Ардын нам аравдугаар сарын 27-нд намын XXVII их хурлаа хийх гэж байна. Энэ удаа намын дүрмийн өөрчлөлт, бүтцийн өөрчлөлт, намын даргаа солихоос эхлээд чамгүй олон асуудал хэлэлцэнэ.  Хурал ч нэлээд хэд хоног  үргэлжлэх нь тодорхой. МАН хэмээх томоохон институцийн хувьд дарга,  удирдлага нь хэн байх, намын ерөнхий нарийн бичгийн дарга хэн болох, Удирдах зөвлөлийн гишүүд хэн байх нь анхаарал татаж байгаа зүйлүүдийн нэг. Мөн намын шинэ даргаар М.Энхболд, Н.Энхболд, Д.Лүндээжанцан, Ц.Нямдорж, С.Баяр нарын нэгийг сонгогдож магадгүй гэсэн хувилбаруудыг ч хэвлэлээр аль хэдийн бичээд эхэлсэн байна.

Намын их хурлын асуудлаар тус намын Ерөнхий нарийн бичгийн дарга Ш.Занданшатар л тодорхой мэдээллийг хэвлэлээр өгч байгаа. Тэгвэл энэ удаад МАН-ын дарга Ө.Энхтүвшин ирэх сард болох намын Их хурлын талаар  байр сууриа илэрхийллээ. Тэрбээр Их хурлыг өргөн цар хүрээтэй хийхээс гадна Шинэчлэлийг чухалчилна гэдгээ хэлж байна. Ингээд түүний яриаг хүргэе.

-    Намын Их хурлаар хариуцлагын асуудлыг мэдээж хөндөх байх. Таны бодлоор хэн хариуцлага хүлээх ёстой юм бэ?

-    Хариуцлага тодорхой хүрээнд яригдана. Хоёр сонгуулийг Ө.Энхтүвшин удирдлаа. Гэхдээ бидний хүсэн хүлээсэн үр дүн гарсангүй. Сонгуульд дараалсан ялагдал хүлээсэн учир би хариуцлагаа хүлээхэд бэлэн гэдгээ Бага хурлын үеэр хэлчихсэн. Энэ асуудлыг Их хурал дээрээ яръя гэдгээ ч бас хэлсэн. Ард түмэн биднийг дэмжиж байгаа. Энэ намыг хүлээсэн, итгэл найдвар тавьсан хүмүүс ч байна. Харин тодорхой хэсгийн хувьд ажлаа сайн зохион байгуулж чадаагүй. Зорилго бодлогоо хүргэж чадсангүй. Арга барил муу байна гэсэн асуудал байгаа. Их хурлын үеэр энэ асуудлыг ярилцах болно. Бусад асуудлыг ярьдагаараа яриад шийдээд явна.

-    Улс төрчид танай намыг намын дүрмээ хэрхэн өөрчлөхийг харж байгаа байх. Харин олон нийт Их хурлаас юуг хүлээж байгаа гэж та бодож байна вэ?

-    Улс төрийн том нам, 92 жилийн түүхтэй сөрөг хүчин яаж Их хурлаа хийх нь вэ? Ямар шийдвэр гаргах бол?, ялангуяа Шинэчлэл гээд яриад байгаа асуудалд ямар хариу өгөх вэ гэдэг нь их чухал. Шинэчлэгдэх үйл явц нь хурдан байж чадах уу гэдгийг ч харах байх. Улс орны хэмжээний хөгжлийн бодлогын түвшинд ямар шийд гаргах вэ гэдэг нь бас их чухал. Ер нь сөрөг хүчин болсон нам улс орны хөгжлийг яриад байх хэрэггүй гэж хүмүүс ярьдаг. Ярих ёстой юм. Ер нь ярина гэж бодож байгаа. Зөвхөн МАН-д дүрэмд өөрчлөлт оруулахаас гадна хойч үеийн ирээдүй, сайхан ирээдүйн төлөө ямар боломжууд байна гэдгийг ярих юм. Ямар эрсдлүүд байгааг ч гаргаж тавина. Бүтээлч сөрөг хүчин байна гэж л оролдож байна. Дандаа шүүмжлэхээсээ илүү алдаа оноог хэлээд явна. Тиймээс намын Их хурал улс орон ард түмний амьдралаас хол байна гэж байхгүй. Хөгжлийн асуудалтай холбоотой чухал хувилбаруудыг гаргаж ирнэ. Энэ асуудал их чухал яригдах байх. Манай нам бол цул эвтэй сөрөг хүчин. Ер нь бид эрх барьж байхдаа намын дотоод асуудлаа орхиж ирсэн байна.

- Засгийн эрх барьж байхад улс орны нөхцөл байдал руу анхаарлаа хандуулаад намын дотоод асуудлаа орхисон гэж хэлэх гээд байна уу?

- Манай нам олон жил эрх барилаа. Тэр үедээ улс орны хэмжээний асуудал руу их анхаарал хандуулаад ирсэн байна. Харин намын дотоод амьдралынхаа асуудлыг хаячихдаг юм байна. Боловсон хүчний асуудал завхарлаа гээд л шүүмжлээд байгаа шүү дээ. Энэ нь тэр тал руугаа бага анхаарсан байна гэдгийг маань л хэлээд байгаа юм. Тиймээс сөрөг хүчин болсон үед намынхаа дотоод амьдралын асуудал руу илүү анхаарах, орчин үеийн болгох, нөгөө яриад байгаа шиг шинэчлэлийг хийх, цаашид эрх баригч болоход улс орныг хэрхэн авч явах бэлтгэлийг базаах хэрэгтэй байгаа юм. Зөвхөн намын дотоод асуудлаараа оролдоод байх нь явцуу гэж ойлгож байна.Тийм учраас хөгжлийн асуудлыг ярилцаад дорвитой хөтөлбөр гаргах ёстой болов уу гэж бодож байна. Бидний хувьд сүүлийн хэдэн хөгжлийн асуудлаар их ярьж байгаа. Манай нам ард түмний хөгжлийн хөтөлбөр гэдэг зүйлийг боловсруулсан юм. Ойрын 35 жилийн хөгжлийн асуудлыг тэр хөтөлбөрт тусгасан байгаа. Тэр асуудлаа өргөн цар хүрээтэй ярьж байгаа. Харин эрх баригч нарт хөгжлийн хөтөлбөр энэ тэр байхгүй юм шиг байна.

-   Бид нар өнөөдөр задралын тухай биш эв нэгдлийн тухай ярих ёстой. Энэ зөвшилцөл ойлголцлын тухай яаж ярих ёстой юм бэ?

-    Цөөхөн монголчууд бид зөвшилцөж, ойлголцож байж л хөгжинө. Тэр бол бидний хамгийн тодорхой үнэн зүйл. Улс төрийн намууд хичээл зүтгэл санаачилга гаргах ёстой. Монгол Улсын Ерөнхийлөгч үүнд их чухал үүрэг гүйцэтгэх ёстой. Зөвшилцөөд цааш ажиллавал бид 100 хувь дэмжээд явна.