Долоо хоног тутам сэтгүүлчдэд мэдээлэл өгч, цаг үеийн асуултуудад хариулдаг “Ерөнхий сайдын 30 минут” уулзалт өнөөдөр Ерөнхий сайдын ажлын өрөөнд болж, Шинэчлэлийн Засгийн газрын ажил хэрхэн төлөвлөгдөж, яаж өрнөдгийг сэтгүүлчдэд тайлбарласнаар эхэллээ.

   Ерөнхий сайдын ажил өглөө найман цагт ажлын албаны шуурхай хурлаар эхэлж, өглөө бүр ажил хэрэгч, оновчтой санал санаачилга дэвшүүлсэн хүмүүстэй уулзаж, хийж бүтээх шинэ санаа оноотой танилцдагаа сэтгүүлчдэд дуулгасан. Өнөө өглөө л гэхэд Засгийн газар яамдын явуулж байгаа үйл ажиллагааны гүйцэтгэлийг хэрхэн хянах, багаар ажиллах зарчмыг яам, тамгын газар, аймаг сумдын үйл ажиллагаанд хэрхэн нэвтрүүлэх,  аймаг суманд чанарын удирдлагын тогтолцоог яаж бий болгох гэсэн гурван сэдвээр танилцуулга сонссоноо онцоллоо.

   Дараа нь Ерөнхий сайд Шинэчлэлийн Засгийн газар хийх ажлаа хэрхэн төлөвлөдөг тухайгаа 2013 оны календарчилсан төлөвлөгөөн дээр тайлбарлалаа.

    2013 оны төлөвлөгөөний дагуу хийсэн ажлаа танилцуулж үлдсэн гурван сард хийхээр төлөвлөсөн ажлуудаа тоймлон хэлснээс Хөдлөх хөрөнгө, эрхийн барьцааны тухай хуулийн төслийг УИХ-д өргөн барихаар ажиллаж байгаа нь сэтгүүлчдийн анхаарлыг татсан юм. Орон сууцны зээлийн хүү буурч найман хувь болсон боловч бусад зээлийн хүү буурахгүй байна. Бусад зээлийн хүүг бууруулахын тулд иргэн бизнес эрхлэхээр эд хөрөнгөө барьцаанд тавьсан тохиолдолд ямар нэгэн асуудал үүсвэл банк шүүхтэй маргалдахгүйгээр хөрөнгийг борлуулдаг тогтолцоонд шилжих юм.  Ингэснээр банкны эрсдэл багасч, иргэнд очих зээлийн хүү буурах боломжтой болно гэлээ. Ийм хуулийн төслийг 10 дугаар сард багтаан УИХ-д өргөн мэдүүлэх юм. Ерөнхий сайд мэдээлэл хийсний дараа сэтгүүлчдийн асуултанд хариуллаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.