажлаа хийж байгаа" гэв.