Ерөнхий сайд Н.Алтанхуяг ипотекийн зээлийн урьдчилгаа төлбөрийг хоёр дахин нэмсэн “Хас” банкийг жижиг банк хэмээн тодорхойлсон. Харин Засгийн газрын тэргүүн маань Монголын банкуудын дунд байр сууриа олсон “Хас” банкийг яагаад ингэж цоллох болов?

Хичээлийн шинэ жил эхэлж, оюутан сурагчид цугларсан есдүгээр сарын эхний долоо хоногийн хамгийн дуулиантай үйл явдал нь хэсэг эрхмүүд Төрийн ордон луу салаавч гаргасан хэрэг байлаа. Энэхүү соёлгүй жагсаалыг “Хас”-ийн Ч.Ганхуяг ахалсан юм.  Сангийн сайд асан тэрээр үүнээс хойш Хас биш, талх ч биш салаавч гэдэг хочтой болсон. Салаавч гаргах үйл ажиллагааг Ч.Ганхуяг ахалж, Төрийн ордны баруун, зүүн хоёр талаас УИХ, Засгийн газарт зориулан салаавч гаргасан юм. Энэ үеэрээ тэрээр “Ам.доллар 1700 төгрөг боллоо. Ажлаа хийж чадахгүй байгаа Ерөнхий сайд аа май” хэмээн хашгирч, Төрийн ордон болон түүнийг тэргүүлж буй Н.Алтанхуягт зориулан салаавч өгсөн юм.

Ч.Ганхуяг салаавч өгсөн шалтгаанаа “УИХ хурдан хуралдах ёстой. Тэд наадаж, цэнгэх гэж сонгогдоогүй байлтай. Ард түмний итгэлийг хүлээж гарч ирсэн юм бол одоо ажлаа хийх хэрэгтэй. Монголын иргэд дэндүү хүлцэнгүй байна. Хямрал болох гэж байхад улстөрчид нь наадаж, цэнгээд л явж байгаа нь арай дэндлээ” хэмээн хэвлэлд ярьсан байна. Мөн “Ардчилсан улсад ийм эрх баригчид  хэрэггүй” хэмээн хэлсэн нь Н.Алтанхуягийг юм хийдэггүй хэрэггүй нөхөр гэсэн санаагаа давтан хэлж буйг баталсан.

Энэхүү үйл явдлын дараахан “Хас” банк Засгийн газрын үйл ажиллагааг эсэргүүцэж байгаа мэт нэгэн шийдвэр гаргасан нь иргэдийн дургүйцлийг ихэд хүргээд байна. “Хас” банк нийслэлийн хэмжээнд олгогдож буй найман хувийн орон сууцны зээлдээ 50 хувь, орон нутагт 60 хувиар тооцон урьдчилгаа авахаар зээлийн дотоод журам батлаж, хэрэгжүүлж эхэлжээ. Мөн уул уурхайн салбарынханд зээл олгохгүй хэмээн мэдээлсэн байна. Байр худалдан авахаар урьдчилгаагаа хийх гэж хуруу хумсаа хугалах шахам гүйж буй иргэдэд “Хас банк”-ны санал болгож буй үнийн дүн, ажил мэргэжлээр ялгаварлах үзэл огтоос таалагдаагүй хэвээр байна.

Харин Ерөнхий сайд Н.Алтанхуяг өнгөрсөн долоо хоногт сэтгүүлчидтэй уулзахдаа “Хас” банкийг жижигхээн шүү дээ хэмээн хэлсэн юм. Тэрээр “Урьдчилгааг 50-60 хувьд хүргэж байгаа юм бол “Хас” банк энэ хөтөлбөрөөс гарч байгаа юм байлгүй. Гэхдээ иргэдэд сонголт нь бий шүү дээ. Хэн 50 хувийн урьдчилгаа хийх вэ дээ. Тэгээд ч “Хас” банк тийм ч том банк биш.  Төрийн банк эсвэл Хаан банк ийм асуудал үүсгэсэн бол бас яахав” хэмээн ярьсан.

Засгийн газрын тэргүүний энэ үгэнд "Хаан", "Төрийн банк"-тай харьцуулахад "Хас" банк юу ч биш шүү дээ гэсэн санаа агуулагдаж байна. Түүнээс гадна “Хас” банкаар үйлчлүүлэхгүй байж болно шүү дээ гэсэн уриалга ч явж байгаа юм. Ерөнхий сайдын энэ үгнээс болоод харилцагчид нь “Хас” банкийг үнэхээр жижиг хэмээн үзэх болжээ. Хэвлэлээр гарсан “Хас”-ийн тухай нийтлэлүүдийн дор муу банк гэсэн сэтгэгдэл олонтаа олонтаа таарна.

Ямартаа ч үйл явдлын өрнөлийг ард иргэд ингэж тайлбарлаж байна. “Хас” банкны томоохон хувьцаа эзэмшигч нь Н.Алтанхуягт салаавч өгч, банк нь Засгийн газартай хийсэн гэрээгээ үл тоомсорлон урьдчилгаагаа нэмж орон сууцны хөтөлбөрт садаа болсныхоо төлөө Ерөнхий сайдад жижиг гэж цоллууллаа. Салаавч гаргасан зургаан хүний нэг л лав шангаа хүртэх шиг боллоо.