Ерөнхий сайд асан С.Баярыг хилээр гарахыг хориглосон, түүний гадаадад зорчих эрхийг хязгаарласан гэх мэдээлэл сүүлийн үед гарах болсон.

Тэгвэл албаныхан Ерөнхий сайд асан С.Баяраас Ш.Батхүүгийн хэрэгт холбогдуулан гэрчийн мэдүүлэг авсан. Ш.Батхүүд холбогдох  асуудал С.Баярыг Ерөнхий сайдаар ажиллаж  байх цаг хугацаанд болсон байдаг. Тиймээс зарим нэг зүйлийг асууж, тодруулах шаардлага үүссэн тул гэрчээр мэдүүлэг авсан гэх тайлбарыг өгсөн. Харин тэрбээр үүнийг үгүйсгэж өөрийн яриа өгдөг уламжлалт нэгэн сониндоо “уул, усандаа ойрхон хөдөө явж байна” гэж хэлсэн билээ. Мөн МАН-ын хэвлэлийн хэлтэсээс энэ асуудлаар тайлбар хийхдээ  “С.Баяр  сүүлийн хэдэн өдрүүдэд Хөвсгөл аймагт байж байгаад гурав хоногийн өмнө Улаанбаатарт ирсэн. Үүнтэй холбогдуулан зарим хэвлэл мэдээллээр С.Баярыг гадаадад гарах эрхийг хязгаарласан гэх мэдээлэл цацагдсан байна. Гэвч түүнийг одоогоор хууль хяналтын байгууллагаас шалгаж байцаасан зүйл байхгүй. С.Баяр аравдугаар сард болох намынхаа Их хуралд оролцох хүртлээ эх орондоо байхаар төлөвлөсөн байгаа” хэмээн тайлбарлажээ.

Харин С.Баярын ойр тойрныхон нь түүнийг гадаадад байгаа гэлээ. Тэгэхээр С.Баярыг хилээр гарахыг хориглосон гэх яриа худал болж таарах ч яг хаана байгаа нь тодорхойгүй байна.

Албаныхны хэлж байгаагаар мэдүүлэг авсан нь үнэн бөгөөд цаашид ч байцаалт авахаар бэлдэж байгаа ажээ.
Ямартаа ч С.Баярын байцаалт нийгэмд дуулиан тарих нь ойлгомжтой. С.Баярын хувьд анх удаа байцаалт өгч байгаа  хэрэг биш, өмнө нь  долдугаар сарын 1-нд  болсон хэрэгт ч  байцаалт өгч байсан гэлцдэг.

Харин "Жаст" группын экс захирал Ш.Батхүүгийн хувьд уржигдар цагдан хоригдсон аж. Түүнтэй хамт төрийн албан хаагч хоёр эрхмийг цагдан хориод байгаа гэх мэдээлэл ч байна. Зарим эх сурвалжийн мэдээллээр бол Төрийн өмчийн хорооны ажилтнууд цагдан хоригдсон байх магадлалтай гэнэ. Улсын мөрдөн байцаах газрын Эдийн засгийн гэмт хэрэгтэй тэмцэх хэлтсээс Ш.Батхүүг эрүүгийн хуулийн 233.2-т зааснаар хуурамч бичиг баримт үйлдэн, бусдад их хэмжээний хохирол учруулсан гэх үндэслэлээр шалгаж байгаа юм.